Zemlica magnetica – sončeko vusevlekač

Kmicu zapečenu strugali su

letima: sto, dvesto petsto osemsto

prtili su dneve, noči, drapali su plašče kvarili su

joči zemlu čitali su pojali su

meglu, sene, goreli su

eppur si muove šeptali su: spoznali su

jesu! zganku tela duše svetla

srca možganih i betega

vračili su i na Mesec leteli su

jesu! Bormeš jesu!

I na dalko zehali su na Japete

i Saturne, Andromede i Vlašiče

črne grabe i kvazare; i na čudaj strajnske

svete, coprali su, cepali su mrvinčice

droptinice

molekule i atome

kvarke mučkinečke elektrone

pritom semu dramili su

i na mejnše slinili su, jesu!

Zbilam jesu!

Na noftu palca svojega zajnu

večeru narisali su

srce jenomu vadili da bi drugoga zakrpali

jezike klonerali Bogeka se igrali

nek bu svetlo!! zavapeli

i bilo je.

Fakat jeje.

Zmed Zemlice- magneta i Sončeka vusevlekača

Plazeč spod drvla šipražja kačjaka drača

Lača se čovek kukček smetek

Narikač i popevač, v krletki ftiček

Spoznana seznana znana

I na koncu koncof sakoga

kruhnulo jeje: navek bumo v labirintu

zgubilišču

de smo? smisel de je?

spoznal mrvinček mrafček tega neje

zbeči zemlu doseči

nebo

navek bil mu je beteg

A zabadaf sa vračištva joge meditacije

zapisi i formule

debele knige

new age trave emulzije

tablete terapije se je to

jen placebo

Vu Ime Rojžice!

Vu Ime Petoga Elementa!

Vu Ime Reči!

Ponavlamo bogekaiščeči od iskona bit

Zabil tega vu semu kumeru dvajstprvostoletnomu čovek

drobnički neje:

Od sončeka- zemle- vodice- zraka- lubavi

Spletena Arijadnina je nit.

Jeje!!!

SFINGINA ZGANKA

Šte to

JUTREŠNJU ŽGANICU

Popije

Zo štamprlina

Šlivovicu

Vilijamovku

Bez kapi plaviša

Za zornicu duše tela za dišobu

Vusnicu ponešnicu

Kak črlenu črešnicu

Plus jabuku k tomu

Zgrizne gladno jako

Lakomo

Se je v rimi se je v farbi se ga vabi

Koga?

Se na friško na nos i vuha

Pone roke destilata čistogotnog hrepenena obečaja

Nature prvih kapi nektra nade, a nogice još

Gingave

Gdo je podišal?

MLADO VINO

Vre je bubri otrovi bejži od tog

Kruli v črevi zmota te na jen dva

A se probat moraš očeš

Od soka do kiseliša

Mali korak

Slinomet

Z druncavoga makadama

Šte

Posmekne se v seznane

ZRELO VINO

Mir i jakost

Pak se fali ja to morem ja to znam

Pozna pravi začin zdravle

V Velika kola da se fpresti

I kak Atlas svet nojsiti i tancati zlevati

Staroga semena

Svoje gene restepati

V gostom mleku i dišobi

Kaj naprej ga tira

Kakva vražja sila

Kresmuri zažiže

Perpetum mobile

Se su sene kipa dobile

Šte zna skemijati

JABUČNI OCET

Na vreme

Stoči slatkoču

Da dobi se kiseliš

Tlaka si ž njim lefko spustiš

Zabrazdiš tu i tam

V bučkuriš

Nekakve miš maše

Koktele vusputne

Pak vu

STAREČKE SOKE

Zagaziš leplive posmekneš

Se zagrezneš

Mandragore iščeš namačeš v

Likere kaj spravlaju ih fratri po starinskemi receptimi

Kupinovo vino

Pelinkovec

Kinovino malinovec ginseng tinkture

A več ne vidi

I se menje dumdumduma srce mu

I smrt mu več na pljunomet je

I poklem vremena i poklem neblačini

Zažarena opadajuče zblesikana

Kogla sončeva

Popila je slepca bokca

Kojega?

POTKOVANI PONDELKI SREDE

Pondelek od devet i četrdeset do

Deset i trifrtal

Tork od pol jeden do pol pet

Sreda negde oko tri

Pak četrtek dani kulko

Ali sto?

Gda je petek a subota

Je li fraj

Kaj v nedelu do

Pondelka tak naprej pak se nazaj...

