Kam sme to opali?

KAJ TI VREDI BLAGE

Zabranjena je hrana tera se nahaja na stolu vsih nas, i navek sme vu napasti da ju kušame. Kaj ti vredi vse te blage, tere tak brzo odhaja kak sunce izhaja, i sunce ishaja i mesec zahaja, kaj ti hasne blage, srebre, ino zlate, ak dušu tvoju ti pogubiš zate. Tajna je da se od opstanka požnje najvekša plodnost. Najvekši užitek zove se opasne živeti. Gradite svoje grade na Vezuvima, šiljajte svoje brode vu neistražena morja. Živite vu ratu z vama jednakima i ze samima sobom, te je zakon živlenja.

Spomeni se vezda, o krščeni človek, kak fletno dohaja tvega žitka konec! Naj hitati senu na velike ime tvoje familije. Tvoji pretki su se navek znali obdržati i na kopnu, i na vode. Česte krat buš zazaval Boga i majku vu pomoč. Ar se je vu tebi ‒ nemir, sreča i bol, se je put vu raj, naveščenje raja dok se ne vupitaš o svojemu poslanju na ove zemlje. ‒ Ja nejdem nikam, tuj bum ostal, tuj nek vumrem, tuj bum i ove svoje stiheke ostavil. I nek se zna da tu je pesmu spravil jeden mladi junak v palače plačuči preželjene tugujuči. Kaj mi hasni mladost, gda me oblada žalost. ‒ Jena strast nek te vodi, strast za daljinami, za daljinami brez granice.Tam buš našel skrovite predele vlastituga detinjstva. Prosvetljenje je neumorni putnik teri stupa brže saki dan i lehke ti pobegne ak ga ne slediš.

Ne veš još ti vu kakvem sme živlenju mi. Ove ni podneblje za prave veselje, tu vlada mertučljivost. To je zdiganje i spuščanje, Arza i Teza. Z nebem se poistovečuje radost, hitrina, veselost, a ovdi vladaju ozbiljnost i žalost. Tak zgledi sam črni pekel. Tak gusto vu pekel curiju duše, kak vu najvekše zime najgusteši sneg cureti more. Kam sme te vu zemlju opali? Jauk je totem vu zalasku pod zemlu. Jauki povedaju ob smerti tera je kčer rojena z braka majskoga kralja i kraljice. Duše vumrlih očite ne težiju povratku na ovu zemlu. Junak se priseča detinjstva, nostalgična je te neurastenija. Zgledi da same junaki su mrtveci. ‒ Kakva je razlika izmed duše prokletega človeka, duše junaka i duše paluga angela? ‒ Nikakva, sa tri buju završili vu carstvu tere odgovarja peklu. Togu su mi hitili prek glave, kopertu neveste pokojnika, a kača mi veli: sad buš postal kral, ti teri si postal Bog pod zemlu. Laisser faire, laissez passer ‒ pustite sakoga naj dela kaj hoče.

PREMISLI PEKLA MUKE

Vu peklu vragi neizmerne muke trpiju i grešnike vsakim načinom muče, a drugi ovde dan i noč ophađaju iščuč da bi koga na greh napeljali i vu muke peklenske dopeljali. Oh Bože troši se i kruni moj žitek z himbami i čalarnostimi. Oh Bože smiluj se, jer je smrti vrieme listor dušu moju v tvoju milost primi. Bum premislil pekla muke da ne dojdem vragom v ruke. Grešniki su poraženi i vu peklu vodiju živlenje kakve zaslužuju. Bežte, bežte grešne duše! Naj mi majka jalna biti, ake hočeš z pekla ziti, saka duša raja želi, kak i tvoja meni veli.

