DVA BORI
kej ti je živeti na svetu
niš
vrpa jelove drv kej ju treba odvesti v tačka još bole v trkaču
na drvocep
osušiti spiliti poduž
morti buju komu gda za kakve letve za na krov za prlke na plot
da očeju goreti da je bukovina grabrovina pokurili jih bi
i dobro bi se nagreli
al kej buš z jelovine drva pilil
i tak dva bori visoki
kak mrtviki dva
v grabe ležiju
vetom su se zeleneli i rasli tulke leta
nesmo jim mogli gode prebrojiti kak su gusti
tak su veliki bili da spod nih niš ne moglo rasti
mater je i cvetnik zapustila
kej je je bilo najmilneše od mladosti
i najemput one z elektre je rekel da smetaju za struju
jel buju jih zrušili oni jel očemo mi sami kak očemo
a i kak bi jih zrušili kunst je to moreju lefko na krov opasti i hižu i vhiže
se zdrobiti
mene su poslali v selo šalit se da dete ne bi gledelo
(da ne bi pak tulilo kej gda su agaciju staru kre balenove kovačnice
sfundali
z ne su barem lepi sud zdelali
za rakiju)
mater je mam imela takaj nekakvoga posla v selu
a tata jim je sam pivu potočil
posla je to
tulke leta z živoga v mrtvo prepelati
čas posla*
___________________________
* kej, što – vrpa, hrpa – trkača, kolica s jednim kotačem za ručni prijevoz tereta – prlke, letve – nagreti se, ogrijati se – vetom, nedavno, upravo – cvetnik, cvjetnjak – zapustiti, prestati uređivati – kunst, majstorija, umijeće – lefko, lako – sfundali, uništili (srušili) – z ne, iz nje – zdelali, izradili – tulke leta, tolike godine – prepelati, prevesti
POSTEL
kak si prestreš, tak buš si i legla – moj joča mene
kriško je grobje i malo i veliko
cesta ga je presekla i navek si mislim jel se prek mrtvikov vozimo
brkani su si na velikom
imam ja to kej obehadžati
stric ne štel žnimi kej su na babu nekakvoga pršu zakopali
valda nesu grobarinu platili
vuz strica je braco negov sin dečkerec
menši je bil neg sad moj
a moj jotec pak ne štel neg svoj grob
(kej bi v tudži
ni na tudžega ficka sečiju kej još veliku ne legel nigdar
rajše bi na golu zemlu)
z nega se lepo dalko vidi
prek prek česme
da je to v polske klup bi postavili i ja bi tam dalko gledela
i z tatum se tak spominala
i mislila si
kej i gda pučemo drač
i sadimo cvetje i mečemo svilno z kine
i vuz put zapalimo sveče
kej i gda se sečam tatine čarap vesti sive i plave
na kare
jene kej je tu i tam moj nosil
i jene kej sem ja imela sintetika (ciganica je takve tržila po selu)
i košule pepita kej je mama najemput zdrapala
za krpe tak je je došlo
viš da se razišla je rekla
a ne
tak mi je bilo žal nekak kej da mi je još imela duhu po tate
a de bum si ja grob zebrala
kej postel udobno bi mama rekla di je samo zela tu reč
(a i kak to reči v kekavskom jel kajkavskom
jel je vu tom kej udobnoga)
toga ni v reči pri nas ne
ne mramorni i ne da moraju moji podsadžati gda vkradne ko cvetje
nek kej ivan goran v planini mrkloj neki mi bude hum
prestirem si kej strožu z koruzijna je samo z komušine z slame kej blagu naštrajim
listinu kej v šume grabrove bukove lepe
kakva je samo mene lepa
malo zelenoga i malo plavoga kej da pijem kavu vuz more
v malinske jel negde
če nemrem gledeti dalko
prek
naj gledim visoko*
