Si smo diel zemlje

ČLOVEK ŽUHKO

živlenje kak listje
na vietru kak zbliedeli vieš z molcojedinami
otpadaju ljudi sagdajno

a diete
kak želna se svetost na noge postavla
unda kak ruomar po svietu
išče
delo človeka veru
z riečima moli i kuone i vara
na ista vusta

piše knige sadi
cvietje riše zdiže oltare
i za vrat grabi kak zobmi
z istimi rokami

človek
kak je tuo čudapuot čuti
žuhko

a tak rietko sprehaja se guola venera
spred sonca

_____________________
vieš z molcojedinami, rublje izgrizeno od moljaca – sagdajno, svakodnevno – ruomar, hodočasnik – išče, traži – kuone, psuje – tuo čudapuot, to puno puta

OTHAJANJA

othajam vu pole ka dozorim
kak žito
kak spuokana vusna kruha
ka zadišim

othajam vu pole ka se zgubim
vu megli vu soncu
ka zgurim

othajam ka se osamim
ka se rezidem
kak dim

morti se znovič rodim

_____________________
othajanja, othajam, odlasci, odlazim – ka, da – zgurim, izgorim – znovič, iznova, ponovo

KAM SPADAM

muoj sviet so bregi s hostaj
hrpti z goricaj
i jarki s potokaj
vu farbe jeseni skotani
žmetni od zrelosti
vu meglaj skriti z rosaj hmiti

muoj sviet so obloki
rescvelih muškatlinov
kak ranojuternja sonca
asparagusi
resčesani

muoj sviet so rane svetlosti
tople brazde i traniki
i nieso mi stranjski
blatni šuolini
fajtna robača
črni za nohti krienci
zagoreli zrobaveli obrazi

tak smo si diel
zemlje

a sa moja čeznuča za nebom
so ruože oblakov
i sonce i sonce
i sonce

_____________________
bregi s hostaj, brežuljci sa šumama – s potokaj, s potocima – skotani, umotani – z rosaj hmiti, z rosama umiveni – traniki, travnjaci – niesu mi strajski, nisu mi strani – šuolini, cipele natikače

MATER NAŠA

jedna i jedina
jedna steza jedna zvira jedna zorja
jedina slika zagorja ka živi
zi spomina
kak kruh kuruzni kak rieč domača
večerka ka se žari

bila je mavrica potlam plača
mladi veter črez goricu
vusnom
odnašala bi brige naše
suoze licu

kak tihi dešč na suhe zemlje vusnu
bieli kruh na stuolu
mehek vajkuš za mirno spanje
kries ivanjski bila je
luč i kluč za naše senje

mi njejna deca
mišeki i mujceki piceki i pureki
zlietani kak iceki
i plahi
kak divji zajčeki

zrasli
po svietu smo se rezleteli
kak jesenjsko listje kak oblaki bieli

a ona ostala sama

jedna steza jedna zvira jedna zorja
naša mama

_____________________
mavrica, priča, bajka – potlam, poslije – dešč, kiša – mehek vajkuš, mekani jastuk – mišeki, mujceki, piceki, pureki, iceki, zajčeki, mišići, mačići, pilići, telići, zečići

JESENSKI DEŠČ VU SADOVJAKU

na oriehu vrana kak list črni
sprhjeni moker
spoda scureli
listi kak družina golobov na paši
i si so oker

od sevra je
i baš fejst curi

v hiški sem i kurim
vu želieznoj pečiki
strielaju se suoki gacije

vu lončeku zemljenom čaj od šipka
z medom miešam
i slivofkom

tie žmah čaja zmisli me naviek
na očo vu svetiešnoj oblieki
gda k meši odhaja

gible se toplina i pavučina
spoda prosnic
i nekak se kak senja je
ono zvuna z ovo znutra
ovo denes z ono zdavja
mieša se

a nedela je
i baš fejst curi

zvuna čuju se zvoni svetoga antuna

a na oriehu vrana kak črni list
moker izda se drži

_____________________
vu sadovjaku, u voćnjaku – sprhjeni, istrulio – v hiški sem, u kućici sam – suoki gacije, sokovi akacije – slivofka, šljivovica (rakija) – žmah, okus, tek; miris, vonj – na očo, na oca – svetiešnoj obleki, svečanoj odjeći – spoda prosnic, ispod tavanica – zdavja, davno – izda, još (uvijek)

