Varaždinske tenje i senje

GLASI ČRVOJEDNI

Neznani me glasi furt preganjajo, črvojedni

i nekak črnoplavi, ničemurni i ničvredni,

ali peklenski – čist polehko mi rovleju

po možđani, duši mehki, kak da znaju

gdi najbol me boli, fest i žuhko peče.

Praf čudni glasi, kakti beteg kaj teče

i nigdar nemre stati. Nikaj mi neče

niti pak mi more pomoči misel liepa,

kaj privinul sem ju k sebi, kakti sliepa

ftica gda goluždravce v gnezdu stišče.

A morti to samo Bachovu muziku išče

zmučeno staro serce, dok fajtno prebira

po svojem živlenju? Njega vre rihtar tira,

hudi i vekvečni, kaj serce ne bi našlo mira

i počinka sebi – kak navek plamteča stena.

Ave Maria, gratia plena...

__________________________________________

furt, stalno, neprestano – črvojedni, crvotočni – ničemurni, isprazni, ništavni, neupotrebljivi – ničvredni, bezvrijedni – peklenski, pakleni – polehko... rovleju, polako... ruju – mehki, mekanoj, nježnoj – najbol, najbolje, najsnažnije – fest i žuhko, jako i gorko – praf, upravo, zaista – kakti beteg, kao bolest – nigdar nemre, nikad ne može – nikaj, ništa – more, može – ftica, ptica – morti, možda – išče, traži – serce, srce – fajtno prebira, svježe (iznova) preispituje – živlenju, životu – vre rihtar tira, već sudac tjera – hudi, zao, zločest – vekvečni, vjekovječan – navek plamteča stena, uvijek (trajno) plamteća stijena – Ave Maria, gratia plena, Zdravo Marijo, milosti puna

AJNGEL NA GRADSKI HIŽI

Vre petsto let, kakti stražar,

niemi ajngel na Gradski hiži

vu rukama Varaždin drži.

Ar, on je i vekvečni čuvar

naših senji! V škrinjam od zlata

i v inkunabulama kapucinov

još čuva tajne slavnih sinov

kaj su Fortuni otpirali vrata.

I meni je ajngel čudež napravil

gda me od hudog betega izbavil.

Po nebeski lojtri k zemli me spustil

prejdi nek sem i rieč izustil.

Tak ajngel Varaždina ponosen stoji

i leta dojduča zmirom broji.

Kak se tom kinču Grada zafaliti?

Morti bi mogli – bolši ljudi biti...

__________________________________________

gradski hiži, gradskoj kući (vijećnici) – vre, već – niemi ajngel, nijemi anđeo – ar, jer – senji, snova (sanji) – v škrinjam, u škrinjama – v inkunabulama kapucinov, u inkunabulama kapucina (inkunabule, knjige iz prvog doba tiskarstva, tiskane prije 1500. godine) – Fortuna, antička božica sreće – čudež napravil, čudo napravio (stvorio) – hudog betega izbavil, zle bolesti izbavio – lojtri (lojtra), ljestve – prejdi nek, prije nego – leta dojduča, nadolazeće godine – zmirom, stalno, neprestano – kinč, blago, nakit – zafaliti, zahvaliti (odužiti) – morti, možda (moguće)

NAJEMPUT ZAROBLEN V PUŠČAVI SUMLJI

Pomogni sirotu na svoju sramotu. Narodna

Gda se najemput najdeš zaroblen

z ljudskom nazlobom, a zbogradi

jalnuših peklenskih, kaj ti je fčiniti?

Morti mam stekle gnide vmoriti,

vniščiti, jezik jim spuknuti, sprepičiti

žile, prekpune hudobne karvi?

Ništ od vsega toga. Mozbit bum parvi

kaj bi i gnidam mogel otprostiti

gda bi se nekak uveril i znal –

zakaj se zaprav vse hudo zgodilo

(prem je znutra več dugo bilo gnilo,

a kače sem v nadrima hranil naivno).

Nepodnošliva lahkoča sumlji, bi rekel

Havel. Na pleča mi je splezil pravi pekel,

ciele regimente laži, fkanjivih rieči,

a okoli mene – vse domače Jude

kaj se prodavleju za najmenjše škude.

Kak z toga hudog čemera pobeči?

Nikak. Ne daj ti Bog k rihtarom dojti!

To ti je jednak kak na galge pojti:

osumlen, okrivlen, a brez Veronike rubca

dobil buš žarnu krunu Matije Gubca

ili trnov venec Jezuša na križu.

Kakšna nesreča je pala na našu hižu!

