Premišlanja o Descartesu

ČE JU ZANAVEK ZAGRLIM
(šumski adaggio)

Nema ništ čarobnejše od šume gda se otpira
Čez vrata od listja, kak kolaža od krep papera.
Nema ništ falejše od šumskoga zraka gda svira,
Čez frulicu od mahovine. Vu seni brilira.

Vsaki šumski flanec z bilikuma zemle kaple.
Z vreče od prapovesti kak glinene zdelice.
Đurđica, beladona, bunika kak otrov škraple
Čez zavinuti šumski strop gotičke kapelice.

Vse je kak vu živi špili z oblokima svetla.
Prevzel me tie šumski klanec. Gliboko vu njem’ raste
Črleno-beli, pufki šlafrok, muharina jetra.

Če šumu zanavek zagrlim i z nje zidem nova,
Polefko zmigolim z dreva larve ljubičaste,
Vu polnoč bum vam o semu hukala kak sova.

DELAJ KAJ TI VOLA VRIŠČE

Vu živlenju niste nikaj napravili
če se niste v reki i morju okupali goli.
I takaj ze sebe stepli 
perhotinje napornoga dana.
Zafalili se sami sebi
tak kak se fali božja hrana.
Nikaj niste napravili,
če se niste glasno kehelili,
bedarili kak jopci
z rokami jeli slasno.
Nikaj niste napravili
če se niste v grmju kušuvali skrivečki,
jodlali, hodali bosi, pili ležečki.

Če niste rekli ‒ baš me briga,
i hračnuli za se v gradski šaht vu kmici,
nosili naopak oblečenu majcu,
namignuli lepoj krčmarici.
Če niste glasno kričali na brege,
vriskali vu šumi od sreče kak voli.
Vse kaj i gospoda delaju poskrivečki,
to se nigdar ni vučilo vu školi.

Fletno mi reči kaj nosiš vu duši,
kakva kaštiga ti serce stišče.
Recept bum ti dala 
šteri sam vu sebi nosiš:
Delaj kaj ti vola taj čas vrišče!

DRUGAČNEJŠA

Lepi su cajti sprebrisani od dneva,
Išče gda je črna mačka bila breja.
Ftihnula je, čkomeča kak da je leva,
Zasuknula se vu se bleda kak preja.

Nit’ sama ne zna kaj je bilo prejdi,
Niti kaj se potem pripetiti moglo.
Nad njejnom korpom su bili ogledi,
Nigdo nie razmel kaj bi njoj pomoglo.

Ne razmeju ljudi vse ženske betege;
Žalost, narav, soze, kak da je vu reštu
Ona šteroj znamen vezuvle zaprege.
Nije bila ista kak i druge mati.
Negdo je pripravil veselicu, feštu.
Zdehnula je on den gda su bili svati.

GDA SMO V PLEISTOCENU BILI

Kaj si ono pital,
Di smo vščera rasli?
Med paprati i travom
Sam prah smo bili.

Naš se pepel skital,
Di mamuti su pasli.
Fosili med naravom,
Divli konji i reptili.

Kaj si mi povedal?
Ve ne znam ni sama.
Od rike nisem čula,
Nosorog se glasal.

Divovska pragoveda,
Los i daber z nama.
Vučica se zula,
Kit je mam nabasal.

Kaj smo onda našli?
Na nas su tam opali,
Velki mlečni zubi.
Vunasti je mamut,

Z klovami kak z rašli,
Novi svet razgalil.
Tri put je zatrubil,
I slekel svoj kaput.1)

GDA ZE SERCA KAPLEJU SVETKI

Naj me nigdar od sebe terati
kaj ti hrpta moram obrnoti.
Vse je lefko gda smo si dobri.
Najtežeše je gda z grobja se vrnem,
z onoga v tebi ‒ vu nekaj bolše.
Z luknje vu sercu kapleju svetki.

Naj me terati da roku odmeknem.
Došli su za nas žalosni petki,
tak sivi i grenki, dnevi brez žitka.
Če lasi počešlam, gda čelo doteknem, 
slani se znoj zleva ‒ nit kapi dobitka.
Vu tej igri rieči od zreloga grozdja
zrušiju se do vcikjenoga vina ‒
ni važno gdo je glavnu reč zagrabil,
nek gdo za nas dosti sreče ima.

