Dota kraja Tomislava

OKLEN SMO ARIVALI?

Oklen smo arivali i di gremo?
Iz Perzije, Ukrajine, Bile Ervaske,
priko stepe, priko rika, priko gora?
Ča nan je falilo?
Dica su igrala na ploke, vatalo,
edukacjun jin je bija pravit kopja, strile, šćite,
stariji vavik ništo mažinali, kopali,
stavjali lace za kune, lisice, zece,
dilali bukare, zdile i frule,
stali u fermi,
a ženske na škini nosile brime,
pasle ovce, koze, ranile kokoše,
prele vunu, vezle bičve, krpile škofune
kuvale, prale, pivale...
i nisu in falile ventule, kombineti, kolonje i šminka.
Oklen smo arivali i di gremo?
Jesmo li u stepi ćutili rešpir soli,
u fantažmiman adočali jidra, jarbule, brode?
Ponda, korak po korak, Velebiću dojizdili,
na vedutu stali: »E, ‘vod smo tili doć. »
Jerbo, čovik bidan i siromaj
nima kartu điografiku ni bušulu.
Slidi Sunce,
ostavja katune, grobišća, guvna, pepel i gnjoj,
i su naprćenin konjiman i blagon
jidri kroz fuškajicu bašadure,
u škurici pita zvizde i firmament di je,
vavik iska zlatne míre, sigurecu i obilancu,
zazivje Svantovida, prti Peruna i stišće zube:
U kalma bonacu joli u perikul.
Jesmo li ćutili vonj kaduje, murtile, kalopera,
lavande, koromača, cmilja,
črčanje črčak, kliktanje galebov, rešpir dupini?
Je li nan Bog providi ovu zemju
i intavula nan za vike vikov
ka’ smo isikli smriku,
prve madire zabrokvali,
arburali jarbule i jidra,
izvezli navu na kulaf,
zauzlali buru, jugo, lebićadu i šijune?

Je li nan Bog providi ovu zemju?

PRISPIĆE SEDAN PLEMEN ERVATA

Eraklije cesare,
ča primiš nas rašplankana serca kako jude,
poza perikuli, patimenti i svi’ laudača,
vazeli smo zemju ča si nan providi:
krš i poja, šume, brige, vrila, rike,
kalali se do sinjega mora, uvali i žali,
zdigli na kriliman o’ Istrije do Bojane,
zapasali sedan župi...
I doklen bude force, tirat ćemo priteže, sileše,
s’e dušmane ča bi pritili demaniju i namin.
Su rišpeton i zafalon šajemo ti libar,
jerbo laškale su puste nenadinje,
arivali smo na poslidnju štaciju naši’ điti po svitu,
stali su kari, opočinuli konji i judi,
ženske i dica su veseli,
muški kopaju fundamente i livaju ankore,
jerbo znaju da su se tod akoštali,
u tu lipost za vike vikov,
da bi kumpanjali Sunce, more i sol,
kakor si nan i providi, cesare.
Svantovid ti da zdravja i spokoja doklen guvernaš na svitu.
Pozdravjaju te
Kluk, Lobel, Kosenc, Muhlo, Hrvat, Tuga i Buga.

