Spomenki z Krležom v Zagrebu

Došlo je i mojeh pet minut. Bil je vre cajt. Potlam morja soz i čemera jen grozd sreče. Da se on nie pripetil, ostavil bi ja Boga njegove čkomine. Samo si vi, gospon, z svoje čkomine zlato delajte. Nemam ja moči kak Job. Dobro da se nesem sfundal kak moja Rezika. Troje dece nam je vmerlo. Pepek z dva tedna, Julika z mesec dni, Francek z šest meseci. Ostal nam je Jankec, zadnje dete. V lepoga dečka je zrasel. Oženil se, dobil dete. Vericu. Lani je poginul v Krašiču. Partizani su ga zarobili i streljali. Rezika to ne mogla predurati. Četiri dni od vesti o Jankecove zmerti, ona se obesila.

Njejni brat Joža je bil podobne sudbe. Njemu su dva sina poginula kak domobrani četrdeset i druge. Mlajši je kak zarobljenik nosil partizanske ranjenike. Gda su ih Nemci stisnuli, partizani su zarobljenike postreljali. Jen domobran, koga su nastrelili, pretvaral se da je mertev. Dva dni se vlekel do svojeh. On je z špitala pisal svaku kak je njegov sin poginul. Joža se mam javil v ustaše da se zfanta. Tri kolajne je za svoju kuražu dobil. Ratni spomenznak je dobil za tri partizani. Red za zasluge si je prislužil za šest partizani. Zadnju kolajnu, Kolajnu poglavnika Ante Pavelića za hrabrost, zaslužil je tak da je tri fertalja vure plazil čez čret, ternje i koprive do partizanske linije. Od tam je mitraljez šišal po ustaši kaj su išli pomoči svoji dečki v Kostajnice. Sam je bil. Imel je četiri bombe i šmajser. Joža je došel do partizanske linije, pohital bombe. Kaj one nesu pobile, šmajser je. Njega je trefil partizan koteroga on ni dokončal. Živel je do špitala. Celo vreme je pripovedal kak je svojega Iveka zfantal z išče jedanajst partizani.

Ostali sme Verica, ja i Bara, Jožina žena. Velečasni Dombaj mi je pervi predložil da se Bara i ja oženime. Rekli su da žitek dalše mora iti, da se klaguvanju prepustiti ne smeme. Ja to Bare velim. Ona pak meni: »Naj bu tak«. I mi se oženili v jesen četrdeset i tretje. Verica nam je bila jedina podsnešica. Gospon Dombaj su se največ napili podbuđujuči nas na veselje. Barem desetkrat su rekli da zmerti v štrit veseli morame biti. Išče je sreča bila da je malo predi naša sneha Dora znovič zamuž štela iti. Nu, njejni mladenec, gerdi Franc, neče Vericu. Hoče svoju decu z Dorum imeti. Tak sme vsi mi srečni zišli – ja, Verica, Bara, gerdi Franc i Dora. Grozd naše sreče je rasti počel.

Zaprav, to prava, cela sreča išče nie bila. Bilo je dobro kaj sme Bara, Verica i ja skupa počeli živeti v listopadu, gda vsega je. Krumpera, graha, kuruze, šenice, repe, zelja, orehov, picekov, rac, puranov. Nu, zima bu duga, Bara špara i špara. Verica zmir nekaj betežna. Penez ne ga. Ja z svojum tišlarijum malo zaslužim. Gdo v ratu zida hižu da mu treba rušt, gdo menja vrata, treba novi stolec. I pintariju znam, nu i od nje ne ga prislužka. V pričetku grudena četrdeset i treče ja nosim tri brenkice v Zagreb na sejem. Lepo zrezbarene, na vsake horvatski gerb, hrastovo listje. Jena, najmenjša, imela je U. Jedino tu sem prodal. Ja kunem sreču, ona meni pošilja gospu z cipeliši. Trikrat je zpred mene prešla predi neg se vupala me stiha pitati hočem li cipeliše za nekaj masti, cvirkov, melje, jajec, bilo čega kaj se more v gubec desti. Cipeliši divotni, zimski, skor novi, al ženski. Ja gospe velim da vezda nič od jestvin nemam, al nje morem za tri dni donesti. Dam nje časnu reč, zakunem se na svoju decu da ju nem prevaril, nudim nje pol penez kaj sem za brenkicu dobil kak kaparu. Ona si premišljava, odide. Vendar je napokoncu došla nazaj. Da mi cipeliše, zeme peneze, prosi da ju ne vkanim. Ja se znovič zakunem. Za tri dneve ona je dobila kerpu špeka i deset jajec. Vsi mi zadovolni: ona kaj ju nis vkanil i kaj sem nje donesel nekaj kaj ju more barem tri dni prehraniti, ja pak zadovolen kaj sem nje pomogel, išče več, ja sem presrečen kajti vezda znam kak se i v ratu more ne le obstati neg i dobro prejti. Se razme, zel sem si flašicu meda i nekaj kostanja za svoj posel...

