aNAHERO ŠKRLAK
Gordijski vozel stopram čmuli v možđan.
»Naj sam sedeti zmusan, skusman,
bum ti zašila jedro z vihlan...«
»Mura nej morje, se je zahman!«
»Božeka zmirom fali kaj si još živ,
zmed znucanih ladjah i norih gliv.
Spekla ti bodem zlevku od sliv...«
»Život brez morja ves je vdušljiv!«
»Z vira mehura spuhni, tej brburač,
naj v nebo vlezne kak zlaten kotač!
V vižu obrni čmukačasti plač,
z srebrenog srca – prižmeknjeni drač.«
»Dej mi tej zafrik, zlevku, topli kur’žnjak,
bolšeg si najdi, ja sem nočnjak!«
Pinklec na krmi, v žepu dobnjak.
Po Muri plava nahero škrlak.
JUNAK IMEL TRI spanOJKE
Da ih ljubi on se kune,
kak da srebrom vreče pune,
kak da v bačvaj zlato čisto,
sakoj pripoveda isto.
Z sakom on si čase krati:
»Posle vojne buju svati!«
Mari njivu, trsje Kati,
Jani oče dete dati.
Dimu se je vrnul z boja:
»De si, prva ljuba moja?«
Zove drugu, nema mira,
senca vrata mu otpira.
Golub zove tretju ljubu.
Ajngel svira v zlatnu trubu.
Pečeju ga rane vruče,
zadja misel v glavi tuče:
»Kak na nebi Mesec sveti!
Ah, da mi je još živeti!
Ah, da mi je v polje diti,
ah, da mi je vince piti!«
Al’ vu polju trda kmica.
Al’ vu trsju črna ftica.
Majka malo dete doji.
Mrtev junak zvezde broji.
DUDAŠ
Protuletno drago vreme i v popevkah lepoduh.
Kak su v kneji đunđ i kmica, ja sem v sebi potepuh.
Šlajer-šlingu z pavučine, cimer šivle poetuš.
Vdušni lagev, svet coprija, bu požveplal hudoduš.
»Z teg je lagva lehko piti«, z versih šepče negromant,
»da bu Sunce na zahodu, odvečer buš astermant.«
»Daj se brni sim još jempot, vu nutrinu si poglej!
Išče v kneju vre buš zišla. Naj ti Luna bu naprej!«
Kiklu z kudeljaš, zvrtel mi za čas,
ali je, ali nej, copernjak dudaš.
DRAVSKI KRALJ
Mesec z neba v Dravu j’ skočil kak vu škrinju srebrnjak.
Vir drfteči i iskreči vžiže žuhki zrak.
Ispred kalne hiže – viže mumlja vodenjak.
Svetlih lasi zvezde steple, kres preskače dravski kralj.
Odvečer bu z zlatnog dreva slatke hruške bral
i v gluboku, na oblaku, Dravu žmehko pal.
Iz glubine, vu visine znova bu si sel.
Z suhe grane črne vrane v polnoč bu prevzel,
pak bu v dravske glibe ribe i coprije del.
Zvečer tuži, vjutro ruži v cimbal dravski duh.
Kak bleščiju biser, đunđi, ringlini iz vuh!
Kačec-kača luč obrača. Tanca potepuh.
3-4, 2010.
Klikni za povratak