ČISTAM ČISTA SIMFONIJA
(sakoga leta, v pet vur vjutro v mojem vrčeku)
Jošče čudaj prelepoga ima.
Se je trebaš zastanoviti.
Mam se zabremzaj:
Očuti, dotekni, polukni,
Gleč, posluhni, podišaj.
Čkomi, čkomi, čkomi!
Se povrni, k sebi se povrni.
Zabludeli sinek, dete zgubleno.
Seposut solnce seje živlenje
I jošče živiju naše senje.
Solnce spi v mojem raju zelenom.
Tiči se stopram sprebudili.
Vuzvišen, drugač spravlen svet.
Zelena melodija igra.
Vužiga me znutra,
Nepreceniv mi darek spravlaju
Tiči i zeleno dvorišče.
Po leti v pet vur vjutro
Svet brez himbe, brez penez,
Brez shoppinga, brez cajtungov.
Svet brez fast fooda i autof.
Post od zemalskih bedastoč.
Hiti snet zi sebe, čovečec,
Smrdlivu opravu vezdešnju,
Zbrčke kaj ti ostavlaju.
Naj jemat tuje delance i zmešancije.
Vuho k zemlici i nebu pristranči.
Lepota je tu, za vuglom.
Špileraj tičjih spelavanja:
Melodija tičof i cvetja.
Veselica s čutkom vekivečnosti.
Neraspadliva lepota,
Premilo rezigrano dvorišče.
Nezatrujen moj gaj veseli.
Lepota leta i letečih tičof.
Zelena mi spokojnejša nutrina.
Ne dam ju dotikavat!
Ne dam ju bantuvat!
Nigdar nikomu ne dam!
Čistam čistu simfoniju
Mojega vrčeka i tičof
V pet vur vjutro
Sakoga leta.
_________________________________
zastanovit, zaustaviti – stopram, netom, jedva – sprebudili, probudili – zabremzat, zakočiti – mam, dmah – povrnut se, vratiti se – vužigat, upaliti – snet, vrsta nametnika na žitu –vezdešnji, sadašnji – špileraj, igrarija – spelavanja, dogodovštine, nestašluci – nezatrujen, nezatrovan – dotikavat, dodirivati – bantuvat, uznemiravati – čistam, sasvim, potpuno
FSUKANEC
(gluhima na Boži glas)
Na zgled bleščeče
V nuternji hudi vleče
Štangu bolvanu drži
Vište, ljudi
Praf nam budi
Rogomenta, jezikom blesiče
Kam hoče nas hiče
Fsukano bogečko telo
Ni kričati je ni moči
A hudi šviga, se zmikava
Štrmla naša poterplenja
Se hinca i muti
Človečeca guti
Nenaviden, lakoten
Pod kožum nam se smiče
Kesi, ščiple, kostruši
Vugniti se?
Vu se se zapreti?
Bogek, Bogek
Kam se deti?
Zeslekel, zgnjel
Zadušil, oplendral
Zahitil, zmuštral
A ščvrkjeni ocvarek
V čemeru ostal
Obleka od lufta
Košta nežmahna meglina
Sagdanje zdenavo pozdravlenje
Pozdravlenje od šufta
Se sfalelo, se zelo
Se rezdrapalo, se zeskublo
Ostal jedino spigani
Goli tič na goloj vejici
Prezebli tič na kmičnoj stezici.