* * *

Tak sem ja vsaka tri dni v Zagreb na tergovinu pričel dohajati. Idem od hiže do hiže v jene vulice, od stana do stana v druge. Pitam imaju li kaj za menjati za jestvine, jemljem obleku, obuču, nakit. Donesem i za peneze. Porculan nečem čeprem je kitajski. Preveč lehko se potere na cugu. Kolajne ovakve i onakve nečem, zlike takaj, svečnjake, lampe, stolnjake, tepihe, beštek. Dalkoglede jemljem če nesu prevelki. Moral bi z koli dojti da odpeljam vse kaj su mi nudili. Punokrat su se ljudi plakali za ztvari kotere su z menum menjali. Malo daju, malo jemljeju nazaj. Muž bi, žena ne bi dala. V pričetku ja sem si zel del jestvin kaj bi od seljakov dobil za pojedinu stvar. Malo po malo, kak nas troje vse nesmo pojesti mogli, meni se v pelnice i na najže zbira grah, zelje, repa, špek, cvirki, sušena rebra, sernetina, zajčetina, veprovina, rakija, melja ovakva i onakva. Vezda imam vsega tulko da od seljakov iščem pol v nature, pol v penezi. Če gospoda nemaju stvari, ja im govorim da jemljem i peneze, al da je tedar vse dragovitejše. Se razme, oni ne bi dragovito šteli prejti i navek nekaj kaj se lehko zameni pronajdeju. Zlato, rečeme. Nigdo srečnejši od mene. Zlato vsa vrata odpira i vsa vusta. Zlato pomore i popu i žandaru da zatancaju kak ti hočeš.

Meni je najlepše z gosponom Krležom. Pravi gospon, ne po ajncugu neg po obhođenju i govorenju. Njegova milostiva je drugača priča. Nje se gli ne spomina z jenem seljakom. Pokaže se, pozdravi, nemre se reči, odide. Zato je Anica pri ruke za černu kavu. Tega je pri Krleže zmir bilo. Fineh cigaretlinov, fineh konjakov i černe kave. Veli da buju ležejše prez jela neg prez kave ili cigaretlina. Žganica šče kak-tak zameni konjaka, nu škija nikak nemre zameniti dunhilla. Ja gosponu Krleže velim: »Tu se slažem, a če treba, to i podmažem«. On se smejeju i zove me Kerempuh. Ja ne znam kaj im je to i ne pitam. Če se gospon knjigovnik smejeju, nemre biti da je pogerda. Em sme mi skoro pajdaši postali. Da ne bilo njegove milostive, vre bi mi skupa bratinstvo spili. Vražja baba!

Mi sme se največ o rečima spominali, kak se ovo, kak se ono veli, kaj ovo znači, kaj ono, je li ima kakova lepa poveda o letu, o dežđu, o babam, o pijancima, veselju. Ja jih pitam: »Kaj dojde potlam: Vsaka rit dojde na šekret?« Oni veliju pešice, ja, da, al ne; oni oblečena, ja da, al ne; oni sama samcata, ja da, al ne; oni če se vuputi, ja da, al ne; oni i če nje ne sila. Ja jim velim da tu imaju prav, čestitam, tak spametno se ni ja ne bi zmislil. Oni se smejeju, govoriju mi da sem Kerempuh, pitaju kaj točno dojde, a ja njim: »Če ima šekreta. Ne isto posel zbaviti v miru Božjemu zmed četiri zida i v trave gde te kopriva more podragati, a klop ti družbu pričeti delati«.

