Reč je moja vrčak

REČ JE MOJA VRČAK

reč je moja vrčak
kej ga treba saditi sejati okapati opleti jogrinati rezati cepiti brati
samo da bi bil reč
reč je moja vrčak
za v lonec hititi če baš ničesa drugoga ni komačeca ne
če betvo zelenila
da mi moju glad narani
z slanem
z slatkem
z kiselim
z grkem

reč je moja vrčak
za skuvati toploga za popiti
za sapiti
za umšlag na bolno telo jel na dušu deti
za zeprati joči
za otprti joči
za namazati lice z pomada otprtu ranu i otirati smrade
da mi se to zaceli

reč je moj vrčak
za malo farbe v život kmični vlesti
i deske podne zažuteš da ti se čini kej da se sunce razlejalo
pometati al ne zametati prek
tulko tek da je lepotu
kej lepotu znati videti
čuti kak čela cvetju krune dela jel kak se negde v grana čelec roji
jel tič zakrešči svetlo zove
reč je moja vrčak
če za niš za gledeti črez jobluk
če i niš ne cvete
nekam daleko de ni videti se ne
jel de to diši
kej to za jeno diši tak da mi ne da spati
celu noč čujem i v kmice kej v cvetniku čubim
gledim mislim
kej se plave a kej beli a kej se zeleni zeleni

____________________
pomade, kozmetična krema ‒ naranit, nahraniti ‒ čubim, čubeti, beskorisno, ravnodušno gubiti vrijeme; ništa ne raditi

ZDALKA

bole je gledeti zdalka
kej ti fali
mejne toga moreš videti
a gda mejne vidiš još ti mejne i fali
mejne si onda i misliš

a navek i sebe samomu moreš povedati da nesi dobro zagledal
a niko te ne bu ni pital kam si kvragu gledel

MORA

prilegneš me kej
mora
i kak bi ja onda mogla
lepo
sejnati

KAK NE RAZMEM

kak ne razmem
reči reči nemrem reči
a nemrem ni pregutnuti
ne razmem kak ne razmem

ne razmem nikak ne razmem
kej mi je to kej sem celi život čitala i celi život pisala
ne do reči (lepo su složene kej bi to) ne to kej ne bi znala kej očeju povedati
i moderne i arhaične i prepisane i vulične i neologizmi i kojekej takvoga
reči kej reči
al tak kak su složene valda sem bedasta zaostala
morti to i ne za čitajne
al kej bum gda je solar rekel i ja se toga držim
da nemrem o nečemu govoriti če ne prečitam

al ne razmem ja ni kritiku kej je (ak več je) napisana o tomu bog mi je svedok
čitam valda se po trejti put
jel fali jel veli da ne vala
kej da je speval još jen tekstuš pak o ničem
da ne znam v koje je stranke bome ne bi znala jel se vlasti miti jel ju špota
da ne znam kak su mu dali tri-četiri nagrade
i još peneze i medalju i venec

ne velim reči kej je naslagal jenu do druge (i puno je to reči)
tak su lepe da bi si najrajše saku mam doma zela
da ju v svoju pesmu metnem
ni ne vsudim se bome ni olovku zeti ni leptopom raspreti
idem još jemput prečitati pak mi se bu morti presvetilo
kej pesnik oče povedati
kej kritičar oče povedati
v koji kaslin oče pesmu deti
gdagda si mislim kak to mora biti test za nas kej drugo
da se neko zmed nas kej nam je na svetu največ do poezije stalo
lepo javi i pove kak niš ne razme kej je te pesnik štel povedati
al de bi vraga
si bi mu mam primetnuli kak je bedak kak niš ne razme
najmejne te novi stil te novi jezik te novi kej veli smisao

PEPELNICA

zima pribira pepel spod peči
vuglejne je tak vruče samo kej se ne zapali
more saki čas
vužgati se
gda ga meče v pletaru pletaru od čel

onda najprvo z čadžami i z pepelom naliči mladu žensku
onda i staru i koja se več najde pri hiži
poseje pepel po celomu dvorišču
i po brazde kej su ju nadužili
skroz od putne lese do hiže pak se do štale i za štalu
kej nesu dobili mam piti

ne niš kej nam je to zagrnuti
niko se ne srdi
z pepela bu trava bole rasla a gamad zgasla

se se crni da se drugo more biti samo mejne crno
a i čovek se more setiti da je niš drugo neg pepel

____________________
pepelnica – pepelnica, čista srijeda dan poslije fašnika, početak korizme, simbol pokore

MI DVE

a de mi sad jesmo spitavaš
i pak si najemput popitala
baš
kak da ti povem a da bi ti znala de
ne mi ni za povedati
a pak bole da velim
zapoved osma ne da lagati
a ne znam ni kak bi ti povedati
gda smo kej zamenile mesta
i kej da sem ja mater a ti dete
kak si me negda več nekomu prectavila
a ti se ni toga ne sečaš

