Terica poviesti se pritroupala
na muoje škornje.
Po ledine sem se pejnal vu Lentulus,
gde su zvirale rimske kmice.
Vu vedrici su drftali zvuki senokoša;
kaj se trune i mrve, kak lati šenice,
hičeni na selske poute,
tere su ribali kuoraki Avara,
kaj su zvili kletve,
zažnierali spanje i smert.
Potlem bi kral Žigmund
razlejal kerv po hude mesečine.
Puntala se koprivnička kapetanija,
do nuovih brazdi Turaka.
Saka je brazda svuoju kerv spila.
Gnjile korienje ne použe, brez svega serca.
Škropi me z nebe legenda o Picokima.
Segde žilki lieta;
vu glibinama, po frlunci,
pritroupana terica poviesti.
hičeni – bačeni, pritroupati – uhvatiti se za nešto
Vu stare Peternjanske galerije
dišiju zaboravleni alati;
po drievu kaj ih vumetnik
ni do kuonca ščistil,
po tragima kaj ih ni vrezal.
Vu ramah etno-baštine
gizdavi cajti
čakaju naše šnjuofe.
Čakaju da nam misel dubi drievo.
Vu stare Peternjanske galerije
slikari vužgaju farbe,
tere bi nas mogle taman zgreti:
akvarelom na jezeru Jegeniš,
muorti šaranima vu dišečih paletah.
Po zidima blagosluovlena poviest
curi navduž i popriek,
vu neke zacuopne oči.
Kopitala se rieč genuta z visinah
poklem jenuoga lieta,
gda su gnievi prekrili Ugarske nebe.
Kak da se nefas obrušil met zahakljane zapise.
Trebale se zdiči ponosne goubec
i šnjuofati z dalečinah svuoju zemljicu.
Tak bi Česmički po štiengah,
hodil po svietu rieč vu Padovu
čakajuč psalm talijanskeh humanista.
Rasprela mu se duša,
da spregreje vrelim ognjem
pripravlen sviet po Buožje vuolje.
Sav se del varadinske cirkve;
osiečal naravski tuje gnieve,
istinom obrazi čipkaste blagoslovil,
mesto gifta sercu on bi zvil najmekšu nadu.
Z Ivanom Thuzom držal cielu Slavoniju
svojemi roukami k boljšem svietu.
Trebale je hrabre nositi živlenjske respelo,
trebale ugoditi sakem vierniku,
bar rieč vputiti z Kristuševa serca,
z elegijam vu distihu otprti vrata,
kak »vučeni piesnik« lirski sliediti svece
vu duši ljosnuti ot pliendranja Balkana,
ot harca teri naviek apšisa cajte.
Trebale je doteknuti luknju poklem Osmanlija.
Tak bi Česmički alduval svete otajstve -
»Sounce je gospuodar zviezdama«,
rekel bi stiham vu Orfičkoj odi Souncu
i vleznul črez vsemirske kmične kraje
gde je Buog odredil poute k Istine.
apšisati – izblijediti, pliendranje – pljačkanje, ljosnuti – pasti, naravski – prirodno, tuje – tuđe, poklem – poslije, harc – rat, šnjuof – miris
Ivanu Golubu
Vuoda živlenja mu hmila lice,
na lepše strane čkuomine.
Po šestem dienu
prhala je gugutka biela,
k svietlu Gregorijane,
kak rieči z Kalinovca
kaj se šifom pelaju
priek nebeskega muorja,
vu malu Rimsku komuoricu,
zrihtanu vusred oblaka.
Vu Spectrum bi perom zapisal
istine vieran Buožje trage lica,
spram horizonta i pouta,
terima su ruomarile odbegle duše.
Z lieta vu lieto,
zatire mržnju stiham
vu susret Buogu,
pak dotikavle
odraz Kristuševe dobruote.
ruomariti – hodočastiti, komuorica – soba
Ze serca rastepu se cajti
druobnega sela Komarnice,
spram Virja i Đurđevca.
Rojenje i hmiranje
vu vejama vetrom rovari.
Z cirkvenega turma
slažeju se želiezni potrti zvuki,
blagoslovem Sv. Ladislava.
Okoli tvrđice
senjale su grabe vu terima driema rieka;
haramije ginule za trpku pravicu,
našušureni kamenjari, spretrgani versi.
Druoncali se na kopitov
vuojvode i zastavniki;
po nerazgaženih pouti,
po divline i kuostrieti.
tu, gde se puntali cajti pravice,
vu zorjami Komarnice.
driemati – spavati, druobne – maleno, puntati – buniti se, pravica – pravda
Mladuost sem zbiciklieral
po podravskih kraje svieta.
Diče se korieni duše kaj stišču serce.
Pedale biciklina namačem vuz Dravu;
po prgah šnjuofam sela,
srčem duh goriškega gulaša,
zranjaju legende o vsakem gradu.
Frišku sem beciklinom
zaoral brazdu, mefke i rahle stihe
za okrepu duše,
priek Kalnika i Bilogore.
Pedalieram dale fejst
po podravske magistrale.
Megljive oči čakaju
cifrastu pajdašiju vu Kralušu,
gde bi štel siesti ze smiehom.
Prvetravanjske rieči vabiju
Koprivničance vu mladuost;
tam gde ne žure nikam,
vu park slušati muorti ftice
i jen biciklierati
po puozabljenih milih kraje.*
____________________
* GATALICA, Goran (Virovitica, 1982.). Diplomirao je fiziku i kemiju na Prirodoslovno-matematičkom fakultetu u Zagrebu nakon čega upisuje doktorski studij atomske i molekularne fizike s astrofizikom. Poeziju objavljuje u književnim časopisima i zbornicima recitala na kojima sudjeluje. Više je puta nagrađivan u domovini i inozemstvu. Član je udruge Jutro poezije. Živi i djeluje u Zagrebu.
3, 2015.
Klikni za povratak