Ča to smo mi?

TAJSTA JE KAKO OD NIČA

tajsta je kako od niča
gambijevala štajuoni
/ku je rabilo za scenografijo/
i fikusan bi padalo lišće
va avrile,
a zelenilo se mihuoljšćaka
/ku je rabilo/

tajsta je znala stazice po prieku
i ni se udzirala, ni ubraćala za nazat
ni na ubraze se ni videlo nič
z očif so zviezdi se smehljale
podobne muoru kat sunce zahaja

tajsta je palila svuojdan briegi
da si ruoki stepli, a branila plivat
grajanske dice va žite

i tekla s poputbinon pot pazuhon
a nien ni ša za tien
da samoća se zove...

aš unde je sve bilo blavo
od muora
od riek
i njiejneh očif.

_____________________
kako od niča – lako, bez muke; gambijevala – mijenjala; štajuoni – godišnja doba; mihuljšćak – listopad; rabilo – trebalo; podobne – slične; muore – more; nien ni ša za tien – nitko nije primijetio; unde – ondje

PETEHI SE KOLJO

Ivan Večenaj: Pevci se koljo
Zimsko jutro snegon pokrito,
gospodarica je vlih staknula uganj,
nakrmila blago,
anke njih
pun lonac žita rashitanega po kuorte
i blago je gospodar pogna naodo,
mačak naganje tići po krove snegon prekriten,
a oni se koljo.
Na dobrie vere,
aš oni nimajo drugega dela,
ni nič namisli
…ti petehi.

_____________________
petehi – pijetlovi; vlih – maločas; nakrmila – nahranila; blago – stoku; anke – i; rashitano – razbacano, neuredno; pogna naodo – potjerati na vodu; aš – ali

ZABLJENO PISMO

                                    B. Zlatar: Zaboravljeno pismo

I.

Ošćenica gori na stole
kup pismi zavieženeh,
mljačno kafe va ćikaricah,
ko najbrže ne buo nien popi
i pismo zabljeno – zaprto.
Toliko tugi ozdavni nisan videla:
kafe ko nien nieće popit,
luče ko nienemu nieće svietit,
ona pisma ki zna čigova
forši bi hi dobro upalit.
Sforcana romantika stare mladi.
(Mi delajo faštidijo mrtve prirodi
a to ni nanke to.)
Ča to smo mi?

II.

Kafe je čekalo na stole,
i ošćenica je gorela,
i kup pismi je triebalo proštet
ali poslat kamo već jedan put
to letero – da ne buo zabljena.
O moj Bože, a zač to tielo ni šlo slikat
van ali ulovilo hlat svuoj na zide
ku se ne more videt va špieglje.
Ča to smo mi?

III.

Ma moren ja i kapit te dušice
od bavici laglje,
kien poplati komoć zemljo tičo,
ke slažo i preslagievajo i prehićevajo…
ma kade je tu život?
Ča anke to smo mi?

_____________________
zavieženeh – zavezanih; mljačno – mlako; čigova – čija; forši – možda; sforcana – pretjerana, neprirodna; mi delajo faštidijo – idu mi na živce; proštet – pročitati; letera – pismo; hlat – sjena, hlad; špiegalj – ogledalo; kapit – razumjeti; od bavici laglje – lakše od povjetarca; komoć – jedva; tičo – diraju

SUREGA CIERA I PRES NADI

ku san te čekala
san – va hode
s puoten
nešto pletuć
nešto ča ni podobno holjevan...

pak ča ku san te čekala
i sebe san čekala
da priden va se
da zabin da čekan
da pojen za sojien

ku san te čekala – pak ča
neki je vajk nihde nekega čeka
a moje čeki niso nekretnine
one gredo s manon

ku san te čekala
san – pres kanoćala
surega ciera i pres nadi
da ćeš prit

_____________________
surega – sivoga; cier – ten, put; holjevan – čarapama; priden – dođem; zabin – zaboravim; pojen – pođem; za sojien – svojim putem, svojim poslom; čeki – lovačke osmatračnice; kanoćala – dvogleda; pres – bez; prit – doći

JOH, KAKO SO LAHKI MOJI POPLATI DANASKA

Joh, kako so lahki moji poplati danaska,
i kako mi rada usta bežijo na smieh,
i krila komoć držim smotana da ne zletin.

Joh, kako me blavilo preziema
i kako mi se sviet vrti.
Sagdere san a nien me ne more ulovit.
Joh, kako so lahki moji poplati danaska.

I kako so mi luštri ubrazi a pogled belenas,
si li ša za tien va pašaje.

(Ne bliej Rumena, glej kumpanji so ti zapasale već.)

_____________________
bežijo, bježe – luštri, sjajni – belenas, zanesen, pomalo glupav – ša za tien, primijetio – va pašaje, u prolazu – Rumena, uobičajeno ime za ovcu – kumpanji, drugarice

KAKO DA SI NISMO NIČ

Z vremenom se kapi da ne rabi ubligevat muore,
a i ku se ga ubliegiva njemu je to jušto svejeno,
ono je samo za se.
Čiera san mu poviedala štuorice ke nienemu ne bin
a samo san mu tela povedat kako san sama,
tela san da strupa mojo samoćo,
da ju predela va sabluon,
viš – dobro; dica će potle tamo iskat
školjkice...

Deboto, kako da si nismo nič,
čiera mi je muore poviedalo štuorice,
i sve je bilo na meste,
i usta je imelo na švik,
a brada mu se je čmrdila
kako da će počet plakat saki hip,
a ja nisan smela puoć za tien.
Kako da si nismo nič.

_____________________
ne rabi, ne treba – ubligevat, nametati neku obvezu – čiera, jučer – poviedala, pričala – štuorice, pričice – ke nienemu ne bin, koje nikome ne bih – va sabluon, u pijesak – deboto, skoro – švik, zviždaljka – čmrdila, mrštila – puoć za tien, primijetiti

DUPLO MORE

So bila dva muora
jeno dimboko i črno
i mirno vieženo i naprćeno
svemi bisagami svieta.
Drugo bistro i lahko
je hodilo zgor onega prvega,
kako rieka zlita van korita
brza, bistra i čista.
I ledena.
Ono dolenjo muore bremenito
je nosilo sve misli i svi pensieri
i pofat ča je bilo mirno i tiho
je kuhalo i vrelo je bilo.
(Ma ke, niso me mogli videt.
Ni jeno ni drugo.)

_____________________
vieženo, vezano – zlita, izlivena – pofat, bez obzira – ma ke, ma kakvi