Jelenski svati

GONĐANJE

Zbriši mi trage i vrni me nazaj,
Ti kojemu je vse poznato.
Samo pazi kaj mi to ne bo kraj,
na tom ringišpilu kosmatom.

Posluhni me! Vužgal sem Ti svečo
zbogradi tvoje velke moke.
Retki so oni kaj trefe srečo,
a da ne jedu z vražje roke.

Navek sem obedoval samoču.
Vezda bom prestrl tepih za svetek.
Postal bom veter, jel bom gda hoču.
Kaj znači da mi bo obed - cvetek?

Kaj nesem i do ve drača kosal,
i to ne listje, nego korenje!?
Od rođenja si grabu kopam.
Fučkam ti ja takvo živlenje...

___________________
gonđanje, mrmljanje - trefe, pogode - vezda, sada

KOLOVRAT

Vrtel se bom po svetu doveka
i skakal kak nori, gor i dol.
Kam to more odvleči čoveka
znajo veselje, beteg i bol.
Vsi znamo da se i vse obrača:
posle dneva dojde črna noč.
I vse se na nekvi način plača,
tak bu i meni svetlilo z joč’.

Med rožama se i drač skrivle,
kak vu šeptanju hude reči.
Denes veselje, zutra brige,
i to se nemre nikak zbeči.

Vrtel se bom po svetu doveka
i skakal kak nori, gor i dol.
Kam to more odvleči čoveka
znajo: veselje, beteg i bol...

JELENSKI SVATI

Sigečki jarek vu hipu je pretrnol
gda se spod vrbe opsekače jelen zmogel.
Spod kukovače i neroda se obrnol
i začel tuliti kak da je znorel.

Rog mu je bil scifran z prelepim vencem,
i z krunom kakvo ni jeden kral nema.
Sigetec se tekarek budil z pevcem
a jelen je več v Dravi lukal klena.

Megla mu je prek lica navlekla vel
gda je košuti na pleča glavo del.
Norija je blago večernjih cajti.

Coprije se vžiješ če jo znaš najti.
Spuhni vu vrbe, one so naivni soldati,
spod kojih tancajo jelenski svati.

___________________
zmogel, pojavio - neroda, jablana - tekarek, tek, upravo - coprije, vradžbine

ČINGI-LINGI

Stiha fučkajo ftiči: »Čingi-Lingi«.
Tri jezera vu ravni Podravini.
Zmed Repaša i Molvi, vu čkomini,
kralica Hrvata i pastira živi.

»Čingi Lingi«- šepče listje z betvice,
znad koje sonce zna štorgu dozvati.
Pilipari so tu, i božje ovčice,
a čmelice tancajo kak vu svati.

Tu saka duša najde sedalicu.
Podravina daje blagoslov licu.
Lubavi silnoj ne treba tumača.

Ve je mesečina škicnola z kmice.
Spravlajo se spat plave potočnice.
Začkomel je plug nebeskog orača.

___________________
Čingi-Lingi, vikend naselje u Općini Molve - vu čkomini, u šutnji - štorga, rupa, jama - ve, sad - škicnola, pogledala

VRBA OPSEKAČA

Skleštrena spod zelenih podočnjaka,
šibama nabreklim luče vu reko,
z listjem kaj ga stepla vetra roka,
kak stara majkica čepi v bereko.

Zna se videti i v stolce spletena,
i samo Bog zna kakve trtke fse luče
il’ z ročkama korpe predi inja sprema
sakačko sadje, kaj čovek ga spuče.

Ni od dežđa, ni od vetra ona ne ftrne,
i kak god jo skleštre, još lepša se vrne.
Retko gdo se z megle tak kak vrba zdigne.
A lepa je. Joči sakom privleče,
zagrli ga kak mater, stiha šepeče:
»Bog se zmislil Sina. Grmi čim musikne!«

___________________
opsekača, vrba za izradu košara - skleštrena, sasječena - luče, gleda - stepla, otresla - čepi, čuči - berek, močvara

ŠARAN

Šaran je spuhnol i hakla pogotnol.
Vu hipu se trstina razmeknola.
Skoro je v lokvanje vodičnjak štrboknol,
gda se vudica v ribo zapiknola.