Po paragraflini zdaj flundre idu na feštu,

dok poštenjaki zmirom truneju v reštu.

Tak ftice grablivice, kaj bile so sirote,

i najbolšeg človeka ftopiju v sramote.

__________________________________________

najemput zaroblen v puščavi sumlji, odjednom zarobljen u pustinji sumnji – gda, kad – najdeš, nađeš – nazlobom (nazlob), zavišću, jalom, mržnjom – jalnuših peklenskih, zavidnika paklenih – fčiniti, uraditi (poduzeti) – morti mam, možda odmah – stekle gnide vmoriti, vniščiti, bijesne gnjide ubiti, uništiti – sprepičiti, izbosti – hudobne karvi, zle (pokvarene) krvi – vsega, svega – mozbit bum parvi, moguće budem prvi – kače... v nadrima, zmije u njedrima – lahkoča sumlji, lakoća sumnjičenja – splezil... pekel, uspuzao (popeo) se... pakao – fkanjivih rieči, lažljivih (prevrtljivih) riječi – hudog čemera, zle gorčine (jada) – k rihtarom dojti, k sucima doći – pojti, poći (stići) – dobil buš, dobit ćeš – trnov venec, vijenac od trnja – paragraflini, paragrafi – zdaj, sada – flundre, bludnice (kurve) – zmirom, neprestano (redovno) – ftice, ptice – ftopiju v sramote, utope u sramoti

FTICE HORVATSKE, ZAHIČENE

Ftice horvatske, zahičene,

vre vnogo let čkomiju.

Spletene v pavučinu, pozablene,

čakaju da jih znovič zbudimo.

Zemlicu su našu kaštigali

tabori i ognji, sikakvi harači.

Nigdar nas nesu štimali,

pokazujuč kak se tlači

jen mali narod. Sred puščave

europska pravica – čista je kmica

namenjena za siromake!

Ftice horvatske, več kervave,

kričiju brez glasa: se to smica

novo samopozablenje, za bedake?!

__________________________________________

ftice... zahičene, ptice... zabačene, odbačene – vre vnogo let čkomiju, već puno godina šute – pozablene, zaboravljene – čakaju, čekaju – znovič, iznova – kaštigali, kažnjavali – tabori, logori (također: ratovi) – sikakvi harači, svakakvi porezi (preneseno: nevolje, nedaće) – nesu štimali, nisu poštovali – sred puščave, nasred pustinje (puste zemlje) – pravica, pravda – kričiju brez glasa, viču (u smislu: prosvjeduju) bezglasno – smica, vuče, kliže (također: približava) – samopozablenje, samozaborav

VARAŽDINSKI NOCTURNO

Varaždin je jena čarovna škatula

gdi spiju ajngeli, kak dečeci

skriti vu pavučini noči. Tie kipci

brez imena z nebeskog semena,

ali prav domači, naši pajdaši,

stalni su zvir baroknoga blaga

kaj nam na dušam spisuje traga.

Ali, kaj se to v kmici po gradu čuje?

Zakaj i v polnoč čuden zvon posluje?

To cinkuš znovič bokčiju oplakuje,

bokčiju vu sercu, kak Jezuš na križu

koji nigdar nie nekšno zlo počinil.

A itak – vubili ga jesu črni potepuhi,

kak da je vse hudobe svieta skrivil.

__________________________________________

nezahoden, neprolazan – čarovna Ükatula, čarobna kutija û ajngeli, anđeli û vu pavučini, u paučini û tie (toti) kipci, ti (ovi) kipovi – prav, upravo (zapravo) – pajdaši, prijatelji – zvir, izvor, izvorište – v kmici, u tami, mraku – zakaj i v polnoč, zašto i u ponoć û cinkuš, pogrebno zvono – znovič, iznova, nanovo – bokčija, sirotinja, siromaštvo – nigdar, nikad – nie, nije – itak, ipak – potepuhi, skitalice, dangubice – hudoba, zločestoća, zlo

ZVIRIŠČA ZAVIČAJNA

Od Zrinskoga i Mohača

do aleluji i korbača û

jezik naÜ hi×ni, domači

i od ognja bil je jači.

Kak stekli pesi so lajali

i rieči stranjske bajali.

Ar, kajkavščina kakti cviet

ostala je naš cieli sviet.

Posluhni tu mužiku rieči

kak najlepÜi smieh deteči:

to su zviriÜča zavičajna

na vusnici zemeljskog raja.

I zajdna večera gda dojde,

brez rieči domačih ne projde.