_________________________________
fsukanec, koji se smanjio, uvukao u sebe – zgled, izgled – bleščeče, blještavo – nuternja, unutrašnjost – vleče, vuče – štangu držat, davati podršku – bolvan, poganin – vište, pogledajte – rogomentat, praviti buku šviga, juri – zmikava, izbjegava – štrmla, gricka – muti, zabavlja, igra – nenaviden, zavidan – lakoten, lakom – smiče, klizi – kesi se, zlurado se smije, ceri se – ščiple, štipa – kostruši, kostriješi – vugnit se, maknuti se – zapreti, zatvoriti – deti, staviti – zeslekel, razodjenuo – zgnjel, stisnuo – zadušil, ugušio – oplendral, pokrao – zahitil, zabacio, podcijenio – zmuštral, izmučio – ščvrkjeni, stisnuti – nežmahna, neukusna – košta, prehrana – zdenavo, hladno – šuft, hulja – sfalelo, uzmanjkalo – zelo, uzelo – rezdrapalo, rastrgalo – spigani, savijeni – vejica, grančica
DRVENI CUJZEK
Drago prekapanje
Po dragim cajtim
Štiklec jen se zbrdil
Štiklec jen lubleni
Senja najtoplejša
Najdragša senja
Del mega živlenja
Si znate jenga
Priprosti cujzek jen
Za srčeko prikelen
Ne šviga i ne plahuče
Za sebom niš ne vleče
Majcikin fakinček
Lepotan moj i dobriček
Nigdar nikomu ga ne dam
Kaj on žuga decu sim-tam
Vrabec ga mali dal
Spopal me i nekakof žal
Ne bu on ničesa vlekel
Kak je mili gdo bi rekel
Vu senje se zanavek zavlekel
I kak da mi stiha povi na vuha:
»Điha, điha, điha...«
_________________________________
cujzek, konjić, ždrijebe – štiklec, pikanterija – zbrdil, naglo krenuo – švigati, juriti – prikelen, zalijepljen – žuga, njiše – zavlekel, zavukao
ODA BEZGI
Slatka dišečina, rožnjačka belina
Reztancana mladenka
Vu svatovskomu švungu
Z dolenskim vetrom muzikantom,
Bezgica, angelkica.
Vajnkuš moje podvečerke,
Pestovana zgledna curičkica.
Šlingano ti poštirkano rubje,
Bela opravica kak prava kralica.
Bezgica, angelkica.
Veje zlatne rukice
Cveteki prkleki
I bele lasi caknaste
Gdo ti klajdicu cifrastu zešil?
Bezgica, moja angelkica.
Tvoja belina, moja milina
Tvoja dišečina močnejša od vina
Bela i poklem črna kralica
Hočum te od zloga skriti:
Moraš lepo v klošter iti.
_________________________________
bezga, bazga – rožnjačka, svibanjska – reztancana, rasplesana– podvečerka, sumrak – poštirkano, škrobljeno – veje, grane – prkleki, prstići – cifrast, ukrašen – klošter, samostan
POSVITEK
Objemlemo kupčeke spomenkof
Kuražno prijemlemo korbice živlenja
Dobričkoga, milosrdnoga
Nevalanoga, zasmrajenoga
Rezrinutoga, đunđa falšlivoga...
Malčice zežmiknulo
Malčice požugalo
Pak popljučkalo
Poklem pocartalo
I ni nam se durit i furit
Če vu krameraju zdihavamo
Il si pak med tejami vugajamo
Če nas vihri pohitavaju
Il cukorpekari dodelavaju
Ni se smeti splakavat
Svetek se pririhtava
Treba je biti kak spada
Do smo je?
Se posnažit i vu red deti
Pak se ščuđavaš?
On ti pleča obrnul ne bu
I ni ti se smeti vu se zapreti
I nigdo ti ni liht rožice zatrl
I nigdo te ni nasmical
Si ne došel vu šrafštok total
Kaj tu je posvitek On ti je dal
Bi povedali: sfrkano krpje
A zapraf?
Vtišenje turobne dušice tve.
_________________________________
posvitek, okrugli jastučić (podmetač na glavi ispod tereta) – objemati, grliti – kuražno, hrabro – prijemat, primati – korbica, košarica – zasmrajeno, uprljano – rezrinut, proširen, razguran – đunđ. biser – falšlivi, lažan – zežmikan, ocijeđen – požugat, poljuljati– popljučkati, popljuvati – pocartati, pomaziti – furiti, ljutiti – krameraj, starudija, ropotarija – zdihavati, uzdisati – teja, ruža – vugajati, ugađati – vihri, vihori – pohitavati, pobacivati – cukorpekar, slastičar – dodelavati, dorađivati – pririhtavati, pripremati – posnažiti, počistiti – ščuđavati, čuditi – zapreti, zatvoriti – liht, svijetao, jasan – zatrl, uništio – nasmical, prevario – šrafštok, škripac – vtišenje, utjeha – sfrkan, smotan – tve, tvoje
POŠLJI SVETLOST NAJ ME PELJA...