NARODNA SKUPŠĆINA NA DUVANJSKON POJU

Na Duvanjsko poje rika judi lize,
batidu bandire ervaski’ plemen,
ržu konji, išću napoj, ránu,
ijadu je kopji u zemju zabijeno,
mačevi u korican stojidu,
i plancaju ognji, čadori se zdižu,
u bakran se meso kuva,
okriću se janjci, bukare potižu.
Knezi i župani, stotnici, kurijoži svit,
brez malicije su Latinin kumpanjaju,
češu se za juva, parlaju na mote,
klanjadu se, mirakulaju jeni drugiman,
pipaju se grezi krožuni i fina roba
u mišanci riči ča će jenon bit kjare
i jenin i drugin, ka’ se baraškade smire
potriba ka’ bugne u tenple
i priteže pomete ista vira i ista žeja.
U fermi poklisare pape čekadu
da konašno bugne timbar
za s’e trude i pašjune ča su i’ pasali
i da dotrinu Kristovu u libriman projdu
i pod Kristov barjak dojdu.
Nikon prin toko sriće ne biše u prsiman.
Tod se trubje nike čuše –
cesara i pape judi na konjiman bilin jašedu,
su velin križen isprin svite.
Na zapovid glavari vas je narod na tlej kleka.
Blagoslovi biskup kneze, s’e župane,
zemju ča su zapocesali i narod ervaski,
Patrona jin udili – sveteg Petra i Pavla.
Mejaše su s’e sinjali
i u libre i’ škrivali,
meje žup i latinske,
biskupije Ninske,
zapelili da ne grišu,
a u gveru da ne prišu.
Neka dura ovi kontrat
i svin bude sigur porat
da se zna za u s’e vike,
sa’ je stajun pulitike:
nek Latin u miru ore,
a Ervat mu čuva gore
o’ Franak i Avar,
o’ vuci i kankar,
notak goluzač,
o’ zla, laudač,
ča víru iz sake buže
i za karv ne išću skuže.

Dvanajest je dnevi durala skupšćina
na Duvanjskon poju.
Da bi parbe, ne bi dneva,
Ervatima serca bate,
nove vište jin se zlate,
finila je injoranca,
u kolu se kriče, tanca,
ulize jin duv parona,
ćutu tamjan, bate zvona
i o’ sriće svi se pote,
a mašuri ove dote –
poja, gore, more, rike.
plužit će se u s’e vike.

Nikad višje pusti’ štradi,
straja, sumji, patimenti.
Nikad višje ne će curikavat.
Na poslidnju štaciji
arivali da bi se intavulali,
fundament demaniju iskopali,
i u svitu dično ime miritali:
Antemurale Cristianitatis

KRSTIONICA KNEZA VIŠESLAVA

Kacaj teštu u bucal, čoviče,
jerbo on te čeka, jema pacijence,
vazima i salvaje,
imbragaje svitlinon malešne i slabašne,
virne i gladne, strašjive i žedne.
Ispurgaj nenadinje, maliciju, sumje,
da te kapje spasa prosvitlidu,
deštrigaju zlodila ča si i’ ka timbar
naslidi o’ prvi’ roditeji,
i brivaj Materi Crikvi,
da se zdigneš u fetiva kristjanina,
ispoviduć Sveto Trojstvo,
viru u Otca, Sina
i Duva Svetega.

Na diku sv. Ivanu Krstiteju.

TIMBAR KNEZA TRPIMIRA

Klisom do Bijača kolivka se zlati
i prigiba Crikvi, martiru nan Duji.
Zvoni Seti Juraj, jube križ kurati
fundament di udru pradidoski žuji.

Korabju je arma i zdiga lantinu,
pri’ dvoriman ćuhti Kristova bandira,
na Mislava dilo zabi rebatinu –
bati povist – timbar kneza Trpimira.

Jur višje forcaje u dvajsprven viku
oti bokun stine ča bi dušman štruka,
jerbo nan je dota i potiže štriku
da je u nas turanj, o’ Jadrana kjuka.

I vikovi projdu, oseke i plime,
goluze armade, Mleci, turski šturum,
ma riči zvonidu, držidu je cime:
Ervati ča tod su i dux Croatorum.

BLAGOSOV PAPE IVANA VIII.

»Branimire kneže i jubjeni sine,
ki jur more reć da Ervat je grez, tašć,
ka’ u Rimske Crikve, srid šijuni, pine
za biskupa išćeš posvećenje, plašć.

Tornaš se kolivci, vazimaš iz vrilī
di su dični pređi kaparali spas.
Višnji nek te kripi i salva o’ strîlī
ča s Levanta jizde i prišu u kas.

Zapametit tȍka povist oveg dneva,
meju virno stado kontan narod tvoj,
veseje me tišći, laška bis i léva,
bizantskega cara dišparantni poj.