Naj me terati da zutra odidem.
Steza bu za menum komaj ostala.
Naj misliti da bu kak da nikaj ni bilo.
Jen pramen mraza bu išče visel,
na čelu med šiškami kak ledeni glečer.
Kak puknuta vaza, kak propala večer,
vu stekleni kupici železni metki.
Z rupe vu sercu kapleju svetki.

NAJLEPŠE JE GDA SMO V PARU

Ne znam vam nikak zreči 
zakaj volimo živet vu paru.
I zakaj su nam parni broji
tak zaokruženo lepi.
Če si čist sam i jeden ‒
nekva žalost te oblepi.

I pes je bolši gda smo sami:
privrženec, topli jopec,
branitel i vunbacitel,
druželubec, štap za slepce,
mehki medek, slušna sprava,
prijatel za stihoklepce.

Najlepše je gda smo v paru:
kak dve ribe, kak dva vrapca,
dva kotača, dve pedale.
Na guvernal gda se sednem,
ti me pelaš kak od šale.

Kak dva mačka, kad dve cigle,
dve kupice i dve rigle,
dva cimera i dva pola,
kakti slikar z lepom ženom
i kak Maja ‒ čistam gola.

PREMIŠLANJA O DESCARTESU

Če bi se odrekla vsega
kaj sem se do ve nafčila,
istinu bi vidla z drugog kraja.

Oblaki bi mi bili sivejši 
dnevi težejši, oceani plitkejši
strah i žalost glibokejši.

Samo je jeno navek mi drago ‒
to kaj imam kre sebe decu:
deca su vsega sveta blago.

PRVE ČREŠNJE

Vidla sem železničara
kak biciklina tera.
Ajzenban je bil otpozadi,
a krčma otprta još od vščera.
V jeni je roki nosil granu
ze zelenim listjem
komaj ftrgnutu, nepobranu,
z črešnjama črlenim,
za damu herc v nameni.
Prve su!
Jenoga gemišta mi natoči!
Čez oblok je krčmarici mahal
i zobal dva serca z njejnih joči.

VUSKRSNUČE ČEZ RIEČI

Zdigni me zdigni, razmi me razmi,
Vu našemu kraju rieč našu znamo.
Kajkavski rečnik ni bormeš prazni,
Hajdi rieči ima, vre otpri ga samo.

Napiši jenu knjigu (kak da zlato bigaš),
Od kajkavskih rieči mi serce tanca.
Ne mora biti velka kak Codexgigas,
Naj bu cartna, fina, z puno glanca.

Posluhni me, posluhni, vuskrsni slovo,
Zacajhaj vse kaj misliš, zmisli, dodaj,
Preslikaj glas od starcov, ščipni nekaj novo.
Novim naraštajima lubav za KAJ prodaj.

Vse se menja, meša, i cajti pred nami.
Ne pozabi na staru škrinju od fščera!
Garestin i Agram nisu pentagrami,
Med nami još šepeče kontesa Nera!2)

ŽIVLENJE JE CEDULA NA ŠTACUNU

Večput smo si sami krivi
za se grdo kaj nam se dogaja.
Ne stignemo biti dobri
kuliko bi prafzapraf šteli.
Toti krimen si saki sam zakeli.

Vse ono liepo prelehko odleti,
vreme je ciferšlus šteri se zapira.
Negda stane pri samom početku, 
negda se prefletno pošklizne
do stoletnoga mira.

Živlenje je cedula na štacunu
šteru bu samo Bog obrnul,
i unda bu zanavek pisalo:
Zaprto, vlasnik se ne bu vrnul...



____________________

1) Na području sjeverozapadne Hrvatske (Hrvatsko zagorje i Podravina), pronađeni su fosilni ostaci vunastog i stepskog mamuta, između ostaloga i iznimno rijetki mliječni zubi vunastog mamuta.

2) Codexgigas – engl. Giantbook je rukopis nastao početkom 13. stoljeća u benediktinskom samostanu u selu Podlažice (Češka). Zadnje godine Tridesetogodišnjeg rata (1648.) zaplijenila ju je švedska vojska i danas se nalazi u švedskoj nacionalnoj knjižnici u Stockholmu. Poznata je pod nazivom »vražja Biblija« zbog velike ilustracije vraga unutar knjige. (Op. a.)