SLIKA

glediš me od zgora miren
muoj fabricio
namiren rezmišlaš
zi srednjakom pri sliepom oku
prislojenim

(odzaj je krleža poviest hrvatov tin i dragutin
riečnik mare nostrum baština naša
stoji stari sviet rieči sa zvirajka
i kojekaj po stalažaj
zbirano na lieta)

a ti slika
zaleplena kak i kipec črne marije
kak jura zi sablom
oča z menom i mater začesanih črnih las
išče mlada i liepa mlajša od mene
nemier i lepota zelenja zagorja
tu si zmed nas
slika med slikaj
i zmed kojekaj po stalažaj
vračtva škatule flašice
sirupi vitamini recepti nalazi
izloženi
za dva betežna živlenja

glediš me z fotelje vu črlenem poluoveru
spod očal direktno v uoči
tak me negda oča gledal
samo jemu sem bil sin
a tebi je sejeno kak ja nepoznati zgledim
tu za stolom i mislim na te

fučka se ljudima z fotelje
za face nepoznate

_____________________
zi srednjakom, sa srednjim prstom – odzaj, otraga, iza – po stalažaj, po policama – zmed nas, između nas – med slikaj, među slikama – vračtva, lijekovi – betežna živlenj, bolesni životi – sejeno, svejedno

ŽVENK

negdo je silovito sekiro siekel
vu živu kuost drieva je siekel
korenje je siekel
vu žilje živlenjsko
sekiro

treščljivo je špricala krv na sniežnu zmrzlinu

med brege kak divjak se zalietal žvenk
kak bat je vudiral v nebeski zvuon

zvonilo vu turnu
zvonilo vu vuhaj
črez bielu dolinu se zgublal
v dalšinu
r e z l e t e l i ž v e n k

negdo je silovito vu meni siekel kak sekiro vu hosti
vu žilje vudiral
vu kostima je brenčal zvuon

na belini treščljivi so ljudi

z črnu trugu k gruobju lezili z menom

navzguor

_____________________
žvenk, zvon, zvonjava – treščljivo, preneseno: poput trijesaka, iverja – sniežnu zmrzlinu, sniježnu(ledenu) hladnoću – vu vuhaj, u ušima – z črnu trugu, s crnim odrom – k gruobju, prema groblju – navzguor, prema gore

ZAKAJ SO MI TREBALE POPEVKE

rieči na pienju
slečena misel

kak vieš na štriku z molcojedinami
spomini so vu vietru
spobrane slike po zagorju
kuot je hodilo detinjstvo

zakaj baš popievke
z ručaj na žulni pleči koš zemlje
žmeten kak se v jarku
ka oče na brieg
do zdravomarije

v kištri je sfrkana ležala suha kuorica
v hiški je samo griela želiezna pečika
v naša skrita tiela senja se vsadila
i čakala

ne znam kaj so mi trebale

otprilike tulka lieta na hilede
sončnih je glav odsiekano
dzaj moje hiže

a ja prvi puot nagjeni k zahajanju
čutim brezkončnu nuoč
nit iskre svetla nit suoza rose nit
nit misel nit rieč

se zbrisano

kaj ova rieč na pienju prigjena glava
bliskaju sekire vu zraku
one ne donašaju živlenje
one porajaju mrtve

bog muoj
kaj so mi trebale te rieči

_____________________
rieči na pienju, riječi na panju – vieš na štriku, rublje na konopu – kuot, kuda – z ručaj, s ručkama – ka oče, koji hoće (želi) – v kištri, u ladici – dzaj, iza – nagnjeni k zahajanju, nagnut prema zalasku – prigjena, prignuta – porajaju, porađaju