Rašplankana serca ove foje priman,
blagoslivjen zemju i iznikli cvit.
Demanij nek reste u šćit Sveten Križu
i brani mu portik doklen dura svit.«

Ivan VIII.
21. svibnja 879.
na dnev uzašašća Gospodinova

MUTIMIR

O poslidnji kneže ervaskeg kolina,
jašeš o’ Bijači, priko Knina, Nina,
peharnik na dvoru bibite ti toči,
a timbar na fojin forcu ti svidoči.

Izmeju Latini, jutega Bizanta
požicjun ti jemaš cesara žiganta,
ča kontrat rišpetâ i ne gazi riči
ni svoje ni pređi, juskost tebe diči.

Narodi se taru ‘kolo tvoji’ meja,
ma ki bi Moravce i Ugre raspleja,
jemaš svoje posle s’e do rike Drine,
pačifiko stojiš – saka gvera mine.

Prizabi si navi korbe i madire,
regal očev lašćiš, zdižeš tvrde mire
i križ vire jubiš doklen greš svon praju,
to – pripravjaš štradu Tomislavu kraju.

KRAJU TOMISLAVU

O cesare Primorske i Panonske Ervaske,
tebi koga papa Ivan oslovjava krajen,
a puk o’ davnina trata i špjegaje skaske –
vični spomin, pismu fale začinjavca šajen.

Ka’ je Bizant i Rim kleca, drćala Europa,
za kršćanstvo i pravice zdiza si vrj mača.
Simeonu i Atili vojna brzo propa,
prid ždrilca i’ sokol tira, stira i nadjača.

U sageni i konduri s Jadranon se bratiš
da u jidra skupjaš vitar od luke do luke,
sigurecu dilaš plovom, nove rute zlatiš,
a krš, buru privazimješ, uz gusala zvuke.

Priteže su izdušile, vonj gvere i sila,
upri joči, tvoje sanke isklesali mi smo,
Ervasku, ča duvon krili s Velebića vila,
u Neveri nad neveron ka’ se braski zbismo.

TOMISLAV KRAJ

1

Oganj ita Mutimirov sine,
jur za rana šćit i mač kumpanja
da bi sigur jidri u garbine,
konduru na veloj meji stanja.

2

Po Moravskoj zemji Ugri zišu,
a Koceju¹⁾ tresedu se miri,
priko Drave s’e nevoje prišu,
čas je da kogod u rog zasviri.

3

Prid oltaron sklopija je ruke:
»Bože, dvi mi horde na prag bate,
branit mi je ćaće svoga muke,
jol’ će Ugri progucat Ervate.«

4

Arma se je, spravan je za gveru,
uzda se u Boga i šperancu;
da barenko dekuje školjeru,
zapri porte i tišći balancu.

5

Na Gvozdu je drivo puno višća
i Arpadu²⁾ soldate nasupa.
Badaju ga strile i kopišća,
u trapulu kneževu je upa.

6

Žuku landu olosti proguca,
mora bižat oklen je i doša;
u svoj robi po Dunaju buca,
klete dan ka’ je na kneza poša.

7

Spasitejen zovedu ga puci,
grnu svi po’ siguru bandiru,
laškalo je i ne laju vuci,
u Sisku, čuj, diple jopet sviru.

8

More zdignit sto ijad soldati
i šezdeset ijadi konjiki,
osandeset konduri se zlati,
sto sageni, sto joči na siki.

9

Cesara sa’ jema za kumpanja,
jerbo Bugar Carigradu priti
i brez kneza nima mu ufanja –
dat će ruku u ‘voj kalamiti.

10

Drće Bizant pokraj Ahiloja
i tresu se miri Carigrada,
noću, danju, nima jin spokoja,
more sinje šperance je štrada.

11

A cesar ni tovar joli tuka,
višta mu je daje o’ dukati;
ki će Simeunu smrsit kluka –
salvat će ga Bog joli Ervati.

12

S’e gradove da mu po’ okrilje:
Krk, Split, Zadar, Trogir, Rab i Osor,
da ka konsul mire blagosivje –
on će gledat ča će uć u Bospor.

13

I opali Latine po žepu
da oćute ki je vode forca,
jerbo knez će gusi plesnit klepu
i flotaman tujin škice škorca’.

