Proletje v meni

PROLETJE V MENI: LJUDI

Dokši dani piju sonce, po kraju
več listaju ljudi. Košare male
su z prsti spleli, zvončeke čuvaju
friške, bele, kaj su jih šume dale.
Z rodama su doleteli v domaju
ljudi nebeski, ravnice su spale
v čoveku. Vse male sreče su, v sjaju
proletja, mrazeku v pehar opale.
Proletje v ljudima betega strebi,
vse rane zimske i madeže v duhu
narasle. Blagom se soncu na nebi
veseliju znova, kak belom kruhu
na stolu. Proletje poklanjam sebi,
jedinom preživelom potepuhu.

PROLETJE V MENI: SONCE

Ja rad imam sonce. Sonce mi zdene
senje greje do kosti. Zlato toči
od ranja, zdiže me z postele lene
i dneve mi z dobrom voljom poploči.
Žar sonca žegeče drevju korene
gliboke. Več čutim topleše noči,
v novi se zaokret živlenje gene
samo po sebi. A dok otprem joči
v to sonce, radost me celoga prime.
Večeri rane, zažarene bronce
v nebosklon toneju. Ja vu to ime
živlenje slavim, nazaj lovim konce
kaj zima jih pušča. Dost mi je zime,
proletje teče. Ja rad imam sonce.

PROLETJE V MENI: SPOMENI

Zmislim se gda sam zacajhati mogel
proletje na kolendar. Točno na den
zatrubil bi jaglac, zvonček pomogel
zvoncom belim, šafran naluknul se snen.
Vrbin se koren več vode domogel
v potoku i skrnul pošteno, za tren
vrbu potočkal zeleno. Den je zel
sonce na dlan, plan za proletni refren.
Sega se zmislim vu senji deteči
i bosi, proletje i ja smo stari
pajdaši. I ve bi mogel priseči
da v žilaj su živi te kolendari –
zeleno v meni na dan počne teči,
a zima još traje, spomene kvari.

PROLETJE V MENI: ŠUMA

V jutro veter hrasta staroga špotal,
v dedini šumi, mom polek kamena
međaša. Bršljan se na njeg namotal
kak plašč. Tu glogova boba črlena
po vehi se reda, kak živ parangal,
gizdav, zdrav. Još fali nošnja zelena,
proletna, mešna, ve bu ju Božek tkal,
živa bu šuma kak još niti jena.
Znamenja vsa su na kupu. Vu misel
bu mater priroda živlenje zlegla
zdenom veljačkom soncu. Den se stisel,
proletje šepče, čkomina polegla.
Od listja mi bude broš z vrata visel,
to mi je v jeseni šuma prisegla.

PROLETJE V MENI: VETER

Na koncu zime, zadnje fleke snega
polizal je veter. Zaigral v strune,
fučkal, hučal i splel nad vrhom brega,
na plavem, ovčice od bele vune.
Pupi na vehama slaviju svȇga
prvoga toploga dana. Čim dune
južnjak i sonce raznese prek sega,
proletja ranoga šume su pune.
I meni se zaplel v lasi, kosma me
nežno i blago, dok šepče na vuho.
Jaglac skriva zadnjeg lista ciklame,
kak drevo listam, čkomeče i gluho,
zamotan v zeleno, palo je na me
nebo i proletno vetrovo ruho.

PROLETJE V MENI: VODA

V rano proletje voda več neje led
po zemli. Klokoče v potoku, v reki
šumi, na nebu čkomi kak oblak bled,
kak dežđ rominja po zbuđeni meki.
V megli je voda, hlapi na zapoved
sonca, mokri na trotovaru fleki,
na travama rosa kak biserni red
kaj zvezdice iskri, kinč kratkoveki.
V lokvi na stezi ju najdem hrđavu
od ilovače kaj došla je z klanca,
za taban zebe dok rastem vu travu
visoku. Najdem pod brestom zviranjca,
vse vode kralja, njemu vu slavu
pozdravim proletje, staroga znanca.

PROLETJE V MENI: ZEMLA

Oranju v brazdi zadremala voda,
lit zadnjega snega. Zajužilo je
prek polja. Dohaja vrela sloboda
za cvet divlje šljive i dneve moje.
Vsa zemla diši po proletju. Roda
rana na oblaku visi i svoje
krilo počiva. Dok duh zimski hoda
v sonce, do večeri zabil bu gdo je.
Zemla i ja smo jeno, dani zdeni
su prešlost, ostalo je zadnji meter
blata prejti. Budiju se koreni
i meni je krv topleša, kak veter
sem južni. Sako proletje po meni
potiraju pupi, zeleni pleter.

PROLETJE V MENI: DANGUBA

Nema za ftiča na svetu poslanja
nego pod krilom veter i trbuh pun
zrnja. Nema on drugoga imanja
od gnezda. Bogec je, a ne bogatun.
Danguba čaplja stoji sred oranja
kre gole šume, sivi se prazen kljun,
ostanjke su od koruznoga branja
pobrale vrane, gladne, za svoj račun.
Oranje škriple, a zmržjenu baru
veljača stišče. Vu dahu južnjaka,
ves led se rastapa. Za čaplju staru
v plitvini pokaže sončeva zraka
srebrnu ribu. Vu svoju košaru
dangubin zalogaj fkrala je svraka.