Vitar moru češlja lase

U MRTVOJ DRAGI

U mrtvu su dragu barku svoju speljali

naši poete. Zamiru strošene rime

u gnjiloj bonaci na zgušenima vali.

Pod provon muklo joče zakovano vrime.

Spražnjena su jidra islužene njin barke,

na zlizanen njoj boku zbrisana su slova,

korugva ne ćuhta vrh crljive katarke

– takova neće partit put noviga plova.

Ča moru poete leh oslobodit vrime,

obrnuti barku iz jalove bonace,

skrojit njoj nova jidra, dat njoj novo ime,

sklesati nove verše od starinskih slova,

na novi štriki slidit stare začinjavce,

za njimi navigavat put noviga plova.

GRDI ZNAKI

1.

S feralon u ruki

škuro da razgrćen

i po svojen selu

i po tujen kraju

kamogod se krećen

škura se zapiru

breki na me laju.

2.

Dokle moji konji

u štali na slami

siti počivaju

svu noć po dvorišću

neki drugi konji

bisno galopaju.

3.

Na mrzli posteji

potno tilo spi.

Jena huda sanja

po škuren leti.

Skrozi okno vidin:

zvizde oči stišću,

na veloj kružeri

štrige duše išću.

Grdi su to znaki.

Neki vrag me kliče:

na pragu od hiše

kapun kukuriče.

VITAR MORU ČEŠLJA LASE

Vitar krepkin dihon moru češlja lase.

Žureć na zornicu štrkaju se vali.

Na štriki od broda ćap janci se pase,

Pastir štapon ognje na katarki pali.

Jena bila stina do pasa u vodi

Spominje me na Te. Od njeje lipote

Jutro je pjano, bisno ziblju se brodi,

U pini se more propinje na grote.

Od lipote stine sve se budi liplje,

Sunce svud po kraju zlatni prah prosiplje,

Maistral zadaje po smilju i soli.

Ma ti san pred jutro katrkad i boli,

Kada ne znaš ča ćeš s toliko krasote,

Kad si suho drivo hićeno na grote.

MOJI KONJI VEĆ NE GALOPAJU

Moji konji već ne galopaju

Ni po vali ni po gorski stazi,

Stari konjar u štali ih pazi,

Utrujeni dokle počivaju.

Spod kopiti njin ne frca kamik,

Već ne topću bisno kako prije,

Njiha švohna sapa me ne grije,

U njihen je oku zgasa plamik.

Počinak je sladak tu na slami.

Pavčina se lela pod gredami.

Dokle tako paženi u štali

Pred punin se jaslan izležaju,

Po vrhima i doli po vali

Neki drugi konji galopaju.

U GORU PO VITAR

Đildu

Krilati moj konj je i bisan i hitar

Kada bolan jašen u goru po vitar,

Mrzli vitar kako oštar nož ča riže

I žive mi rane na obrazu liže.

Putoki ud vrha za zdolun bižiju,

Sve ča god je bolno noseć u dolinu.

Jas pak jašen zgorun, išćuć medežiju,

Ličeći si rane góri na kolinu.

Kad se zjutra budin jopet tamo doli,

Nideri ni góre, ni arije čiste,

Na bolnen obrazu rane vavik iste.

Ma zvečer kad jače u duši zaboli,

Konj će doletiti i bisan i hitar

I pojt ćemo jopet u goru po vitar.

ZORNICE

Jutra s tobon moje su zornice,

kanat neba za oči i uši.

Kad se zbudin i vidin ti lice

ćutin – spiš mi dimboko u duši.

Na kušinu raspleteni lasi,

dihon bile zdiguvaš lancune.

Niki čudni dozivlju te glasi

da zaliješ na oknu šćapune.

Molin Boga da se ne razdani,

da šćapune sunce ne uvene,

da ne stihnu glasi od zornice;

kad se zbudiš spod svilnega vela

sanji s tvoga blaženiga čela

da ne sprnu kako golubice.

KRIČ

Kričiš mi u krvi, dihon zibaš

pjano mi tilo – molanu barku;

krhku mi dušu lomiš i šibaš

kako zmorac drivenu katarku.

U dumbini mora ti si špilja,

u kraju, pred večer, vonj od smilja;

i vitar si i oganj i voda,

skrita stina na štriki od broda.

Jas te iman rad i moja jubav

jidro je za sve tvoje nevere.

Ti si šjun od vitra, krič puntere,

u škurini zvizda zgor kružere.

Dih si mojih verši, smrt od muza,

zvečer žar u oku, zjutra suza.

POD SVILNON STOMANJON

Ufanje je sprhlo iz plahe mi duše.

Pod svilnon stomanjon ranjavo je tilo,

Priko golotinje grdi vetar puše,

Sve je otpuhnuja kaj zdravo je bilo.

U meni je gola zustala dolina,

Prez trave i grma; gnjiloća usoja.

Svaki je moj dihaj leden kako stina,

Z vetron su otprhle i žeja i voja.

Kamo vetar puše i s kuda prihaja?

Kakovi ga duh tako hudeg začinje?

Sve zdravo potire, gnjiloća ostaja.

Zaludu ga duša splašena zaklinje.

Huda misal niče i pupa i cvita

– Živa rana svilnon stomanjon pokrita.

SAKU MOLITVU BOG NE USLIŠA

Nevere pridu proti naše voje:

šajete i gromi črno nebo otpiru,

tuče na zemji mladu intradu zatiru.

Zaludu zvona na turnu zvone,

zaludu se krunice broje –

nevere delaju svoje.

Saku molitvu Bog ne usliša.

I dobro je tako,

aš čovik bi molitvom

na veru i neveru,

na moču i sparinu,

proti ognja i proti leda,

na neznanca i na suseda,

proti tujega i proti svoga,

na koncu i proti Boga.

PRIKO MERE

I slavjenih i zabjenih

i zmućenih od vere

i zgubjenih prez vere

na ten nas je svitu

priko svake mere.