ČKOMINA
Gda se zduojdu misli
i začme praznina...
zmarisal ga je se po spisku
sie je bil... bil je ajnc a – sie plaf...
(pak) f klinču z kmicu
f ringu z živlejnem.
Misel bluodi. Praf naj mu buodi.
Of meč bu trajal onuolike rundi kulike
ti On gore dosuodi...
A ščrbave protuletje je ražnierale
Nike-ice. Niš ni spravlene.
Ni ring ni žnuore ni kamere...
Traka je skuosana-zguožvana.
Zguožvan je naš frtalček neba
i spreličen tak da si več ni ni sličen.
Ma kajgot. Sigde bituon sigde druot.
Niemaš kam. Gda se zduojdu misli
i začme praznina...
brazda spreruovana
ja i suoza f ruopčec zmužlana...
i f ime Oca... i Sina... i...
Čkomina.
KAM SU PREŠLE SIVE GRLICE
Iščem obične sasma obične sive grlice.
Kam su prešle, kam su netraguom nestale.
Jel im zrnevle bile zatruovane
zaorane
sprebrazdane
il su senak bile f pitajnu stare rane,
grlice mi znane, grlice neznane.
Zduošle su se duhe, zlata i tamjani,
morti su ih prešle iskati ili su pozabile prhati
dok su luovci strielali.
Morti sme jih f računala zaprli.
Kam su prešle, kam su netraguom nestale
sasma obične sive grlice.
Kam met tulikemi zemlami z internetom
sprekrižani da ih ni muoči najti.
Spozabili sme prafzapraf iskati
spozabili sme biti mali al senak tak veliki
met zviezdami.
Sme ih sprestrašili. Snizil se bum na svoju
pravu meru i pem jih iskati.
Same ak več ni prekesne...
ZLATEPERSTA BREZ PERSTA
Ganjk je zgledel duog.
Prešel ga je f tri kuoraka.
Ni mu bile do ničesa.
I baš ga je bolela ona stvar za se i sakuoga.
Ma kakva pruoza, ma kakva poetika...
Mučili su ga vuklinki f trsju.
Mučil ga je vuklinek f živlejnu. Sliepa vulica.
Rekli su da f Jadranu hara alga smerti.
Počaril je afte onak male zvišega.
Bile mu je sega dosti.
Ali rodil se je.
Alea iacta est. Kuocka je hičena.
F muorje.
Met muorske pese.
Tam gde je i zlatepersta ostala brez persta.
Kuocka je hičena.
Čorava, čuklava sudbina...
ZAPIS MALUOGA ČLOVEKA
F prastari svitki
leži muodruost svemira.
A ja imam same potkurtani dan
f ražnierani tenisicami
f kruogu z teruoga ni mogel prejti nikam...
Zapisane je
da bi živlejne imele biti nebeska harija
ot svetla i nebeskieh harfi z Črnuoga muorja.
A ja imam same striebiti
kukol z žitka, pruose z pepela.
Harija sega postuoječega i nepostuoječega...
Ščera su spravili pot kuostajne Ivaca.
Avijuon se zdigel gore... f zrak,
on je ostal dole... na zemle...
Prahu prah. Zemla – zrak.
Kmica pak.
Nebeska harija.
Natrunjeni z terinjem sega i sačesa.
... i ne fpelaj nas f napast, več zbavi nas ot zla...
Pišem svuoj zapis
zapis maluoga pogrešivuoga človeka.
Jezuš bu me zbavil ot zla
ali gduo bu zbavil mene
...ot mene samuoga.
MESEČEVE MENE
(Mesečari i... iki, kiki, iki... Lunatiki)
Ruomari dana bejšte vu nuoč.
Sumračna nenaspana jutra hmita f deždžu,
žuote piknje cvietja f čkomine. Zalovili su nas
na puotu za brieg.
Al of sviet i ja rekli sme si se kak mi zgledi.
Nečum se više na britve pelati. Liepe pruosim
saki na svuoju stran. Jutriešnji je ruožičnjak
pretrpel kalvariju nuoči, na rane suol mu siple dan.
I zate muoj čvrčkavi čvrček duše ne mečem te
več na stand-by. Of sviet je onuoakuof kakuof je.
Ne bu se zahuktali cug tebe vugnul f kraj.
Ali sviet je i onuakuof kak f našemu akvarelu
zgledi, raspackane farbe, rastrackane listje, vetri
i strni z našu su ruoku namackani. Mi ruomari,
mi strajnski, mi... f danu zgubleni.
Al niš na ovomu svietu ni za preozbilne zeti
ni sprehodeča svetla ni sene, se sejene.
Se ama baš se pot miliem Buogem tek su
mesečeve mene.
A mi tekar mesečari. F cvietu se zacvietil puop.
Vrgla sem se sama vu se. Človeku je za biti
smuomu sebe stuop. Jerbo – bilo kuda Kiki svuda -
i ...iki...kiki...iki... za čas sme si Lunatiki.
A f pustijne Mohave kaktus otpira cviet same
za jenu nuoč. Mesečeve trave f ognju tlapiju.