(mameku, japeku i detešcu)
Sako malo se zmislim
Spitavam
Ziskavam
Zateknem rožicu
Sesvečakovu suzicu
K mrzlomu kipecu
Otajna mirnoča
Otajni drem
Prek na prek
Vužiže
Misel se zadela
Na križišču se zgubila
Kam, zakaj,
Gda se vrne?
Bog zna
Bogečko telo
Tuje i fsukano
Al telo poveda
Poveda, čudaj poveda
Vezda i vsigdar:
Ljudi, ljudi
Resvetlite kmicu
Nafčite, nafčite,
Zajdni su cajti,
Nafčite, nafčite
Ne obrnut pleča
Japeku, mameku i detetu
Na tom zasmrajenom svetu
Čoveka videti,
Nafčite, nafčite
Videti čoveka,
Biti kak sveča
Tiha, mirna, čkomeča,
Dugovečna i svetleča.
_________________________________
pelja, vodi – zmislim, sjetim – spitavam, ispitujem – ziskavam, tražim – sesvečak, studeni – otajni, tajanstven – vužiže, (u)pali – zadela, zapela – tuje, tuđe – fsukano, usukano (tijelo) – poveda, kaže, govori – vezda, sada – vsigdar, uvijek – kmicu, mrak – nafčite, naučite – zajdni, zadnji, posljednji – cajt, vrijeme – čkomeča, šutljiva
ZMRŽENEC
Ne cendra i ne cmizdri
Živlenje sprekleto
Živlenje smusko
Na kaj more čoveka deti
Na kaj dopelati
Samec, kaj curek na krovu
Ga zimica stepavle
Ga bogeca zebe
Cajti hudo zanoftali
I glih zmrženi se primikavaju
Srebreni, beli, caklasti
Sprezebeni cajti
Kam smuknut?
Gdo zo tim kormani?
Zločica, mukica
Tiščat, vriščat
Živlenje v zahajanju
Zdeno i ozimelo živlenje
A tak bi se rada stopit
Prosta čovečja potreboča
Furunica, tople reči
A ledenbati pritiščeju,
Kaj stekli ščipleju
Ozebline duše i tela
Sturoben, sprezeben
Kaj špičasti curek na krovu
Špičasto, srežnato živlenje
A tak bi se rada zegreti
Tak bi rada poleg nektere sedeti...
_________________________________
zmrženec, smrznut čovjek – smusko, sklisko – deti, staviti – dopelati, dovesti – curek, ledena siga – zimica stepava, groznica trese – zanoftat, jako nazepsti – primikavati, primicati – caklasti, blistav – smuknuti, pobjeći – gdo, tko – kormaniti, upravljati – zahajanje, zalazak – stopiti, ugrijati – furunica, pećica, mala peć – ščipleju, štipaju – srež, inje – špičast, šiljast – zegreti, ugrijati – nektere, nekoje
TURBO, JUMBO ŽIVLENJE
Zazivlem, iščem, slifkam,
Mučim se h veter:
Posiveli bušpani
Skamejene murve
Zmrženi kostanji
Hmiruče lipe
Vehnuča plačuča brajda
Zginuli trnaček
Sadje zarmirali.
Zdenčeka vubili.
Jorgovana zesekli.
Turbo živlenje,
Jumbo živlenje.
Morje betonsko
Ti dojdeju frazi
Kak žlajdre oko čoveka
Stene, mejaši, limesi
Ograjenci, ploti
Grenka zaduha žlajdri
Vuzi seposut:
Kadi je čovek?
Kadi se zatepel?
Posikut kamenje i betoni
Posikut ciglini i zidi
Čoveka nigdi, mi se vidi,
S sami asfaltni funduši
Kj čoveka duši i duši.
Zazivlem, iščem, slifkam,
Mučim se h veter...