14

Ma njemu je Sveti Križ na prvu,
di je papa, tod se i on kriće,
ret mu blišći, ka zemajskon črvu,
bit su Rimon, duva je dobiće.

15

Pensa i na bratje Srbja muke,
na dvoru mu velikaši, knezi,
otvori jin palace i luke,
ne šćedi provište ni pinezī.

16

Jerbo Bugar tišći i’ u mriži,
jaram steže, potiže verugu,
i brez jila, pila, brez valiži,
niz Moravu goni prama jugu.

17

Simeun³⁾ pu’ Carigrada bati,
a vojvode na Srbiju šaje,
oće je kaštigat za neviru,
kneževinu dešvat u retaje.

18

Mrmaju i Sigricu⁴⁾ srića,
misto plínu, udre put sikiri,
Zaharija⁵⁾ dili i’ o’ žića...
Bugar jin u vrići glave mȉri.

19

Simeunu fibra brzo projde
i Bizantu ita mira ješku,
pa Časlava⁶⁾ mata da mu dojde,
floćaje pas i grede u pešku.

20

Zaharija Tomislavu biži,
Časlav, mona, kala mu španćeru,
su županin cima se u mriži,
misto diki, srne u jaceru.

21

Bižanija, krici, krv se toči,
jopet floćun s’e porte jin rumba,
s’u mižerju mač, oganj rastoči,
u Črljenu Ervasku svit tumba.

22

»Zač bižidu pram sinjemu moru?«
Simeun se vata za mišinu.
»Nima druge vengo pojt tezoru,
Tomislavu tresat trdu škinu.

23

Vojvoda mu skupi s’e soldate,
Dunaj prijde i zdiže bandire,
talambasi po ravnici bate:
»Moga bi mu dešvat s’e madire.

24

Siguro pun brig ćuli na Klisu,
s gravanin i stinan se ćakula,
jol’ se moli, daje svetu misu,
da ga nebo o’ zavrj škapula.«

25

Arma se je ka da će pu’ Rima...
volȉ, konji, kari na Moravi,
ma mu guja u njidriman cima:
»Ča akor ne dešva jarbul navi!?«

26

Tira ćurmu jerbo mu je priša,
konta di bi knezu itni brumu,
škice i fantažme tešta miša,
ka da će mu zec uteć u šumu.

27

Ka’ u niku uru udru strile,
jena bojna Ervati se zdiže.
Vojvodi se namaj sledu žile,
gućulu proguca, jušin striže.

28

Brez mudrijat, konjike, soldate
potira progonit te strašjivce,
ter se vrȁne u šušuru sjate
ka da gredu operušat pivce.

29

Trdon štradon, meju šašon, blaton,
curikaju Ervati po poju,
a Bugar su živinon, laton,
vodu bati, kljocnu u nevoju.

30

Tomislavu u trapulu prišu,
s’e blizje su zledu i kaštigu,
ćunke cire, pobidu mirlišu,
u olosti ne badaju šćigu.

31

Tomislav konjikin zapovida,
su dvi bande očepi je špinu
i u klišćin gnjidu ispovida,
pusti strilce da lavure finu.

32

Nî podne, a Bugar brez soldati,
kopji, mači, brez zeru šperance,
brez indeje da na mejan bati
i su knezon mȉri na balanci.

33

Tri su dana krcali na kare
armu ča je ostala po poju,
četvrti rog opri kalamare:
»Vrime je za curik«, botunaje.

34

Golubi su poletili jugu,
priko gor i dol drito pram Duvnu,
tićice jin pivadu u lugu,
a svit tanca, dipli se na guvnu.

35

Priko Knina udre knez pu’ Klisa,
meju mírin dili plin, ordenja,
kâpe stroji i, u svitlu krisa,
u komoće spravja s’a znamenja.

36

Peharnik mu rujno vino toči,
vojvode, župani, zdižu žmule,
biskupu o’ sriće blišću joči,
a Latini ka smantani ćule.

37

Konstantin u bili libar škriva,
ča će povist svirit u s’e vike,
kakor Ervat za Križ Sveti siva
o’ Jadrana pa do vele rike.