Pa kak da jih ne pamtimo,

ak jih vu sercu nosimo?

__________________________________________

zvirišča, izvori, izvorišta – hižni, kućni (materinski) û pesi, psi – rieči stranjske, riječi strane (tuđinske) û ar, jer – deteči, djetinji – vusnici, usni – zajdna, zadnja, posljednja – ak jih, ako ih

VU GRADU BAROKA

Gleč, kuliko zlobnikov vu gradu baroka

govori laži! Mašeju z političkom botom

kak Jude kaj furt čučiju za plotom,

a faliju se z poštejnem. Nit soza z oka

nemre jim ziti, farizejom prekletim!

Oni i licemerstvo držiju svetim.

Gdi su oni zlati cajti prave finoče

i spoštovajna? Denes i zajdni šuft hoče

gospon biti, i zapovedat, tolnačit pravicu,

prem je več pijan došel v pivnicu!

Zakaj vre ništ nie kak negdar je bilo,

niti more biti? Za poštejne se tre boriti,

a na huškače se ne bu pozabilo...

__________________________________________

mašeju, mašu (vijore) – botom, batinom (palicom) – furt čučiju, stalno (pritajeno) čuče – faliju se, hvale se – nemre jim ziti, ne može im izaći (poteći) – zlati cajti, zlatno doba – šuft, hulja, podlac, nitkov, ništarija – tolnačit pravicu, tumačiti (propovijedati) pravdu – prem, iako, premda – zakaj vre ništ nie, zašto sad (danas) nije – more, može – tre, treba

NA STANČIČEVOM PLACU

Znal sem se sesti na Stančičevom placu

a očutiti morje, njegvu gliblinu,

zaprtu vu plavu steklenu kacu

(morti flašu?) hičenu vu plimu.

Tak čutim morje, znutra, a večernica

pri uršulinkah tekar se začela.

Nad Starim gradom tanca coprnica –

džoint zavlači se v mlada tela...

Se to v mojem oku čudež dogaja

gda vidim morje vu srcu Grada?

I zakaj se himba s pravicom pogaja,

pak pajdaš pajdaša nema rada?

Gleč, v poruki svoji Stančič je pisal

zakaj morje nigdar nie risal:

Varaždin bil mu je jedina mera

z kojom je rasla njegva vera.

__________________________________________

očutiti morje, oćutiti (osjetiti) more, gliblinu, dubinu – steklenu kacu, staklenu bačvu – hičenu, bačenu – znutra, iznutra (u sebi) – tekar, tek (upravo) – tanca coprnica, pleše vještica – čudež dogaja, čudo događa (zbiva) – pogaja, pogađa (kladi) – nigdar nie, nikada nije

MALA POPEVKA ZA VIKTORA

Ajngeli, zlati i kuštravi, kak dečeci,

ne stanujeju listor po svetih nebesih,

oni so brezmerna radost nas stareših,

takaj i Božji vzorec denešnjoj deci,

ovdi, na zemli. A vse moje živlenje,

ako poglednem za sobum, znovič,

v sercu se vnukeca stislo, kak ftič,

i vuživa, senja svoje najlepše senje.

Tak se ves smisel svieta, najemput,

preobrača vu mladu sreču, cveteču:

ajngelek Viktor se v dedinom oku žari.

Je to dar od Boga, morti jedini put

za onu lubav vekvečnu, svetleču?

Vu miseli moji Viktor vesel živi.

__________________________________________

kuštravi, čupavi (neočešljani) – listor, samo (jedino) – brezmerna, neizmjerna – stareših, starijih – takaj, također – vzorec, uzor (uzorak) – ovdi, ovdje – vse... živlenje, sav... život – vnukec, vnukeca, unuk, unuka – senje, sanje (snove) – ves smisel, sav smisao – najemput, odjednom – cveteču, cvatuću, rascvjetanu – ajngelek, anđelak – morti, možda – svetleču, svjetleću, osvijetljenu – vu miseli, u mislima (zamišljaju, pamćenju)

BAROKNE VEČERI 2010.

V naši katedrali so gnezda baroknih glasih

vre četrdeset jeseni. Za malomešnjaka

preleva se muzika vsevremenska, jaka,

na vse strane planeta. Vsaka bol se gasi,

a zvezdani koncerti Johanna Sebastiana Bacha

srčni publikum ostavlaju brez daha.

Odzgor, s koroša, nebeski orgel popeva,

vuskrsavle zdavne slike na ekranu noči,

kak da nas z neba glediju Božje oči.