Sejne hrčeju, trde spiju. Ma pusti k vragu i sejne.
Če je svieta mejne – to je više mesta za živlejne.
VETRENE STRNI
Rastancani štriki na vetru, ruobače i plahti
twist-aju znat gliba. Vetrene strni pikajuoči zadiete
f našu slablinu trgaju.
Spentrali bi se i znat neba gda bi ga bile.
Fali nam kuraža, fali nam zamaha za tek opernatela
krilca. Ali kak sliepcu reči da f kmicu ide
kak gluhuomu puokazati da z čkomine zide...
gda spretrgali sme one kaj nigda strgane nemre biti
gda zgubili sme one kaj ni smele zagublene biti.
Vetrene strni, ognjeni terni f cvietu, f draču, f plaču.
Dišeči gluoguof cviet zadel se f naš
zuoprani dan. Oblajhane lasi osušili sme na vetru.
A šteli sme same vun ziti, šteli sme same biti...
one kaj jesme biti...
Ali pošenula nuoč nas je fpelala f nutrine.
A sfrkane jutre zravnale se f dan.
RUMPELŠTILSKIN
(Cvilidreta)
Z kuoša za smetje cmužeju zdrapane poeme
cendraju nigdar napisane pripuovesti
zdrapani kuomadički vremena, a kaj bi im ja?
Nemrem ni sama z suobu do nigdar i nigda.
Strahuotni je čuovečec zasel na vetrieni štienga.
Ne da mi prejti dok mu ne raskrijem njegva imena.
Pret nim kuoluovrat i slama f zlate niti sprepredena,
rubenina tekar uoprana, narašene tuhice nadajna.
Se bu te sprepredene f zlate same ak mu
raskrijem imena. A ja iščem ime još ot detijnstva.
Zrcalim svuoja lieta f sfaldanomu licu staruosti
f zdrapanim komadičkima htiejna i muorti bi i štela
prestati iskati. Al zdavna, preveč zdavna sem
našpranjena z špranju iskanja – alkemija.
Hamlet bluodi po kamenieh zidi, Lady Macbeth
pere ruoke – bejž, bejž piknja kervava.
Rastrieščene triešče vrgnute pruoč ot serži drieva
šuma je tek daleka slike preslika.
Razmrvlene sejnine vrgnute pruoč ot serži trave
senukuoša vonjhava tek je blieda pretstava.
Nit sem trieska nit sem iver, ni sejnijne, se kaj
muorem biti tekar je kratkevečne zimske ijne.
I čemu mi onda tuhice f paperju, rubenina zlata
tekar uoprana, čuni na razburene vode, Singerice
i cvikcange za mefke jastuke sejnajna.
Muorti bi zapraf štela ne šteti, znutra ostareti,
preskuočiti štiengu z čuovečcuom kak ščeranji obet
zarinuti glavu f krlietku gugutkinuoga gugutajna,
puđati veter i oblake, preskakati trčke i mlake.
Muorti bi zapraf štela... i huncutarije sekake.
Al zmuotani črn-bel naviek se spomele f strn.
A strn pika. Prazna slama i praznine duojadi.
Biserna kap kaj se f pavukuovu mrežu vlovila
na kraju ju je i prebila. Voda živlejna jedva me hmila.
I gde sem ondak bila i kaj sem bila. Iščem.
Vrieme mi črez perste curi. Imena još naviek ni.
BESTIELESNI
Nigda mi ni rekel ni jene žalne rieči.
Ali lugar je prešel po šume. Zacajhana
drieva za otstrel treptala su f jutriešnjem
svetlu.
Nezasičena otopina kmice
zosipavala se f nerazmuotani dan.
Kameleuonski gunji suonca f trepčečem
zraku zgajnali su jutre z rupe van,
a obluokane sejne zrušile su se f klecala
pri jutriešnje meše.
I se je bile kak i hiladu liet predi tak.
I šršljavo štršljavo listje kaj frflja čez zrak
i oštre britve megle spuot suonca
i vode i neraščesane lasi ot snuočka
ali senak...
Stari vrbik se zrušil f svuoju senu
ni otziva f vuode več mu neje.
Gledim, biele prepelice bejžiju
po srebrene trave, a ja nekak znam
da tiela več neje.
REQUIEM ZA NUOČ
Ne znam gde i ne znam gda su vetri
obiešeni na galga, ne znam gde i ne znam
gda je vilinski prah duobil miris baruta...
F duplju vrbe harfiera pavučina, vlažna
tuopla nutrina sejnajna na puoceku dana.
Vune vukuodlaki tancaju svuoj krvuožejni tanec
na mesečine. Siruove strasti guoluoga bitka,
kerf je juoš vruoča kerf je juoš žitka.
Kak sam ot sebe puobeči. Kaj je zbilam tak
lefkuo kuožu preslieči. Jeza me zebe, a mi
sme vukuodlake odnesli z suobu f sebe.
Ne znam gde i ne znam gda su otprli vreče
zvuzlane ot vilinskieh lasi, ne znam gde i ne
znam gda su pobili serne f nami, ali den se gasi.