EPILOG

38

Erakliju prisegu smo dali –
branit zemju o’ »mraza s Levanta«
Tomislav je svidok, šapju vali,
začinjavac u pismi van kanta.

KRUNIDBA KRAJA TOMISLAVA

1

Sjatija se narod na Duvanjsko poje
po plemenin, rodin, s armon drito hodi.
Gusle, diple sviru, s’i su dobre voje –
za krája, put crikve, Tomislav knez brodi.

2

Su šćitin i kopjin gredu mu rondari,
kurati su svićan, latinski, ervaski,
poza nji’ soldati, kâpi i mornari,
bandire i šenji gledadu se braski.

3

Bani i župani, graski kaštelani,
s’i magi i face sivera i juga,
vojvode, glavari i dvorski župani,
gredu ka po špagu, ovi dan se spuga.

4

Na glavi su župan dvora i did.
Biskup o’ tezora,
mačonoša su krstašen,
župan kopjonoša,
župan šćitonoša,
župan peharnik s peharon zlatnin,
župan konjušnik su šćapon zlatnin,
župan ubrusar, s pinjuron zlatnin,
jur šest župani za regalat svit:
župan postejnik s rikamanin kušinon,
župan kjučar s kjučen zlatnin,
župan bravar, župan volar,
župan psar, župan sokolar...

5

Tomislav se libi u grimiznoj haji,
ni obika feštat, ven tišćat timune,
pa mu misal jidri ka’ je bija mlaji...
jur ne jema bilig, ni plašća, ni krune.

6

Dojdu mu prid joči, gvere, pusti boji,
patimenti, friži ča je za Dom proša.
Višta na Divicu kuraži ga, poji:
»Sveton Križu, Crikvi budi šćitonoša.«

7

S obe ruke nosi regal za kurate
ki će ga pomazat ka ča i mirita.
Svit je na tlej kleka, a časnici bate
U zdravje i diku i Na mlogo lita.

8

Prid crikvon je mloštvo, ka na moru bará,
nikor se ne žešći, ni ne išće reta,
a biskupi vodu krája do oltara,
deputati pape tišću vrj arketa.

9

Krunitej se kriće i vas narod pita
oće li da krája po regulan kruni,
a narod se zdiže, nebu cviće ita:
»Omar, salva nas je u s’akoj fortuni.«

10

Prin vengo će sist u krajevsko pristoje,
Tomislav se prigne ispo Sveteg Križa,
pomoli za narod, more, poje, škoje,
da uz Božju pomoć Ervasku armiža.

11

Krunitej ga paše krajevskin krstašen,
guvérna da dura mu ka Salamunu
i ujen ga maže, paše Očenašen,
pa s obe mu ruke mekne zlatnu krunu.

12

Kano zlamen pravde, kriposti, spasenja,
u ruku mu stavja i krajevsko žezlo.
Cimblići tod udru, pristahu s’a prenja –
Krajestvo Ervasko je na kulf zavezlo.

13

Na vas glas zakanta: »Ujme Oca, Sina
i Duva Svetega...«, da mu opri joči,
vodi ga do trona, di pravda, istina,
uzajeno s Bogon, obilancu toči.

14

»Nek te forcon pašu i Bog i Duv Sveti.
pak straj Božji, vično, nek ti udre timbar
a gracja pram judin, grišnicin poleti
i šperancon, viron okriće jin Libar.

15

Svi’ crkveni’ leđī, ‘vik branitej budi
i tribunal tišći na prav doklen kráj si,
uboge šćiti da jin zvir ne naudi,
raju da mirita su tilon i vlasi’.«

16

Litanija ferma, stari plašć, postoli,
rizničaru prida da i’ srani škrinja.
Komornik ga kiti novin plašćen, moli,
a postolin novin i čovika minja.

17

Kraj se zdiže trikrat, klanja pram oltaru,
a glave svi’ stalež dohode u fili,
pri’ pristojen kleču i tavele taru,
jube ruke, skute da i’ kráj zakrili.