_________________________________
slifkati, bolno jaukati – mučim se h veter, uzalud se trudim – bušpan, šimšir (vrsta ukrasnog grma) – murva, dud – sadje, voće – zeseči, sasjeći – jumbo, velik, krupan – turbo, jak, silan – posikut, posvuda – frazi, živčani napad – žlajdre, lanci – limes, granica – ograjenec, ograđen prostor – grenki, gorak – zaduha, smrad, zadah – seposud, (po)svuda – kadi, kuda, gdje – funduš, imanje (kuća s okućnicom) – duši, guši
KE NE?
Če bum moguča, ke ne?
Nazvestiti nove farbe živlejnske
Zabit štrenk sfrčkanih tentacij
Objemat štrcle oblizečnih cajtof
Če bum moguča, ke ne?
Spudit trdajnke i ostajnke
Poiskat svetlinu čemerno tiščečega srčeka
Zesnažit plesnivoču hotenja negdašnjih
Če bum moguča, ke ne?
Zmeniti nampak nafčeno
Dolgočasno navajeno
Čistam nahero nasajeno
Če bum moguča, ke ne?
Žufku žufkoču rezžufkati
Smrdlivu smrdoču odsmraditi
I Bog te veseli
Vu toj krutoj, najžmefšejšoj kmici
V puščini i zimici
Ja iščuča, če bum moguča, ke ne?!
_________________________________
ke ne?, zar ne? – če, ako – biti moguči, moći (opisno: budem li u mogućnosti) – nazvestiti, najaviti – farbe, boje – zabiti, zaboraviti – štrenk, strogoća – sfrčkan, zbrčkan – tentacija, napast – objemati, grliti – štrcli, ostaci odrezane biljke na polju, npr. kukuruza – oblizečen, ukusan, fin – cajt, vrijeme – spuditi, istjerati – trdanjek, tvrdi predmet – ostanjek, ostatak – tiščečega, pritisnutoga – zesnažiti, očistiti – zmeniti, promijeniti – napak, naopako – nafčeno, naučeno – dolgočasno, dugotrajno, dosadno – na hero, ukoso, nakrivo – nasajeno, nasađeno – žufko, gorko – kmica, mrak – puščina, pustinja – iščuča, tražeća – najžmefšejša, najteža (koja se najteže podnosi) – kruta, jaka
KRESNICA
Žmignila mahana
Leteča dildajčica
V gluhu se kmicu hputila
Kuražna lučica
Mala fletarica
Ivajnska mušica.
Se črnine ne boji
Nit ne zabrduha
A nima ni oka ni vuha.
Malo svetleče čudo bože
Vesela žerjafkica
Sitnička, mučliva dušica
Živa žmigava žerjafkica
Dragička malčica
Lampica, kmičničkica
Trepetlika drobna nočna
Do bi rekel kak si močna.
_________________________________
kresnica, krijesnica – žmigat, svjetlucati – mahana, mala – dildajčica, zvrkić – hputit, uputiti – kuražen, hrabar – fletarica, skitnica – zabrduhat, zalutati – dušica, krijesnica, ivanjska mušica – kmičničkica, umanjenica riječi kmica, mrak – trepetlika, trepetljika
Suvremena kajkavska pjesnikinja Željka Skledar živi u Zaprešiću, gdje radi kao pedagoginja na Osnovnoj školi Antuna Augustinčića. Od 2000. godine sudjeluje na svim recitalima hrvatskoga kajkavskog pjesništva, a dosad je objavila i četiri samostalne pjesničke zbirke: Nina, nuna... rieč domača (2003.), To ti nosi ptica lastavica (2006.), Mali mili nepozabek (2007.) i Mam rada (2010.). Pjesme iz ovog izbora u »Kolu«, uz tri dosad neobjavljene, prenosimo iz njene posljednje zbirke Mam rada, za koju je autorica nagrađena književnom Nagradom »Katarina Patačić« (za 2011. godinu). Ovu godišnju nagradu za najbolju kajkavsku knjigu, prema odlukama stručnog žirija, već desetak godina zajednički dodjeljuju Varaždinsko književno društvo i Ogranak Matice hrvatske u Varaždinu. (Op. ur.)
4, 2011.
Klikni za povratak