Za suolsticija na špice dana il nuoči druidi
zazivleju mater zemlu da zravna f ekvinuocij
se kaj je juoš f nami zravnati muoči.
Zravnana neravnuoteža magnetskuoga puola,
serh sme semu kaj zapraf serha niema
mi sami dali, otstrelili nuoč, besmisel prizvali.
I nesli sme otstrelenu nuoč na pleči al jutre
senak nije došle pak kaj se juoš tu muore reči.
F duplju vrbe harfiera pavučina, druobne
šumske vilice puščaju črez zemlu, rieku,
veter, žižek kriesnice, svuoj vilinski glas.
Lista se čkuomina. To je requiem za nuoč
requiem za nas.
KUOREN Z TERUOGA
JE ZRASLA STIENA
Šršlenuova gniezda pot vrbu. Nizina.
Rastače se truhli rast, posiehla je lipa.
Nafaldane stiejne f zraku. Visina. Na
stiejnaku tekar orluova gniezda. Orliči.
Tek zleženi tiči. Spuodi rieka, zguora
veter i davnina.
Gduo zna gde je kuoren stiene, gde je
seme kamena, nadgruobnik praocima.
Gde je hiladulietni rast, svetle njihva počela.
Denes na vuglu Bukovačke i Maksimirske
zrušena je stara podrta hiža. Praocmi
niema stanišča. Z njihva korejna glibuoke
skuorejnena ne več zrasla ni trafka, a kam
pak žetva živetvuornega semena.
Zemla spregutavle se i sačega. Do gda?
Mehen se luovi po bituonski stupi. Na
kameni raspuklin blieda trava. Živlejne si
naviek najde puota makar i f mertvine.
Kak sme ga ondak mi zgubili živi f živine?
Zatirame ga ot začetka. Odma se rastegneme
po šabluone i spririhtame kruoju svieta. Zavetrine.
Šršlaju šršleni po zraku. Zakrila bi se pot
vrbu ali tam su šršlenuova gniezda. Spela
bi se na stiejnak ali na njegve guoleti
rasteju tekar orluova gniezda. Za kaj se vluoviti?
Srbiju skule na potkuolenicami. Zdrapana
zdrapalina. Ali idem dale, idem i iščem...
Iščem kuoren z teruoga je zrasla stiena.
SUMMERTIME
Štel je biti se druge, same ne one kaj je.
Gershwin, persti na tipkah klaviera.
Rapsuodija. Rashital je nuote šenice f
crtuovlie brazdi. Ni puoznal drukše nuote
ni puoznal drukšega nuotnega papiera.
I šenica je rasla, klasala. I šumela svuoju
rapsuodiju zrelejna i semejnejna. Naviek znuova
i znuova se do prvebitnega žiška stvarajna.
Picaso, fuorme i farbe f vremenu. Ni bile te
fuorme kaj ga ni zašpičila kaj ga ni sprefrkala.
Razluomleni fragmenti vremena z traguom
ruoke kaj je sejala, štela, žejala.
Vruoči puoldan razvlečen ot ruoba do ruoba
kanvasa. Rasklimani štafelaj i farba dišeče
zemle kaj je za naviek ostala.
Lorca, Neruda, meštrija rieči z guoručega
nakuovna se-stvuorenuoga. Biti diel tuoga.
Biti rieč, biti glas. A bil je tekar šepet f vuhu,
f trave, frekvencija glibuokega plavetnila.
Ali ja sem ga čula. Čula ga je i ciela galaksija.
Summertime. Zrelina leta. Glasuovje žitka.
Spuoznaja kuomu i čemu i poradi čega. Srh bitka.
I predi naj bu prešel znal je da se je praf tak kak je.
Na vetru se povija klas. Of sviet je stvuoren poradi nas.
Same je plač zviška. Jerbuo na kraju sieh krajuof
bil je. I bil je same te kaj je.
Rapsuodija f plavuomu. Same čkuomina.
Same glas čluoveka. Vekvečnuost, gliblina...
So, hush little baby, don`t you cry.
PRET VRATI NIGDINA
Oklieštrene drieve svieta bi me štele
f svuoju senu.
Kaj bi juoš muogla reči gda presehnuli
su zvirki
gda zamuočale su rieči.
Kaj reči onuomu kaj niš ne razme kaj niš
ne čuje nek tekar one kaj ima on za zreči.
I sfiedrane obelinje krumpiera več me
zamata f svuoje spirale po vuole
ne znam čije, al niti tvuoje niti muoje.
Negduo buri na vrata. Gduo je?
Zemi vuojke vetra z ruoke muoje.
Jer niš ni zanaviek sestvuorene, se kaj ot
praha je zbite i f prah je razbite.
Večna je tekar sieh stvari sena f vetru nuošena,
f lasi spletena, kak tkajne vetra živa, nevideča,
f prahu stvrđena.
Prešla sem ti priek puota kak prejde
saka sena.
Ali za onuga teri ne zna gledeti...
Pret vrati – nigduo. Za zbilam nigduo?
Nigdina f zraku raspredena.
Glava f kuorlat zateknjena...
5-6, 2010.
Klikni za povratak