Sam sobu premisli kam su poglavniki, krali i cesari ino mudri ljudi, teri su na svetu blagem i razumem, z poštenjem i z diku liepe precvitali, tam su prez blaga morali vsi pojti, ni jednoga ta smrt nie hotela vun zeti. I kaj ti vredi vse te blage? Oh ti tele pregrešne kaj si se umrtvile od večera pak do svita blaga sem ostavil. Gde su zdaj moje palače široke zidane, gde su turni z mramora zrezani? Vonjba pako koja pekel puni zhaja listor iz grehov kojem obilnejše jesu podvrženi oni kaj vu bogactvu i vu svecke nasladnosti živlenje pelaju.

Gostite se i opijete se ar po smrti toga več činiti ne budete mogli. Veselte se v praznosti i spunjavete naslednosti. Ječme i pijme denes jer več zutra morti ne budeme živi. Mi se pak hočeme z mužiku i z pesmu zabavljati i z gizdavemi opravami cifrati, pak kralevstve nebeske zadobiti i dušne zveličenje poiskati. Mi nesme pijanci lakomci gizdavci koji dan i noč druge ne delaju i ne misle niti se za druge ne skrbe neg kak bi mogli svojemu grlu i želucu vugoditi izebranimi vini i jestvinami. Za grehe naše hočeme zadovoljščinu vučiniti, dobrovoljne na ovem svetu, podnašajuč nevolje, betege, siromaštve, nesreče, krivice, sile, špot ogovor i druge suprotivčine.

JE LI ME LJUBIŠ?

Kad se koj mladenec zavsema jake vu jednu devojku zaljubi, nikaj mu se teške ne vidi za nje volju včiniti. Jedna kčer neposlušna i svecka veselja nasledujuči tera vekšim taljem dneva svojeh vu tancah i norijah vu igrah i vu hman pajdaštvu trošila je druge vu tanec dotikajuč mazne i ljubljene razgovore z njimi čineč i druga znamenja ljubavi davajuč. ‒ Je li me ljubiš? ‒ Zastanovite da te jake ljubim. ‒ Ali kulike me ljubiš? ‒ Več neg telo moje i več neg srce moje. Bele je grade pometala, nutri su lepe igrali, drobne su lepe tancali. Črnu je kavu kuhala, žuhku ju je srkala. Onda lotre i vse ki su telovne naslednosti ljubili budu z goručom smolom i z vonjučem žveplom polevali.

Prav je budi, te je iskala. Te je vražja meštrija ar je z vragom pogodbu fčinila, da vu drugem zbudi ljubav prama sebe, a vidime da takvi ljubitelji nemaju sreče. Ar kaj goder je od vraga, one rade pu vragu ide. Negda nekoji pu takve coprije omamljeni, tak su se ljubili da jeden prez drugoga nie mogel živeti. Ake se jednomu da kaj pojesti, ali popiti, da koga ljubi ali kaj druge činiti, mora li takev na ove privoleti? ‒ Akoprem vrag vnogo zla more zrukovati, zmešajuč telovna čutenja, ne mora vendar volju tak primorati da bi se takev ne mogel greha čuvati. I da bi zavsem moral, tak ne bi grešil, ar prez volje greha ni.

Borim se z mačem i nis navčen bežanju. Morame misliti kak bi svoje dele mogli proti sakoj zlobi i nemarnosti pustaviti. Oni se pak hočeju z mužiku i z pesmu zabavljatii z gizdavemi opravami cifrati, pak z našu kulturu kralevstve nebeske zadobiti i dušne zveličenje poiskati.Vnogo mene takvi skrbe. Ake želi človek srečen biti, iskati navuk treba od povoja pak du groba. Nesmo mi pijanci, lakomci, gizdavci koji dan i noč druge ne delaju i ne misle, niti se za druge ne brigaju, neg kak bi mogli svojemu požeroku i želucu vugoditi zebranemi vini i jestvinami. ‒ Ponavlaj za menu: Same oni ki su z nami spremni se po dobru pariti ti i takovi mogu se za krščenike deržati i imenuvati. Kad ljudi ne bi imeli duha, bili bi kak mravci grube jednaki (rough equal). – Wright ‒ je človek kak kompleks mogučnosti. Človek je sloboden, ali i odgovoren za svoje čine.