___________________________
* grobje, groblje – si, svi – obehadžati, obilaziti, posjećivati – ni štel žnimi, nije htio s njima – dečkerec, dječak, momčić – menši, manji (također: mlađi) – rajše, rađe – klup, klupa – mečemo svilnu, stavljamo svilu – tržila, prodavala – tak je je, tako joj je – duha (duhu), miris – podsadžati, posaditi (neuspjeli dio sjetve ili sadnje) – strožu z koruzijna, ležaj od kukuruzovine – naštrajiti, prostrti stelju za stoku – listina, suho lišće
PUNO LEPE POZDRAVOV
sekam sem rado išla od male malosti kak veli moja mama
k babe na potok
z kumu balenovu prek v prigorje
a čistom nekaj drugoga k tetke v zagreb
kraj toza i vojničkoga
se sem morala pojesti
i saki se dan kupati v veškoritu
i spati v podne a zmed toga smo se igrali i gledeli kak saki dan nekomu rušiju hižu
kej je po noči napravlena
mam bi drugo jutro hiža več bila tu
a tetka je v dvorišču istom nekakvu šupicu delala
rekla je da bum doma ajnzeckartu napisala
kak mi je i kej mi je najlepše
na črnom je gruntu bil lepi zumbol beleši
valda rozi
i ja sam napisala kak je i k tetke došel isto inšpektor
pitat
što to grade
i rekel da to ne bu tak išlo
da se to tak bome ne dela
a tetka je vikala kej bu na vece onda išla na opčinu črnomerec
i on je otišel i rekel da bu poslal rešenje
sa sreča da sem z olovku pisala
da je tetka se mogla lepo zbrisati
i da sem ja kak se šika onda napisala
puno lijepih pozdrava iz bijelog zagreba
onak kak se z morja pošila puno pozdrava s plavog jadrana*(Zagreb, 26. listopada 2007.)
___________________________
* sekam, svukuda – od male malosti, od malih nogu – TOZ, kratica za Tvornicu olovaka Zagreb – vojničko, do 70-desetih godina ispod TOZ-a vježbalište JNA – veškorito, korito za pranje rublja – hižu, kuću – ajnzeckarta, prema nj. Ansichtskarte: razglednica, dopisnica s fotografijom – na črnom gruntu, na crnoj pozadini – Črnomerec, stari zagrebački kvart uz istoimeni sljemenski potok – kak se šika, frazem: kao što doliči
ŠAJTOFLIN
kupim nove šajtoflin i setim se da bi poiskala tatin
negde sem ga spravila
one jen kej ga ne mejnal leta i leta
i nosil ga je sekam v zajnem žepu od lač
do zajnega
kak ja z jenoga v drugi šajtoflin
a jenoga su mi i dvaput krali
prenašam i nanašam kamen
zeleni
kej mi je bože gda je to bilo jena cura dala da ga gda god malo
z prsti ztoplim
tata je nosil sobum v šajtoflin pospravlenu
majčicu božu
v nečemu srebrenom a morti i ne srebrenom zaprav
z crlenim steklom naprvo
nekej jeftino
kej z bistrice jel
z negve kaštige prek čažme nemačke bosne i križnoga puta domom
nazajne
nazaj
če i ne nigdar k meše ni k majke bože kak drugi hodil
gda se išlo i gda se ne
navek je govoril kak je nega negva majka boža sekud čuvala
bole neg prava mater
ne znam kej bi rekel na to kak nekoji v jobluku na steklu majčicu božu vidiju
bi rekel da vuz to kej sega na svetu je ona nema čas za tak nekej zdelavati
a meni se nekak vidi da ju saki dan
onakvu z malem
zagledim v izlogu med onemi bebami kej sukne nove prikaživaju
i da mi namegne
kak i gda se prevezem vužnu tam de stoji
v kostimu (tak modernomu kej da ju je vesna v najbolše leta zešila
prede neg su ju v stečaj malem hrvatom veliki hrvati otpelali)
v zvonimirove negda socijalističke revolucije
elegantna*