PARKE

gde so parke preju prele polnuočni se
čuju koraki kesni po kaldrmi klopotati

spoda se kubeta neba
svetlost spušča mesečinasto

zgrade so zdene zaprta sa vrata
vura brez cajta vu turnu spi zvuon

duogolasi pesnik spod reskrilenoga orla
čuvle perivoj svuoj i trdine ščarane od mladine

od samuoče brez glasnoga glasa
počivle gradstar

ej da nie bilo zrina vinske ceste i škuole učitelske
nej se moji čuli koraki po kaldrmi klopotati
kesnonuočni vu plemenitom gradu čaka

gde so parke preju prele nuovo jutro
na rojenje čaka

_____________________
parke, boginje sudbine (u rimskoj mitologiji) – preju, pređu, predivo – kubeta, kupola, svod – vura brez cajta, sat bez (oznake) vremena – trdine ščarane, išarane zidine (stare utvrde) – vu plemenitom gradu čaka, u plemenitaškom gradu Chaka (obitelj Chak utemeljila je Čakovec, op. ur.) – na rojenje čaka, na rođenje čeka

ZAPRTO

zapiram se puote v sebe
za svetlo uoči za misel za se strajsko

zapiram puote
brtvim respukline
kuot bi sonca zraka
blesnuti mogla
do žuhkoga mraka

boli laž če imaš kuraž ju spoznati

komu mar
se postalo je spomenar

jedino dok listam te listine
istine spraviju žar do hice
pa ogenj z nutrine švigne
i

posvietli mi lice

al komu mar nečije živlenje
tuo samo je
spomenar
nesklito semenje

_____________________
zapiram se puote, zatvaram sve putove – se strajsko, sve strano – do hice, do usijanosti – nesklito, neproklijalo

OBLAKI

potujete ruomari gromačasti
lipicaneri bieli
čudovite ladje pernati pozoji
ovčice drobne plašlive
sončni smetjaki
spoduobe človeka
ruomarske steze suoze obiešene
samotjaki

črni i bieli sivi
pobegli jeleni plašlivi
goropadni vukodlaki
tolvaji divjaki znoreli
hudogledi
z mavricom v dlaki

kak košute paseju mirno
spiju pesi
mladci na ceckaj visiju

hvečer kak črleni vajkuši
na sonca skrajcu
glavu držiju

oblaki hmajaki negda
vu običnoj mlaki
zaspiju

_____________________
roumari, hodočasnici – pernati pozoji, zmajevi od perja – tolvaji, lopovi, varalice – hvečer kak črleni vajkuši, na večer kao crveni jastuci – skrajcu, komadu

DENES PRAZNUJEM

na hilede glav sonca
kre mojega prešlo je obloka
tuo velikajska je gora svetlosti

a zmedtiemtoga
zvijalo se živlenje kaj
tienki curček
kaj črvek v drievi
teri nigdar ne zna kak ide
i gde mu je ziti vun

zvira
z gorja zi senjom
morja

droben ftiček
z velikajske hoste

a zmedtiemtoga
negdo je silovito siekel z sekiro
i furt rušil dneve
i zvonil i dozaval mraze
obraze robavil
negdo je gazil
gazil

praznujem
makar zgledim kak kruhova
kištra z detinjstva
suho droptinje i sfrkane kuorice

ali sejeno svetkujem
ne žalujem

na kraju
koga briga
živlenje je i tak jedna
figa

_____________________
zmiedtiemtoga, u međuvremenu – kaj črvek v drievi, kao crvić u drvetu – z velikajske hoste, iz velebne šume – zgledim kak kruhova kištra, izgledam poput ladice za kruh