Rieč goreča

Goranu vu spomen

V sakem od nas čepi po jena smrt, čkomi vekvečni rihtar, strašen vu svoji samini, kakti žerjav vu nočni črnini, v lubavi i mržji jednak. Nikaj vre neje čuti: a morti to, itak, vuhko šepečeju vetri, ili trepeču lastavičke, vu presečenom gutu, mozbit to friško skopane joči senjaju protuletje? Je ne znati. Sam smert je povsud, gleč, se stiha smica, kak nož kaj brez falinge posluje – žuhko, žuhko...

Vumrl je Pesnik, nit groba mu nie, al’ rieč je njegva goreča, živa, kak roža jognjena znovič rojena, plamteča, zmed zmešanim travam ludskim, svetleča vu dalšinu, zmed kugam i kaštigam, rieč kaj je človeku – rieč, a ne zapoviest, tabor i kob: rieč kak mementuš zanavek otprt vu nami, kak luč na temnim stezam, kak nevniščeno detinstvo zemle.*

__________________
* čepi, čuči - rihtar, sudac - žerjav, vuk - vre, već - morti, možda - itak, ipak - mozbit, moguće - je ne znati, ne zna se - brez falinge, bez pogreške - nit groba mu nie, ni groba mu nema - zmed kugam i kaštigam, između (vremena) kuga i kazni - kak mementuš, kao memento - nevniščeno, neuništeno