Betežlivo morje

BETEŽLIVO MOJE MORJE

Za ftrči se od cukora i betege ofnati
ne nucaš nekšo stezo, ne zmetaš snega z
pota niti ftiče z plota
Ne močiš se z protokolom niti z partvišom za
luknje, betežlivo moje morje,
južina te kople
Kak se kažeš, betežno i hrđovo, vidim kaj
sikakše trdojnke i fruge z sobom
nušeš
Cukor ti v zobima štrpče, sakojački
roki mam leso tpira
Dej se mo zmekni kaj te ne zaguti, prosim
te kak Boga, betežna morska
glava
Stepi se vu pesjem trucu, flučni vun i
kikle i cojnke i
cukoraste koščice v skuminaj nabrane
Da si najdeš jempot jasno stezo, pota v
snego, Boga v gilomo sveto:
vupri se, morje, v betežne roke, vupri se v
svoje boge noge!

ČI ME PREPUSTIJO

Jimi so obloki čistam gori, jedino tam
i more takšo glažovije cvesti
Što bo splezil, što bo se naluknul, što bo
frjokulo porinul
Gori se glažovije napuhovle, gori se gospodski
spomina, ne pušča se ron
sakojački tikveš k coj, sam fina tintara
Sam prebrana ščova za
pajceke v cekaraj
Pem glet či me prepustijo pesji gopci, gospodi
nikaj na škodo
Sam bi im štel stiha povedati kaj jim se čez
oči išče navek
prek vidi

FTUNOTI

Babe zletele vun z hiži kaj stekle
Što jih je vučil tak svetski ponorevati
Babe na gruntima, saka na se štiri
Kam vas vrag nese, preklete copernice
Nazaj nuter v te vaše koce,
Mam
Babe posluhnole strajnskoga glasa kak Boga
Nafčene na špotancijo i točo po hrpto
Niti jena kaj bi pitala što jih je natiral
Ti bogara i babama
Ve da se z menom kak z mojim detetom spomina
Da me moči flučnoti v oko i stoti na
Nogo
Koga glumijo, stare napuhane kokoši
Išče lefko moja požrta zemla nekoga pogotne
Kak da so si ne več pot sam’ to želele
Jeso, sto mi bogi, čula sem jih z grunta
Što si nej denes želio kaj jempot sam v zemlo
Ftune
Bez kriča, bez soze, ne mora nišči videti
Sam’ ja moram polek biti i gledeti
Pomori, Bože, prebrni, zdigni, prevzemi
Jer me to išče najbole ftrgne
Znaš, z mene si jih zel i z mene del,
Bokce sirmaške

GAJNK

Bogečko seme vmorilo samo sebe.
Da je zbeglo v sebe, da si išče zelo
vrieme,
zaprav bi se mam vmorilo: sebe, ron tak
tekute okoli.
Da mi stara mati kmica v kmični jarem
zobe stegla,
vmorilo se ti vu meni i zadje
drobno
seme.
Da so reči-foringaši suknole čez
kmico v gajnko,
zagrmil je
gajnk
i
deca
z črne meje.
»Nejte zameriti, namugali so me prek meje...«
»Bogec dragi, kaj tebe pak ophaja?«

HIČENI V KIŠTICE

Sto i jena žareča kmica v kištici se
preobrača
Sama sebe bi najrajši za rep prijela
Te se igra zdušno z falačkom pameti, te
štrpče kak jopica zmešana i
sama
Sto i jena žareča kmica zdaj vogla
cigaretlina frče
Topli veter med živlenjem pote nadigavle,
karte ji kak hižice rasteple
Kmica ne zna jafkati i tuliti se kak
posrano dete
Pak sejeno ponorevle, ne bu zbegla z sebe
nigdar vun
Naj ponorevle, moči itekak bežati vu
falačku svoje kištice i svojega fajnoga
drobnoga sveta
Po pravici i Bogu, živeli sosedi
pohitani v kištice i v dišeče kmice!

KRMEŽLIVIMA

Do živlenja v gačaj stati i čakati
Vupajte, ne meknite se mam z mesta, ne
strahom biti
Vanjkoši bojo se vužgali, ne meknite se mam z
mesta
Živlenje zatuli, noket vdrapi i zasmodi se:
amen meša
Što se ne rezbudi, naj se niti ne mekuvle
Špigli so pripravleni, krmežlivcima zašvasani
So to deca pospana, z bebicaj išče v
rokaj, do fčera bečala so pa
cecala
Živlenje z lancima zaruži
Bešte, deca, ide krampus!

MEĐIMURJE NAKLOJENO

Ti si meni po sredini srca
kak v črleni jabuki koščica...
Zmisliti se itak v jenomo dežđo, v
pamet zeti podrto nebo i kup zrja
zružđenoga, i reč i korboča
Pa se zmisliti mam seh dnevi pod soncima i
duhama, s klopcima i mlečecima
de god se obrneš
Misel zadiši, dete se nutri zanuše
Za šancom negdašnja gosta citra vu vodi
zažlaburi, kre postele pak
mamičina popevka
Kak žibeki se nabirajo štrptave slike, tople i
drfteče kaj te zapeče i nešči jih na saku sozo
sklada, tuliko kaj ti grunt međimurski ves
pred očima zraste
Zdelana je roka kaj ga v senjaj otpira
da mu stiha z kota široka dohaja
I v brežno ga brne i v ravno med
jalše, v zeleno i megleno, žoto kak
trnoslek
***
Međimurje, kak si lepo sklajeno,
z trde si nas zemle buoge zrodilo
Med trsjem i med klasjem v krilo hranilo,
z Muricom i Dravicom nas zibalo