___________________________
* šajtoflin, novčanik, lisnica – sekam, svuda – v zajnem žepu od lač, u stražnjem džepu hlača – prenašam i nanašam, prenosim i nosim (svukud) – ztoplim, ugrijem – (Marija) Bistrica, najpoznatije hrvatsko marijansko svetište u Zagorju – negve kaštige, njegove pokore – če, ako – meša, misa – v jobluku na steklu, u prozoru na staklu – nekej zdelavati, nešto izvoditi
V NEDELU DOPOLDAN
moja kej sneha gore je v nive šute z nekakvu kej glumicu
kej je glumila v brechtu
lafraju se smejuč kej v mladenke
črne
i vusnice su si začrnele
i jena i druga
kej jana mičina negda gda je tak pripovedaju čerkeze sa črna z hiže v stra natirala
kak bi se cure smejale z toga da jim to spripovedam
dole mi je sin
z nekakvem srbijancem blogerom kej od rata žive prek
v strasbourghu
tu si i tam nekej vičeju i dovikavleju jeni drugem
smejuč se kej da razmeju
kej one drugi viče i kej da je sem se to ne znam kak smešno
a mi tak i tak v naše šute v televizor gledimo
kojekej
kej v nedelu popoldan čez jobluk jel na lese v ljude kej nekam
ideju
i se mi to zgledi kej gda sem mala malovena bila
gda su se moji tekar podelili
z brkanom
i si smo mi tri
kej živeli v jene šute dale za vederjnakom naspram zdenca
i kopajne za blago napajati
prek zajne v ganku
imeli smo peč kozu (onu kej ju zimam nazaj z druge pesme)
zgledela je kej da bi samo kosti ostale od kakve zidanice
sa črna če ni zgoreti ne dospela
za dve je zime pregorela kak je je lim tenek bil
i stol z dva štokrlini dva tenera limena dve žlice
jena žličica i jena rajnica nekakva pojmica
i moj črleni lonček
v nedelu dopoldan gda bi se pričasili
(gda se skorom sekak saku nedelu
išlo jel k zornice jel k poldanice jel k večerne)
k tate su muži i dečki dohadžali šišat se
pokril bi sakoga z nenakvem rupcom da jim lasi ne bi curele za vrat
i grizle jih
nekoji bi se slekli jel v belu čistu potkošulu jel prek do pasa
a nekoji bi se falili kak su se snočka na zabave potukli
zmej sebe rad cur
z prlki a tu i tam i nožmi a trucali su se i z pištolama
imel je i češel samo za šišajne
z mašinicu ga je pospravlal dole v jormar levi
pred šišajnem bi si saki dečko malo glavu v lavoru namočil
tata ne bi moral ni reči
a babe i cure
v nedelu dopoldan gda se na ringu juva kuvala a v rolu se če je bilo kej peči peklo komačec mesa z paca a morti i zlevani kolač
hodile su k mame sukne sprobavat
mater je celo švelo imela v male košarice lepe scifrane za prigled
nositi
če bi ju ko prijavil da doma šiva a porez ne plača
jel da čuje da porezniki peju iti tirat okoli
da mam more z tem nekam pobeči
nekoje zdalšega babe su se navrnule vuzput iduč
k meše jel od meše
lepi štrapac
mam bi znali koja kam pe če bi delila del meše naveke
nekoje je trebala nova svilna bluza za duhove
nekoje novi šos legani za zabavu vatrogasnu vajnsku za prve maj
a nekoje i cela sukna
nekoje šlafrok za v bolnicu od cica
za prosto kuta z crnoga glota kej za v iti školu
navek je mama imela ne pametim več de je zela
žurnalov i novu modu z pariza
paris france
jemput je bilo mondiš na frandže na resice
se operseno kak i denes gledim
i de koji gumb veliki neoblečeni jel z dve jel z četiri lukne
jemput proste kerice
jemput volani karneri falde olfalde
pocigano gloklin legano
podsukne od onoga kej je trebalo šterkati da bi šršalo
i tak teško peglati
i pleserati