MOČ HENRIKOVA

Zdaj se vidi da je moč Henrikova bila same pleva na vetru. Gda je na smrt obtežal neje se hotel spovedati niti požaluvati niti druge svete sakramente prijeti. Ovak je vu zadnje vure zanemeli nut onda zvrhu vsega ufanja milošča božja ga je obstrla pak je pravične za vse grehe iz ljubavi božje požaluval iak prem neje mogel govuriti vendar žuhke plačuč suzami je svoj obraz polejal i vu takvem požaluvanju svoj žitek je dokončal i vumrl. Unda je po pravičnem sudcu božanskem dan dvem najhujšem vragem da ga uvak z kopljem železnem do sudnjega dana neprestance muče i prebadaju.

Čuj! Zaklepetala su krila goloba, te je hudi znak. Strah me obišel, znoj mi izbija na prste, ali ja odustal ne bum. One kaj se zgodile davne ostale je očite vu mojem sečanju vu moje podsvesti. ‒Jesam li ja vu tvojej podsvesti? ‒ Ne! Zapraf, ti si stvarnost, ti nesi san, ti moraš ostati vuz mene, naša ljubav nas more spasiti. Je! Ja ti verujem. Srca su naša vujedne svemiri, vujedne tihi skrovni zakutek, a ljubav i smrt su jedne te iste. Življenje posle smrti i ljubav predi življenja. ‒ Pusti, totu povest su zmislili neurstenični pesniki. ‒ Ti ju moraš ostaviti. ‒ Ak ju zdaj ostavim, ak zdaj nestane moja duša bude zmlevena vu ništavile.

Gda sem bil vu vodu hičen, opčutil jesem smrtne stiske. Milošča božja na tulke me je obstrla da sem Boga i najljubljenešu dobrotu njegovu zbantuval, z mojom okornošču, serditošču i drugemi prešeztnemi odurnemi grehi. Ja te preklinjem, nesreča! Treba je znati trpeti. Oh, ti tele pregrešne, kaj si se vumrtvile, od večera pak do svita blaga sem ostavil. Ne boj se, na koncu puta čeka te odrešenje, jer pokehdob je gospod Bog tak jake milostiven da je tulikomu hudodelniku milošču dal, i mene neče zakratiti akoprem z vnogemi i velikemi jesem obtržen grehi. Grešniki su puraženi i vu peklu vodiju živlenje kakve zaslužujeju.

SUD SVETSKI

Sud svetski izhaja iz suda božjega. Kakov žitek takova smert, kakova smert takov sud. Hote o blažene dušice sad moje muke, vrednost moje kervi, plača mojega terplenja. ‒ Je Bog moj, kaj ne vidite kak jih hičeju vu ove podzemne luknje pune kači i žabi, a oni se s pogrdami k njimi glasiju. ‒ Mi duše same nuter vu zemlje nahajame raj. Nutre su nam pak z remenom stiskali glave dok nam se nisu respukle, a onda su nas pak devali vu škrinje tere su za nas prevuske, prekratke i preplitke bile, a k tomu su črne, pune oštroga kamenja. Onda su nas tak dugo gnjeli dok se kosti nisu zmeknule i zčašile.

Pravedni sudec ov malovrednjak od mladosti poželjenja telovna i nasladnosti njegove nasledujuč vsega dobra sveckoga obilno je vžival listor telu, gerlu i želucu svojemu služil vu goščenju, pjanščine, noriah, igrah, i cifrasteh opravah. ‒ Dobri otec ti zapoveda da z dobremi deli, cenu grehov tvojih moraš naplatiti, ili vekomaj vu pekel pojti. ‒ Oh, ja nevolen gda si premislim kak bude serditoga suca vu obraz gledeti kakti budu grehi moji ober glave žmečali, kak me bude strašil otprt pod menum pekel. ‒ Zemite ga vrazi ki dva drage mazi, zemite ga hudi ki dva drage bludi. Ne dej mu Božek ni pri cirkvi groba, na grobu zelenja, pri Bogu veselja.