A kak su se le gospon knjigovnik smejali gda sem reč ferdučija spomenul! Vele da je ta reč žmahnejša neg je posel kaj ona oznamenuje. Zato ja njimi pučem: ferdučiti, ferdučec, ferdučni, ferdučica, ferdučenje, ferdučnjak, ferdučnjača, ferdukati, ferduckati, ferduckavo, ferduckanje. Ja govorim, cifram da bu žmajhnejše, obračam z jočmi, slinim – gospon Krleža se tak jako smeje da su njegova milostiva morala dojti da vidi kaj se događa. »Marča mi je ispričao jedan vic, draga«, veli njen Mirek. »Mogu li ga i ja čuti?« pitaju ona. »Prost je ko šlapa, Belice«, veliju gospon Krleža. »Onda vi samo budite i dalje u šlapama«, veliju milostiva serdito i odideju. Mi pak se smejeme i smejeme. »Da nije rata, ne bismo se mi tako smijali«, veli gospon Mirek gda sme prestali. Je, točno. Unda sme dugo čkomeli. »Al se zato mledeno plačeme«, velim potlam ja. Gospon Krleža se slažeju.

Gospon Krleža i ja sme tak lepo mudrijašili. Oni su jenkrat rekli da se mi kartame z rečmi. On tak veliju: »Nigdar ni tak bilo da ne bi nekak bilo, pa ni vezda ne bu da nam nekak ne bu. Sada ti nastavi«, veliju oni meni. Pomažuči si z njegovem francuskem konjakom, ja im na to odgovarjam: »Navek je tak bilo da je vsikak bilo pa i vezda bude če vsi ne polude«. Popivši jen dober gutljaj, on na to dodaje: »Zna biti tak i ovak. Če nesi bedak, unda je tak«. Ja jim pridodajem: »Vse je tak kak se zeme. Drek je gnoj, dežđ lepo vreme«. Tedar gospon Mirek nadalšaju: »Ideš z cipelcugom celoga žitka. On je lestor z cipeliši bitka«. Ja dobim novu kapljicu ter velim: »Kam god ideš, na isto dojdeš. I če ga pereš, zmir nosiš zmazani veš«. Unda gospon veliju: »Žitek je čušpajz, al čušpajz ne žitek. Ve ti budi zpameten. Če kaj veliš, mam si kvaren«. Ja nečem da njihova zadnja bude ter spuknem z glave: »Lehko je spameten biti. Težko je tu pamet spiti«. I tak se mi tekmime doklam nas milostiva Bela ne dojdeju poluknuti. Tedar ja znam kulko je vur i, Marča, lekmestu na cipelcug...

Mene Bara zna pitati je li moja tergovina poštena. »Je ti krivo kaj vsega imame?« pitam ja nju. Ne. Unda čkomi. Projde nekaj časa, ona veli da nekaj dame ovomu il onomu. »Vsi oni moreju v Zagreb iti. Nigdo im ne brani«, velim ja nje. Največ me raserdila gda mi je rekla da bi nekaj partizanima mogli dati. »Onemi kaj su tebi i meni sina vmorili!« velim nje ja i prekunem. »Zlo su naredili, al ovi drugi vekše zlo delaju. Z dneva v den, z leta v leto. Znaš da su Juru Skupnjaka v Jasenovec odpelali zato kaj mu se sin ne v domobrane povernul?« veli mi ona. Juru Skupnjaka, mega najbolšega pajdaša? Nemoguče. Vekšega poštenjaka od njega nema. Em je on duša celoga našega kraja. Skoro ni jeni svati nemreju prez njega prejti. Gde je kakova veselica, tu je Jura. Gde je sprevod, Jura govor derži če treba. Pomaže v telenju, v klanju, mesarenju, rušenju drev, v foringe. Nigdar nikaj ne računa. Posuja peneze, rudelje. Takov človek da bude kriv za nikaj. Nemre biti, nesme biti. A zažmirim ja gda Bara nekaj partizanim da za jesti...