NEDOSENJANA

Pehnola si i ciglovlje se po senjama
rasteplo
Grlice so prhnole, strehe pod vusnicaj
sprhnole i v medo se rezišle
Sonce je ne dopovedalo da ti je čez
lasi cvelo i senje stiha pobiralo
I jenga si zapahnola
Fkajena, reč je steška gori plezila, dnevo po
hrpto i po hrđavomo žlebo
Neje te fehtala, sam je plezila
Podehovala i plezila; zvezde gori prosila
Strah ji fčasi glasa zel
Nedosenjano mi te sonce podelo,
fijolica meglena

PRESEDA MI

Stol zmočeni od obeda, z deske me črvi
gledijo
Frčejo se kaj v kinderbeto, sirmaški
žrmlači lačni, a prej obedovali so
I rajnglice sprehičene doli i poscaliga po
njimi blodi; išče smo
mladi i šteli bi zrasti
Preseda mi mrzlina, negdašnja
mefka šlinga,
trešjena v nove vode i trešjena v nove
pote
tuliko kaj ti ftičeki skup z zrjem jenga po
jenga
prste mam poščukajo

PROŠECIJA

Po hrptiščo se prašijo krastavi poti
Krastavi poti prašijo se po hrptiščo
Z postele zišli mužikaši v kričo
Z postele se genoli japica z količom
Za jimi pak sosede širše kak kombajni
Z lampaj gori mlačno nebo šmirglajo
Musava deca odzadi maršerajo
Strašila suha gingavo se vlečejo
I maškori zaružili pijani kaj drevo
Pikači i lafre i sprevodna prošecija
Kak da ga sonca i zraka i zemle ne
Lohnit odišli v tuste plehe i Bogu v kupice glet

ŠKATLICE

Igra se morje z škatlicaj. Onak z
zmazani rokaj premeče jih, kupča: cifraste,
temne, svetle, bleščeče. Te jih otpira, te jih
zapira. Škrebečejo, šumijo. Z kupa curijo.
Da se štera otpre, čopleki lečeju ž nje vun.
Zujijo kaj čmelice, kepeci mali, hopšejo,
skačejo, nuter-vun.
Što jih zdalka gledi, srce mu ž jimi
igra: sončeka mala navijena, tak ste kaj
cukoreki.
Jen pak se neverovani Tomaš pomali
prigne i vu ti kup nosa porine:
da ti sto bogi, smo to bormeš mi,
bokci bistrički, splašeni, razbežani,
v kot stirani,
hiže so nam od neba čistam podrte,
pomorite,
glave so nam od toče čistam potrte!

ŠKREBLICA SI ZOBE BRUSI

Z žepa je scurela kipteča jezikova juha,
škreblica si zobe brusi.
Muškatlini na obloko knedlina pogutnoli.
Z žepa scurela i futrana mrzlina, i
escajg se razbežal. Kuhnja skričala pa se za
jezik vgrizla.
Škreblica notesa prelistala, zobe nastajila i
zevle.
Da je z žepa i najmenjša pikuša krivo
zamrčala, škreblica na posel.
Celoga koca stiha na raport dela.

VRAGOV TRČEK

Zadje dneve prebrača znucani
svet
Tiha mo voda brege gloda, kaj loboda
pukajo se hurmastoče
Žmefka voda, od sprevoda globoka,
grunta mu gota, grunta mu
sprevoja
Pozdravlajo se dvorišča, meje Bog sam
fkraj hiče
Da jo mesec hrani, voda v miro ide
Da zabrenza, svet se stepe
Trček, škramplin, trdi črni zob
Nikak prejti, scepati ga sam tak
ne moči, niti spuči
Vrieme se zahliknolo, grunti mater kunejo
Trčko pak nič
Što ga je podel, naj se ve dokaže

ZA KRMONOM

Grmi v bereko, nešči se nutri ženi.
Čez otprti blok posluša hrmok: dugo
spiš, dugo spiš – vu vuhi mo se direktivi
gotijo i glasi tulijo.
Ve se stani, ve se hmij, ve se bleči – zija
ftič. Perje ga fkanilo.
Za krmonom štrpče črna strela, črna
kikla ji se za zobe zadela.
Bokce gledi čez luknjice v živlenjo, oni pa se
gjetejo. Dečica zletana, strelala bi pa klela.
Za krmonom črna misel podehovle. Kepec
komandera, misel podehovle.
V bereko gostuvanje vetre zdiglo, strela
fčehne, mužika ftihnola.
Direktivi se vu vuhi gotijo, glasi tulijo.
Za krmonom se črni čkomina.

ZAHLIKNI SE

Fčehni. Flisni. Zgor te vrhje hoče.
Fčehni po trubenti i po puklavi čkomi, fčehni.
Flapi. Tak.
Ve vidiš kak se gulinje tulilo da si v
bregima Boga za bradu skublo. Dežica je
prehičena, ali se vrhje išče gori smeje.
No, sam fčehni! Duhe se naječ. Lepša i
tusteša nemre biti kak je je.
Tak.
A ve pak se zahlikni kak gut moreš.
Gulinje te se nemre fčakati, cvili,
spituvle. Zabadav ti i dvor i plot i drot
za v žilu zabiti.
Krej ne moči oditi.