tu i tam kraglin beli popelin jel naštikan rišelje
organdi šifon krepdešin šantung til
gumilastika
trebalo je se to priflancati
v male šute z dva tenera dve postele dva jormara
spariti gumbe tu i tam štepsajdu kej je sfalelo
poštukati poheftati
negda je tata moral mašinu minervu podmazati
ni ne se više ne štelo štepati
al mame je navek ostalo reslinov ne za fertun
i mene za špilhoze nadoštukati
če baš ne bi bilo jako šaro z velikemi rožami
neg z tufnami
i kud kam v nedelu dopoldan gda su se muški šišali
cure bi vragometne rasprle jormar i tak bi se preslačile za raskrilene vrate
samo bi ju bilo videti z rukami v zrak
če jemput če dvaput če triput ak je trebalo
da bu se pasent
nekoja je dečkmi šepitala a nekoja
i štrikala a nekoja heklala jel našvavala štrenice mulineja i šlingola
v klupko prematala
makar je bila nedela gda se to ne dela kak se pričasiš
trebalo je to se priflancati
ajnere i žabice plastrone i špice roze
i tajne znake zmej mušterij tatine i mamine
mama je imela pune zube koncov i bombovačic špenadlinov
ak niš igli iglic za štrikajne heknadlin
a v mašinladlinu drukerov dedekov i babic
kredi sake fele
i cimermansku tintoblajku i hrnadlinov i špangi
joj kak je znala kleti gda bi se te mašinladlin sam obsebe rasipal
cele litanije tak dugo gda se ne bi pobrala
a mene je senak najlepše bilo gledeti kak muški za mamin špiglin
gore spod prsnice znad psihe i za jormar glediju
kej je za vrate
(v šute je za vrate navek stala baltica)
kej to tak muški imaju gledeti za špiglin
babe kej babe
nekoje su imele i velike ciceke
a nekoje i nesu
da je to mužem bilo videti
ja sem sredi postele mej vankuši sedeč se najlepše vidla
su si oblekle nove kumbineje atlesne z širokemi špicami kej da ideju k doktoru v zagreb*
___________________________
* dopoldan, prije podne – v nive šute, u njihovoj sobici – Bertold Brecht (1898.–1956.) njemački pjesnik i dramatičar – lafraju se smejuč, maskiraju se smijući – vusnice, usne – v stra natirala, u strah natjerala – vičeju i dovikavleju, viču i dovikuju – šute, sobe – mala malovena, posve malena – vedernjak, spremište za namirnice – zajne v ganku, zadnje u hodniku – štokrlin, kuhinjski stolac (bez naslona) – tener, tanjur – rajnica, posudica za kuhanje – pojmica, tava – pričasili, našli (sebi) vremena – sekak saku, svakako svaku – zornica, poldanica, večerna, sv. mise (u jutro, u podne, na večer) – dohadžali, dolazili – slekli, svukli – trucali, prkosili – ring, željezni kolobar na peći – komačec, komadićak – švelo, pribor za šivanje – zdalšega, iz udaljenijih mjesta – lepi štrapac, frazem: naporan put – šos legani, suknja »nafaldana« – ne pametim, ne sjećam se – glot, popelin, organdi, šifon, krepdešin, šantung, atles, različite vrste tkanina – priflancati, pripasati – mašina »Minerva«, marka šivaćeg stroja – neg z tufnami, nego z točkama – za raskrilene vrate, iza otvorenih vrata – šepitala, šaputala – pričastiti se, odmarati se (po završenom poslu) – »dedek i babica« drukeri, »muška i ženska« metalna kopča – kredi sake fele, (šivaćih) kreda svih vrsta – mašinladlin, ladica šivaćeg stroja – sam obsebe, sam od sebe (bezrazložno) – špiglin, zrcalo – baltica, sjekirica – ciceki, dojke – mej vankuši, između jastuka
5-6, 2011.
Klikni za povratak