18

Na ambonu kurat piva Slavu Božju
i krunitej pervi more mu kolendrat,
pozatin kumpari (ki će prin, se gložju),
ter Na mlogo lita jopet udru kantat.

19

Kraj zajaha konja, uspne se na stinu,
mačen sivne na s’e četr’ bande svita
i prisegne da će branit Krajevinu
o’ dušman, nesrići i sakega prita.

20

Palidu se ognji, judi se molaju,
nosidu se jila za narod, soldate,
a glave plemen regalaju kráju
tri krcata kara zlata i đogate.

21

Tri se dana jilo na Duvanjskon poju,
diplilo i pilo, gangalo do zore,
guslili su svirci o bugarskon boju,
a mačevi zvali: »Davore, davore!«

22

Kraj pojde su sviton da vas posal fini
i po juski timbra regalate, laši.
Za bane postavja jude ča su smini,
a plemena misti da Bugara straši.

23

I ordin se štije da krajevska kruna
pripada po rojstvu, njegovoj fameji,
a akor mu loza klocne brez paruna,
nek se s’i pokore Bogu – banskoj žeji.

ŽALOBNA PISAN
(svidočenje nepoznateg ervaskeg pisnika iz XII. stolića)

Šapju míri, nave, bori, tice, vȁla:
»Trpimirovića loza je usala.«
Ka krpeji Ugri lizu na s’e bande,
Ervasku nan cipaju na lande,
tili bi se moru prižentat
i ka tutor namin guvernat
‘vod di zikva nji’ nī jur jujala,
ni čela jin na pojin zujala,
ni škaja ji’ u postolin žujala,
i di nisu pustu karv prolili,
da bi svoji na svomu ‘vik bili.
Od stolića sedmeg kumpanja nas Svitlost,
ka’ smo Erakliju prisegli na virnost
za puste zemje ča da nan je u dotu,
ča smo ji’ o’ vrazi čuvali u pôtu.

I Jelenu bidnu najdu ka za skužu
pak po svojin lȅđin najdu ular – bužu,
da bi poza tega zabili nan šilo,
vazeli nan krunu, jidra i kormilo.

U pervi jin maj Kumani posal smrsu
i o Dalmaciju nit’ se ne omrsu.
Ladislav curika po brdin i klancin
vapijuć za moren, portin, kanjcin, jancin.

Oni dil Ervati ča su znali pensat
ne jemahu force za tu ludost fermat
i zemja se jopet cipa na dva dila,
a Ugru je malo i krcata zdila.
U ten jadu, fotu, s’ak bi ti guvernat,
nima stupe za kalafatat kimenat.
Samo Snačić dȉla, šćiti kakor mȍre,
ma ne mȍre kontra Ugri i Šinjore.

Teško vrime, teško brime,
na pojin ne reste sime,
teški jadi i lampade,
krive rute i vogade.

Koloman pištule šaje,
šalavrda Papi laje,
míti špije i Latine,
s’e to priko naše škine.

Maškará se, plete mrižu,
míša trave u lopižu
i spušća se prama moru
»da Buzilu torna dvoru«.

Drče zlato mu na rojti,
jur mu Ervat ne da projti
brez boja pak kakor fini –
na pristoju jol’ na škini.

Tod je zanji kraj ervaski
svoje kosti ostavija,
brez greba, brez litanija,
ma je svoj na svomen bija.

Stišće Koloman jobraze,
pensa kakor bi s’e vaze,
da mu val juja koćetu,
brez da plati tod buletu.

Podmuče nan šaje libar:
»Dost je gvere, dajte timbar
pa se ne ću mača laćat,
nit’ u vaše posle pačat.«

Ugri naše meje projdu,
guske u Bijograd dojdu
i timbraju zlu ofertu,
suza kane fundamentu.

Sa’ gredu u oželandu,
mataju u dúru kajbu,
ma svin su zaprte joči,
Krajestvo nan se rastoči.

»Ki sam ne guverna, ti je šušabeka«,
to bi kráj Tomislav Ervatin prav’ reka.
Su dvi krune furbu Kolamana krunu,
sa’ jemamo tujeg kraja na timunu.

