VMIVANJE NA VUGLU SEBE

 Nepozablenomu D. Cesariću

Stojim na vuglecu vuličke.
Večer – glatka grohača.
Zgledim si kak petrolejka.
Repača Hale Bopp me svača.

Ščekivam onoga gosta
teroga ni v gošče.
Svietim se, jemlem i dajem.
Steklo se rezbije.

Hižičke nunaju cirkvu.
Po tičje žvrguliju.
Vitrajčeki čovečje senje
vučas se pretaliju.

Vmivam se na vuglu sebe.
Dobriša kaplje deli.
Jurišaju nam krvna zrnčeca
po polju
kak konji riđani....

SRCE JE LIETAVKA, SRCE JE KONDOR

Srce je iverek i lietavka na pienju,
prispodoblena željam, prisličena stienju –
koj da ga bu mam ze svieta prenestalo,
kad sekirke frcaju z neba po brvienju!

Ono je primetno kak žličica meda
teru si pribiera detešce spod leda,
kak gladen i žeden letač Peter Pan,
predalko od maminoga cukornoga gleda.

To čisto srce je kondor, opšikatelj visine,
čuvar Zemline kugle i tkalec vse beline
z kum tielo pojde tam de z pepelom se zbrati.
Volim ga takšnega i nemrem ga skalati!

OCVEREK

Dej kaj daš! Snajdi se kak znaš!
To ti je, na žalost, denešnji refren.

V ŽIVLENJU CVREŠ ILI SI SCVREN.

Naj si misliti da ti bu vušlo...
Cedili te buju dok god bu masti.
Ščiem zakruli, poždroknuli te buju
z nemerljivum gladuškum slasti.

Mljac, mljac, mljac...

SKOSALI TE BUJU, Z KRUVOM IL BEZ KRUVA.
NEŠ NI SKOPČAL, A ZAFRIG TI SE KUVA!

Most te bu nečija marna rukica
poskrivečke zela za ocverkaše.
Smantran tak i tak moraš biti,
a leže buš skončal vuz cukoraše...

Tac, tac, poritac...

V ŽIVLENJU CVREŠ ILI SI SCVREN.

ZELENA SMEJANJA

Od jutra sem se štela fest nasrndačiti,
glejdali, čujdali, sried milijuon nebes:
suvalke stezmati, majnguvanja skriti,
ošajdariti žilke, zakapariti kries...

Pomiliti z lotričov vrvlaste fertunke.
Za se moguče reštov otpraviti tice.
Zagajiti iverke i kesaste špelunke.
Dopecnuti krove, opernateti lice.

Sad čumižem. Na prste. Po vojke se vesim.
Z alinjem paradieram pri gredice gluve.
Štrukle bez sira med kvačicami miesim.
Od mega srndačenja – ni čuve, ni duve.

K nosu se šmajhla pužek hižni, drobni.
Švica se, skomuče. Đigla do križanja.
O, kak jejce jejcu smu spodobni!
Hičemu se dole, v zelena smejanja.

ZVEZDANA TINTARNICA

Imam tintarnicu kaj mi ženje senje,
srebrnaste, zlatne, roskaste, zelene.
Čez gutek si natače restalene zviezde,
drčeče, grčkaste, zmožne, rezbielene.

Predobro ju poznam, kak i ona mene!
Mliečna krv brbučka, brmbuli i piše.
Muoštamu, kipimu, ni časka ne spimu.
Niti nam se driemle, niti nam se zieše.

Kam ču z tum
zvezdarnicum
kaj mi srče senje?!

V SVETKUVANJU MODRINE

Na gredencu spoaka prfka bedzgovina.
Prav je se združil z čmrgicami kruva.
Dok cvilka fajtnina, svetkuje modrina.
Cviet je zakmičen. Žmi srebrna duva.

Štiglec bi skuševal plav, režejan čas
i otpravil potočec k Mesecove frule.
Z krili bi opšiknul bedzgovinin glas,
ali je ni. Zibleju ga glog, šipek i trnule.

PEHARI MESEČINE, LUČI DETINJSTVA

V gradu Lukavcu

Pehari mesečine polievaju Grad.
Nadižeju prsa stoletnoga rasta...
Lukavečke šišarde v belinu kinđi
Mesecova zmožna krv – cvetasta.

Mliekeko zviezdic kipi nad grbom,
Na čvrste vrate, de sablje žvenčiju.
Luči detinjstva, zdignjene ze zdenca,
zibleju ves svemir. I to nam ne tajiju.

POVESNA VURA TUROPOLJA

Povesna vura, pod ovum zemlum,
svegdienje ciegare v zloato oblači.
Zove nas na špancieranja čez vieke.
Nijeno ščuvano živlenje je ne poači.

Se njezine dobe su naše oči, i ruke,
gledenja, senjanja, hodenja, sa dela.
Povesna vura je z nami jeno bitje:
zvonimu, zalejani v iste duše, tiela.

ZLAMEN SI I MILOST

Posvečeno slikarici Slavi Raškaj

Srčece srca – trpeča Slavo...
Bog ti je zacunul zube, vuva.
Oči su ti lopoči bogatoga bitja.
Zlamen si i milost nebeskoga duva.

Sunčece sunca – snažna Slavo...
Cvetasto kliješ i namačeš kiste
v srčeka, fajngline, gumbeke i šlajer.
Z kopertami svetla prevračaš liste.

V nekteremi od nje dopecneš i mene:
zonica sem, nu ne zatira me ova doba,
zlučikana, šukvasta, iglena, a ni ljudi
ki restepleju grudje z tvega groba.

Srčece srca, sunčece sunca...

SNIEŽNI CVIETI SEČANJA

Senice su zakučile i zaigrale po oknu.
Steklo se rescvelo v opšiknjene šipkovčice.

Na blint sem si zela jenu ruožu:
bila je to ona moja najmileja, nepozablena,
kaj mi je v rane mladosti svietlala oči i dušu,
kaj me je kriepila i podavala mi zvirke
svega večnoga praha...
I vu njem me ožila.

Zgledala je presrečno,
kak da je iskala samo muoj trag,
kak da je čekala samo muoj mig.

A još snočka je napadal takov debeli snieg...
Sejeno smu cvele i otpirale se kak nore,
v truc sem ledvenem, zimskem rukam.

I naše senice su z nami precvele
priek sel, priek šum,

priek svieta.