Ja sam došel Kairos. Trenutek je obrata. Dohajam li prerane? Je li je došle moje doba? Kipec je zapečačen. Mit je obnovlen prema pravilemi harca na živlenje i smrt. I bijaše trudna i vikaše od muke i mučaše se da rodi. Da evo ga, došel je na sviet još jeden mali Šandor. Z plačem si se rodil, z plačem si odgojen. Z plačem svet ostavi i v grob se postavi. ‒ Koga bi vi zebrali za svega vođu? ‒ Nikoga, mi svega imamo i ne bumo slušati tuđega. Vsi knezi su prisegnuli, da ne buju birali za krala nikoga do sina njegvega. Od zla i dobra stvoritela živlenje je cele. Svoju sem štel preporoditi čud. Treba se navčiti kak biti star. Človek živi ze svojemi iluzijami. Pod starost preveč rezmišlame. Tvar od tere sme sezdani su senje. Senje delaju jad stvarnega živlenja podnošlivim. Gospod Bog sam nas takve je stvoril, da sme krhki, gingavi i nikaj sami od svoje moči nemreme.

VSE JE TEJA

Vu oveh tamnicah človek do človeka, a vse ih muči glad i žeja, vručina i sikakev smrad. I smrad mertvih teri več dvajst dani tu ležiju. Te je znak da vidiš kak buš zgledal gda buju odnesli tvo telo trunjivo. Jerbo krotek, ponizen, tih, čeden, milostiven nigdar nisi bil. Muke peklenske ne more pero spisati, niti jezik izreči, niti razum preseči; nego kaj goder muke oko je videlo, to vse je teja, kaj goder vuho je čulo, to je igra. Kaj goder je razum presegel, to je nikaj. Kaj goder su krvoloki suprot mučenikom muke zmislili, to su rojžice gledeč na muke peklenske. O, Bogek mi dragi! Prejdu dnevi, meseci, leta i milioni let, a mi ovde tužni ostaneme, vu stvari, kakti znovič trpeti počneme, a nigdar niti polovice, niti desete strani muk ne dočekame. O, kak si duga vekivečnosti! Ki bi te na misli imel, kak bi svete živel.

Ove moj je obed i moja večerja. Ječ sad z menum kače i krastave žabe. Za pitvinu pako imel budeš žveple, smolu i ogenj. Čuje se grmljavina, te je pretnja.Oh, Bogek, budi vola tvoja. Zgleda, da mi je suđene da završim vu ove jame. Vse tvoje čine premišlavaj. Naj se bojati, te su same krinke. Vsaki pokojnik tanca z nju. ‒ Joj, mene joj... nebeski raj iščem. ‒ Muči, nuoč je, vmreti je čas, spravi se z mislima i delom, idemo, kakve živlenje takva smert. Kakva smert takev sud božji. ‒ Ja zgrešil sem, prosim za oproščenje i evo vam vu ruke dajem mač i žitek svoj.

Gda človekova duša z tela vunka zide, ništar ne zna v kakovo mesto ona pride. Lari su istovetni z marima dušami mrtveh. Znam ja lare kaj figureraju kak skeleti, kak vampiri, teri muče i žive i mrtve. Tancaju lari, tanca i grešnik.Tancaju i larve vuz muzičku pratnju flaut. Ali onda bude vnogo plača, vnogo straha, gda se grešnik zdigne z praha. Grešnik je on teri je zgubil vsu svoju naravnost, pak mu se nedela povečavaju. Pogleč črve kak vu obliku kostura odhajaju na bogati stol, gde tancaju vuz popevku ob smerti. Ti tolvaji vnoga zla včinili jesu. O, moli za njih, jerbo ne znaju kakve peklenske muke jih čakaju. Dobri otec ti zapoveda da z dobremi delima cenu grehov tvojih moreš naplatiti.