Šapju porti, šapju nave sri’ konala:
»Trpimirovića loza je usala.«

DMITAR ZVONIMIR

I Latini i Ervati išću Zvonimira
da se sveton krunon kruni na Solinskon poju,
di je crikva sveteg Petra, di našli su mira
za s’e vrime, naši kráji, u kliškon prisoju.

Isti senji ka i dičneg kraja Tomislava
resu njega na pristoju, vas svit je uzbujen.
Gebizon, deputat papin, tamjanikon mava,
dok kráj prisiže papi, svetin ga maže ujen.

Su krunon na glavi pojde u kićene dvore,
slidu ga župani, bani, poteštat i svȉta.
Na Saboru vazme rič i riši s’e pripore,
zbrati jude ča su karali se pusta lita.

U šȅstu je zemja sva od Neretve do Drave,
posal mu je stat atento, bane vižitavat,
pravice i gracje dilit, gradit míre, nave,
Svetu mater Crikvu šćitit, lašima tratavat.

Da to nisu floćunade, joli mače bȉše,
regal Svetoj Luci – zemja – jur svidoči,
jerbo u kamenu trdon o ten povist piše⁷⁾,
glagoji u Juran dvoru na Bašćanskoj ploči.

Zdiga je biskupske dvore i crikvi duzinu,
tezor mu je krcat blagon za s’aku nevoju.
Kraj Ervaske, Dalmacije, u miru počinu,
slavjen o’ sveg smirneg puka, u Solinskon poju.

STJEPAN II.

Ča mi juga, lebićade podlokaju stine,
ovod di se višta na Brač, Šoltu zlati,
ma Bog mi ni providi daje Splita grada
da guvernan floton i takajen porte,
vengo da čenprese, bȍre obalajen
i jutron pozdravjan ribare, nad moren galebe,
slušan gugut grlic, grdeline i verdune,
a u sumrak jejine, kukviže,
doklen uz šteriku štijen
evanđejā, svete libre
i molin se da mi zemja ne usane,
brez rik’, jezer’ ne ostane
i brez oveg mora ča ‘vu hrid podlokaje,
ka da oće reć da majnan jidro,
pod ovon stinon da bacin sidro,
da useknen sviću i odložin krunu
ča mi višnji Bog mi da je.

KRAJU PETRU SNAČIĆU

Tisni klanci pante zgibil, dotu gora,
rȉku Ugra tašćeg ki tuje svojata
i upire jugu, manovra pram mora,
uz poporu sameg smantaneg Ervata.

Sputaju nan ruke parbe i škandali,
okriće se košće i praj knezī, krájī,
furešt cesar baza, po domaji bali
i o’ krune dične libe se retaji.

U Petrovu sercu šćilet bužu dubi,
ma pridaje nima, stoji na školjeri.
Fortuna se ciri, mač i barjak jubi,
tokat mu je zginit u karvavoj gveri.

Krajestva nan sveteg zanji plancaj sinu,
Koloman odanu, krunu nan priženta.
Nad Gvozdon se dimi, kuco je u Kninu,
Snačić kusat ne će žuč Pacta conventa.

UVIK ZA KRIŽEN

Ka mrav za mravon, u grubo vrime,
za Svetin Križen išli su stari,
i ka’ se Božje gazilo ime,
ka’ su pod kjučen bili oltari.
Ni mijur jama ne slomi viru,
ni dritu povist, ni jazik roda.
Javal je drča, prilija miru
ka’ nan se taka u rutu broda.

Trda je prova ovoj braceri,
ne će je dešvat ni val ni šćiga.
I ka’ je grizlo ka u jaceri,
raspeti Isus uz nas je liga.

Uvik za Križen bratimi su puzli
i ka’ su Boga fruštali Pilati.
Nek su i’ trli beštimje i uzli,
uvik za Križen išli su Rvati.

____________________
1) Slovenski knez.

2) Ugarski vođa.

3) Bugarski vođa.

4) Bugarske vojvode.

5) Srpski vođa.

6) Srpski knez.

7) Stihovi: Ivo Cvitić.