Vse mustače je šaran mel vu zrako.
Z perajom na hrpto zadeval je v reso,
flaks je kak plug paral brazdo na škrlako,
a ribič z noftima strugal po pesko.

Gdo bode sučut i so žalost zrekel
ribičo koji je skoro posteklel?
Morti šaran kaj se omeknol z vudice?

Mir. Blaženi mir. Mir vrba. Mir neroda.
Čkomina vu koji anđel spod zvezdi hoda.
Z dravskog strmca lučem v Jezuševo lice.

___________________
hakel, udica, mamac - štrboknol, pljusnuo - škrlak, šešir

PODRAVINA

Kak Podravec v cirkvi spred slike svete
mesec Dravi šepče vse kaj joj paše.
On joj scifra srce kak materi dete,
i Drava v ravnico stače očenaše.
Prelepa opsekača z čislom vu roki
jelenu i košuti furt vuha zdiže.
Srna zbavi spoved predi nek se skoti,
i z božjim blagoslovom lane liže.

»Falembok« - šepeče sveta nedela.
»Naseveke« - odpove ftrti pot sred sela.
Čislo ščebra greh baš tam gdi je kmično.

Podravina lepa... Slekla si kikljo.
Ftiči se z oproštenim grehom zibljo.
F hipu je ftrnolo se ono falično.

___________________
scifra, ukrasi - stače, toči - odpove, odgovori - ftrti pot, utabana staza - kiklja, haljina - zibljo, ljuljaju - falično, bolesno, griješno.

VRANE

Zdenjava nas svojom sapom pritišče.
I reči kojpot čist zdeno zgledijo.
Duša prti zapuhe, pajdaša si išče,
a vrane fekčo sneg, i mrtve budijo.

Znad dravske, fest blatne, žote vode,
čas so raštrkane, čas na vrpi ftice,
koje nam grakčo kak nema slobode
predi nek poglednemo smrti vu lice.

Ah, vi črne ftičurine hrvackog neba,
čijoj duši vaše graktanje ve treba?
Nemoj, kojo žere žalost gliboka?

Sloboda je tu, al živlenje ž nje ode.
Sveče smo bez jognja, cvetje bez vode.
Črne vrane nam lečo spred oba joka.

___________________
zdenjava, hladnoća - zdeno, hladno - žere, ždere - lečo, lete

OTAJSTVO DRAVE

Vu mirni vodi, gdi senjajo se zvezde,
suhi listek svoje telo počiva.
Vali so ga vidli. K njemu pelajo
svoj zmedeni šepet šumskih dalšina.

Veter ga je kušnol stiha, srameče,
z kaplama vode kaj jih slap pozabi,
i list zgledi kaj da ropček premeče,
ž njim briše sozice, zmed lokvanji.

Gdagda se glase ftice z maloga gnezda.
Na to dravsko otajstvo blešči i zvezda.
Vrbe znad listeka trepčo i bečijo...

Trstina se prigible znad dravskog čela,
i list se pela spod scopranog vela.
Dravski vali stalno lubav sadijo.

___________________
otajstvo, krunica s pet desetica - zmedeni šepet, smušeni šapat - trepčo i bečijo, trepere i plaču

HALAS ČARDA

Na vušču Mure v Dravo čul sem ftice
kaj so se znad Halas čarde zdignole,
i vu Legradu spod nebeske prsnice
posluhnol bele vrbe kak Boga mole.

Lebanovec je kušnol vrbama bore
i scifral ih z belim golubicama.
Opčutek v kojemu je nerod bez kore
paše dravskim valima i grlicama.
I vidi se, tekar gda čuje ftice
štorga Dravi podene toplo lice.
Z sakim listom smeh se v Dravi steple.

A Drava je slična starom dobrom vinu
i od navek hrani lepo Podravinu.
Pri Halas čardi Mura se v Dravo zlevle...

___________________
Halas čarda - zaštićeni dio rijeke Drave kod Legrada - prsnice, grede - nerod, jablan - Lebanovec, ime otoka na Dravi