Vu nadrima cirkve Višnjin* čembalo miluje

našu dušu i telo: to poj ajngelov se čuje

z njenih čarovnih prstih na klavijaturi

gda tenje plešeju po sunčani vuri.

Festival baroka kinč je Varaždina,

ali i vsakoga domovinskoga sina,

most prama večnosti, zviranjek sreče.

Po vulicama Grada, gleč, megla se vleče

kak mlieko stoletja – duševna hrana.

Idemo spati. Ar, gliboko v nami

čutimo muziku serca. I nesmo sami.

__________________________________________

glasih, glasova (zvukova) – malomešnjak, rujan – srčni publikum, srdačnu (vjernu, oduševljenu) publiku – koroš, prostor za (pjevački) zbor – orgel, orgulje – vuskrsavle, uskrisuje (probuđuje) – glediju, gledaju – vu nadrima cirkve, u njedrima crkve – * Višnja Mažuran, istaknuta hrvatska čembalistica, rođena Varaždinka – čarovnih prstih, čarobnih prstiju – gda tenje, kad sjene – kinč, blago; bogatstvo (preneseno: zaštitni znak) – zviranjek, izvor; zdenac – megla se vleče, magla se vuče – kak mlieko stoletja, kao mlijeko stoljeća

VELEMEŠTER ZA KLAVIROMJurici Muraju, vu spomen

Na Olimpu, gniezdu horvatskih pijanistih

niti jeden nie bil kak Murai – isti:

njegva je zviezda furt jarko bleščeča,

a niežna i mehka, kak duša deteča.

Po tipkah klavira so umetnikovi prsti

izvlačili čudesne zvuke, kak na vrsti

ajngelskih svirača. A notni materijal,

i najtežeši, on je navek napamet znal.

Samozatajen v živlenju, a velki znalec,

tihu mudrost je širil, kakti genijalec.

Mir je v sebi nosil i mir daroval

vsim prijatelima z kojima je drugoval.

I v zdravju i v betegu rad je imel ljude;

jednak se trudil da i vu Horvatskoj bude.

A rodni Varaždin vu srcu je nosil, zmirom:

akademik Murai – velemešter za klavirom.

__________________________________________

velemešter, velemajstor – niti jeden nie bil, niti jedan nije bio – furt jarko bleščeča, stalno (trajno) jarko blistava – najtežeši, najteži – navek, uvijek – velki znalec, veliki znalac – kakti genijalec, kao genijalac – v zdravju i v betegu, u zdravlju i bolesti – rad je imel, volio je – zmirom, neprestano

ZNAM JENO MESTO

Znam jeno mesto gdi mesec putuje

po plavoj plahti neba, kak da kušuje

pozableni lubavni par, ki se šeče

po Jagičevom parku. Ili to veter šepeče

naše senje, draga, kaj sme jih risali

v topli posteli, i stiha z vnukom dihali,

da ajngeleka ne bi zbudili?

Znam jeno mesto, draga, i malo dvorišče

prekpuno cvetja, z lastavičkom kaj pivče

spod krova hiže, prav vsaku večerku.

Več zutra bumo vugostili našu čerku

i sina, i familiju celu, radujuč se žitku

kaj nam ga hočeju zatrti, sfundati,

i očivesto nas žejne prek vode prepelati.

Znam jeno mesto kaj nemre se fkrasti:

vu zrnju je istine, gda pomažemo ji rasti.

Ali, koga još denes istina interesera?

Istina i lubav, mila, skradnja so nam mera,

naš ščit i snaga nasprot falšnoga živlenja.

Buju došli i cajti svetla, doba vuskrsenja:

vu žilam bu nam lepota tekla, brez trplenja.

__________________________________________

ki se šeče, koji (se) šeće – veter šepeče, vjetar šapće – stiha z vnukom dihali, potiho s unukom disali – dvorišče, dvorište – z lastavičkom kaj pivče, s lastavicom koja pijuče – prav vsaku večerku, upravo (gotovo) svake večeri – zutra bumo, sutra budemo (ćemo) – žitku, životu – sfundati, uništiti – očivesto, očito, očigledno – žejne, žedne – kaj nemre se fkrasti, koje se ne može ukrasti – skradnja, zadnja, posljednja – ščit, štit (zaštita) – nasprot falšnoga živlenja, nasuprot pogrešnog (lažljivog) života – buju došli i cajti, doći će i trenuci (vrijeme) – vuskrsenja, uskrsnuća (preneseno: spasa) – vu žilam, u žilama – brez trplenja, bez trpljenja (preneseno: bez životnih nedaća).