Samac eli samica

Samac eli samica

Denaska san poša na kafe par menuti prija podne. Tac mi je grdo bolan, strefila ga je gripa, ma foši je već nervož nego ča je bolan. Već pet dan z ninin ne kušelja. Zapra se u kamaru i ne želi viti ninega ko ne moju mater. Uvih dan je sve palo na me; kraj marča je, triba vrči krumpire spod zemlje, triba brajde povezati, inšoma, dela koliko ćeš, a ja sam!

Dobrahno je zateplilo pak se more komotno siditi vani. Ivanka je vrgla jedan banak vanka, jušto ko bi ki stija biti na ariji. Meni je vajk liplje na ariji nego nutri, komoč čekan marač da moren sisti vanka. U piceriji je zadimljeno, gušiš se, a zadnje dane i vonja za popizditi. Ne znan zašto, ma pensan da zadaje na fonju. S nami side Pere Šuštar, kemu je jušto vrime ud marende i moj šantuja Branko. O čen bi nas tri mogli kušeljati ko ne o kravami? Moj šantuja, ki ima trideset istrijanskih govedi: ča krav, ča telci, par baki i dva vola, prija je najveć komerča z blagon. Prid jeno sedan-osan lit se je kalma, tako da u zadnje vrime samo goji, ma steši ti komerčo ča je u njen ni zamra. Prid tri miseca je proda Peri Šuštaru kravu. On je reka da je puna, ma to bi samo Bog zna. Krava je Istrijanka tako da će Pere dobiti dva miljara kun ča je drži, a kad se uteli još pet. Lipo su se oni juštali, kako rabi, samo jena pikuleca zapačiva Peri Šuštaru. Govori Pere mojen šantulu da ko krava ne zleže samicu, nego samca će ga kambijati, aš su se tako vrgli dakordo.

— A ne, ne Pere, mi smo se juštali za kravu, tri miljara marak, i da ko zleže samca, ja ću ti ga kambijati, ma ti znaš da samica velja duplo već ud samca, zato ćeš rabiti dati još kakov šoldo. Ko mi daš diferencu ću ti je kambijati, ma ko ne, nanke u ludilu — špjegiva moj šantuja.

— Ma ća govoriš? Smo se lipo juštali! Ča si već zabija kad smo se na stanciji poli tebe vrgli dakordo? Ča ću vraga ko mi zleže samca? Moren ga samo ubiti. A samicu ću zgojiti pak će mi biti za naprid.

— Ne, ne — rabijiva se moj šantuja ki je vajka smiren — lipo smo se vrgli dakordo i nemoj se sad spensivati ništo treto.

— Ma ča govoriš, Branko, ja tebe štiman kako čovika! Ben, alora daj i ti mene — zacrlenija se kako peteh Pere i špjegiva unu staru — čovika se drži za besidu, a blago za roge.

Na to san se nasmija, aš moje krave nimaju roge pak više ne znan nanke ko ta poslovica velja. Napro su se bili natizali oko tega ki je ča reka. Kemu je za verovati ni sam ne znan. Pere grobar je jeno malo šempijan, ni vajka za hoditi za njin ma san siguran da je pošten. Poštenja ne fali ni poli mojega šantula ud berme, ma lo stešo znan da je komerča lit i lit, a kad to delaš moraš vajka na se pensati.

Ja san he vero z gušton sluša, aš grdih besid ni bilo. U jeno san sigur: njin dvima ne bude rabija sud za znati ki je ča reka.