SPAVAČA

sekej se toga i samo na speč more nasejnati
al sejeno gda si ležem
najmilneše mi je spati da si zamišlam
da mi je pod vankušom spavača
kej mi je
gda sem još bila prek malička
i mora mi ne dala spati
če sem i kulko andželov čuvarov zmolila se napoprek
i imela još svoj vankušek nakukek
mater pod vankuš metala
spavaču z divje šipkovače
kej denes niko i ne zna kej to je
ni ja ne znam jel opče još raste na pesje rože Rosa canina L.
i de bi to čovek još opče mogel iskati
a če ju ni onda ne bi nigde mogla najti
bi mi v ruku mej prsti podela lasi da ji delam frčke
nažmereč
i mam bi zaspala
jel bi sebe delala frčke na svojemi lasi
tak bi spala da sem se v sejne kakve grde
znala i popišati
kej v kakve priče
od straha gda bi mi mora prisela na prsa

kulko te kojekakve v seh farbi des spregutnem
skorom opče ni ne sejnam
nigda ni na pamet im jel sem sejnala ikej jel nikej
lecam se jedino gda vodu veliku sejnam mutnu i blatnu
kej su negda govorili da bu bolest pri hiži
gdagda sejnam sneg žut čistom kej stari paper

najmejne se toga more nasejnati na speč

____________________
spavača, ovdje: nametnik s pasje ruže; spavaćica, odjeća za spavanje ‒ vankušek, jastučić

FRČKI

ti mene za ruku držiš
i ja si nekak samo mislim
(ne mi to lepo ni za misliti)
jel znaš da sem to ja
kej pupkovina su naše ruke
(si mislim kak ne znaš ni kej je pupkovina ni kej su ruke)
i oču ti frčke delati a ti veliš
naj mi pipati lasi
a gda sem bila mala
gda mi se spati štelo
z prsti sem ti v lasi
frčke delala
potle sebe same

a još potle gda se malomu mojemu štelo spati
z prsteki mi je v lasi isto frčke delal
male frčke
zamišlene
a ja bi mu pripovedala o bicku praščiču
kak je v cirkus išel
kak smo i nas četiri išli v moiru orfei

niko mi več dugo ne frčke delal
(nit sem komu ja)
i se si mislim da ni ne bu
tak skorom
kej da nesmo pospani

____________________
frčke delati, frčkati kosu ‒ pipati lasi, dirati, gladiti (kosu) ‒ skorom, uskoro; umalo

DIJANOVEC

šesti peron za novsku na glavnom kolodvoru saki put
(morti i des)
jemput če dvaput če još koji put na leto ide se v kupuvinu
dete raste a svetki idu
kupuvali smo za školu knige čim bi zišle
za novi razred nove cipele borovo*
za kumstvo lanček jel narukvicu z priveski zlatne
čižmice za zimu sandale za leto fiskulturne gače
ak je bilo penez
(sreča su v dipu tate davali plavo radničko odelo a mame kutu)
ja bi ošla potle škole a mama ravno z prve smene
na vlak
si se ponovila bi govorili
daj brzo pokupuj čim više moreš za čim mejne penez
a puno ni nemaš de bi zel
ak bi dospele pojesti viršlin z kruvom jel salame najjeftineše somerice špekarice
sake jeno pet dek
prisele bi si na zrinjevcu i poštrmlale
ne nam ni bilo do jela
komaj smo torbe i pakete vlekle
pak na vlak zajni za nazaj v pol noči

i jemput smo zaspale
trudne zmučene i vesele ko ne bi bil
i najemput smo se zbudile
tu smo
i bež dole po štenga
ze semi torbi i paketi

i gda smo su prtljagu snele dole
vidimo mi dijanovec de se vlaki krajcaju
do našega novoselca još je i širinec
(tu se zrodil badalič gda cuga još ni bilo)
a fučka železničar bog dragi da vlak pe dale
a mi brže bole pak po visoke drvene štengi gore
z temi semi torbi i paketi nazaj
dej se žuri božo jebal ga vrag dej se žuri bumo ostale
i nekak smo dospele ni same nesmo znale kak
ze semi temi paketi

a kej bi da nesmo
mama se rasplakala da kej bi naredile da nesmo dospele nazaj na vlak
nikoga tu ne poznamo a tulka noč
kej bi po štreke pešice išle domom šliper po šliper
a ja sem se smejala kej bedak
bole neg da smo se na speč prevezle prek v novsku
kej je to još dale
bar bi se lepo naspale
(vrag zna v kulko bi vur valda negda pred jutro vlak tam dofučkal
tak stoječ na sake stanice
a kulko jih je)

a se ti je vu tom jel si v dijanovcu dospel ziti na vlak jel nesi

____________________
novska, mjesto u Slavoniji, željezničko čvorište ‒ za novi razred nove cipele borovo*, reklamni slogan za relativno jeftinu i šuroko prihvaćenu obuću kombinata Borovo iz socijalističkih vremena ‒ viršlin, hrenovka, kobasica ‒ somerica, špekarica, vrste običnih salama ‒ dijanovec, novoselec, širinec, mjesta u Moslavini, željezničke stanice ‒ badalić, Josip Badalić (Deanovec, 1888. – Križ, 1985.), hrvatski slavist i književni povjesničar ‒ komaj, jedva ‒ vrag zna, tko zna ‒ štreka, pruga ‒ šliperi, pružni drveni pragovi za koje su pričvršćene željezne tračnice, šine

KURTASTI PES

i kurtasti pesek
maše z repom
samo da mu niko ne bu niš
samo mu z tem more misli si bogec biti bole

kurtasti pesek
i mene maše z repom
mi se mili
mi se miti

ne moraš peso mahati
nem ti ja niš
kej si se na me nameril
niš ti ja nem
mu govorim
a on maše samo maše
kej da ima celi rep

____________________
kurtasti, bezrepi, djelomice ili posve odrezana repa