Vrag je na lancu, kakti pes privezan, ki ne more vgristi neg onega ki se po grehu sam hotonce k njemu približava. Vrag se more pokazati človeku vu prilike dobrega angela. Vsaki duh, je li hudi ili dober kad se iskaže človeka fest prestraši. Ali vnogi angeli nakanili jesu da se hote izvisiti ter previsokem Bogu spodobni biti. Zate takvi ki su tak gizdave pomislili, jesu taki odurni vragi pustali i od lica Božjega za navek otpravleni, ter su vu peklu, a nekteri se ovde po svietu klate, ali vendar svoju tugu, muku i pekel sigdar gde su goder sobum nose. A mene je vrag guvoril jezikem drugač neznanem, i nazveščal mi je nehasnovita dela, nepuštena i škodljiva. Akoprem vrag vnoga zla more zrukovati zmešajuč telovna čutenja, ne mora vendar volju tak primorati, da bi se takev ne mogel greha čuvati. Mene je sejene jel ov čin ‒ ak dohaja od naturalnega zroka ili od vraga, iliti coprije, jer ja se vu te vuzdam vu svoje lastovite nature. Dej mi moč i kreposti tere zdaj vu sebi nemam. O Božek, dej mi snage da z tega vujdem, dej mi svetla, dej nek svieti. ‒ Ljubav ti je velke svetle i naj delati krive. One kaj se dogodile davne ostale je vu tvojem sečanju, tvoje podsvesti. Bog bu ti več pomogel, jenput gda se zmisli tega dana i teh okolnosti.

JA SE BOGU OBEČUJEM

Oh, jesem preplakal stoput svoj smrtni žitek, ar zdaj je svem svetu jake prežaleni dan. Al zdaj je doba gda se poniženi budu uzvisili. Bog na ljubav gene se milošču da tulke onem koj prav njega ljubi duš prikaže na njegvu molitvu kulke krat z vustmi gene. Ja se Bogu obečujem, a ljudem guvorim. Gda sem bil vu vodu hičen občutil jesem smrtne stiske. Milošča Božja na tulke me je obstrla da sem Boga i najljubljenešu dobrotu njegovu zbantuval z mojum okornošču, srditošču i drugemi odurnemi grehi. Budi miren, jerbo Marija velki venec rož na glavu ti bude pustavila, a angeli te z onemi devicami velke nasladnosti popevke popevali budu.

Slika vu špiglu dokaz je postojanja našega. Naši dvojniki teri nas zdaj glediju nesu identični z našemi jastvima, ali su znak da sme prežeti živlenjem tere nikuga ne izuzimlje z svojuga naratornoga procesa. I ne boj se ti, same pentrajuč se prama gore do cilja dojti moreš. Si sme mi isti, si sme jednake vredni. Bezkrajna je obala stvarnosti. I vse je vu pokretu, i vu promenami. Glupe je misliti da se moreju zastaviti vrieme, sunce i mesec. Mene je dosti velikih tragedij definitivneh krajov i seobuhvatnega betega. Oh, kak iztinske Svete pisme guvori da tulke veselje, tulku radost i slast vu dike nebeske budeme imeli da jezere let bude nam se videle kakti jeden včerašnji den kaj je prešel. Ja vam nemrem pomoči, ak ne verujete niti onomu kaj vidite.

Z nebem se poistovečuju radost, brzina i veselost, a ovdi vladaju ozbilnost, tuga i nefletnost, pomudnost. Tak zgledi sam črni pekel. A ja ne znam jesem li živ ili mrtev i velku nezgovornu muku trpim. Da bi zbegel vremenske ništavile, putuj i otkril buš nekaj novega, jerbo dosada se raja z jednolikosti. Ali, z putovajnem se moreju zgubiti iluzije. Bog je na strane vernih i uspešneh. Kulika je nesreča stigla one teri su bili neverni! V ruke se dajem Gospodinu, da od mene zeme vsu tugu ovu. Same me te veseli, da ja teri sem vekivečne pekla muke vreden bil, vendar po sudnjem dnevu vseh muk oslobodim se i vekomaj blaženstva Nebeskoga vžival bum.