Ringišpila se

Poja se

Od jastrebof

Do šaša

Od smetja

Do mesečine plašča

Kočijaši

Jezero njih

Nevidlivih

Vuzde potežeju

Bista veha

A kobile se su divle:

Zorah vodah vetrof

Se bi redom pile

Stepe

Slobode

Črlenoga zahoda

Jupiterovih pejzažof

One bi

Pegazile

Srkale

Srčeju

Srčiku

Glođeju mrzlu duhu

Zaduha

Divline

Zavuzdane

I zabadaf herbicidof pesticidof

I otrovof

Okapanja i treblena treterana

Kamuflerana

Drač bu znova se prebijal spod kopitof

I spod repof

Dišal divle

Pesmoduhom

Stiskal bu te

Kopito bu v sonce smočel

Pondelek četrtek petek svetek

Zalafal se na divle dale

Dok ne speša

Duša grešna

I na pojilu ftopi si

Saki korak kas i topot

PRIZIVAJA GODIŠNIH DOB

Človečeci – pucke i hlapeci

čistam od svetla

zdroncani

znutra lefko

fletno vloviju se

v sreču – poslanstvo

Grdolepo nafčeni

prizivati godišna doba.

Jutro il poldan il zvečeri,

zlecavanje –

dehneš, i znaš: vezda je vreme za prizvati.

Je li bi godišna doba se i bez toga presmicala jeno v drugo?

Je li bi se?

Je li bi?

PRIZIVAJE PROTULETJA

Idemo ga prizvati

Več neje za zdržati ovu zimu

Več nesmo imuni

I se je boleče

Jele su se naranče i limuni.

Poklem.

Mi- lubavi stekliši.

Cecali se slatkiši.

Črna čokolada, 70-postotna

Črno pivo.

Na kante jugovine

Mučkino mučnine –

Kaj je i za razmeti.

Na pustopolini je sever nagli z snegom reshital fazane.

Zburkani su

Kričali!!!

V tunel pahuli se zaletavali.

Ak fazani v zimi letiju, zna se:

Nišče ih neje prestrašel.

Letiju od čiste sreče.

V joku snežne oluje

Povedale su se bedastoče.

Nasmejane i

pripite

Predsmrtni hropec snegov

Na jutru črlenom

sonce se več naveliko hrusti

PRIZIVAJE LETA

Komarci su me objeli

imel si rane po plečima

gobe

Proščeje na biciklinu se sončekovom

pelalalo

vuzduž i poprečki

od fabjanova valentinova petrova pavlova srca isusova

vidova

gospe snežne

rokova svetoga martina…

Obavili smo to kak treba, na stoječki

kak priliči

golo leto bujno leto

goli v letu, i vu leeetuuu

A vode!

vode bilo je vu nami pod nami nad nami

voda se pila cedila zlevala špricala točila

podrigavala parila

pod nami nad nami vu nami

voda je znova sveta sporodila.

PRIZIVAJE JESENI

Kuruze odmustačile svoje

Ružiju kombajni negde blizu

Pri nami se je tak blizu

I bržem

Idemo bržem

Delaj bržem

Slažem gramatiku bržem i rečnik svojega jezika bržem

svojega

živlena bržem i hičem

bržem

Debelim flomasterom križam – bržem, pol vure,

Bržem, blizu.

Onda za saki slučaj još to zalejem živim vapnom

Prirode korektorom

dezinfektorom

Z moje vapelnice

Vu koji zosmudilo se leto

Vidlo mi se – zanavek.

ZIME PRIZIVAJE

Zimu smo prizivali točno na vuru:

ar je onda nebo preslečeno

steklenom čkominom

sklisko i čistam čisto:

Obrneš si sveta

Noge su ti med zvezdami

Gaziš po njimi

poklekneš

plaziš

Ne paziš

Zvezde se su vu ekstazi

Glava ti je negdi doli sef si zobrnjen vu semu tomu

okretanu

a sapu ti zaledi lepota

Ledvena.

Topla roka su te vužge

Sef si zvezde srčeš zvezde

Baš gda treba je i kam treba

Je.

ANCILE KLUČARICE

Vreme išče pod hitno nove klučarice za senje

Šutlive

Nenasmejane

Zapraf za zbilam ozbilne

Bledeše od ponoga meseca pred zorju

Do gola ošišane

Asketske ancile

Dežđom svemirskim

Zvezdami oprane

Na slami ih trdi, mrzlomu

Trudne od nespana

V škatulicami komoricami

Stišjene prignene

Z jenim jokom navek v klučanici:

Rešetke od mesečine na jobloku

Skrivaja, fotofobije

Sonce – črleni krvnik

Kak čislo senje prebiraju

Nove klučarice

Varoša skritoga ancile

Ne iščeju

Niti oferaju z cajtom

Oprane od grešnih misli

Klepsidre obračati

Jedini svet

I zavet

Ne moliju,

A pokorne

Ne zagledavaju se

V mlaku

Jezero

Reku

Zrcalo

Glancane i prepravlane krojene i šivane senji

Jedina im taština

Poskližeju

Se

i

Jutene

i konopline

halje

čez

Glatka bela tela očuvana

Drščeju romari lubavi kaj čakali su

Stoletjima

Od čamof

Od skrivaja

Vusnici napučenih

Hrepenena pretočena

v joči

se žariju goriju širiju

Nemiju od se – znana

od dramlena

I čuvaju skrivaju ne daju

Kluče

Pogotneju

Predi jutra popustiju

malo

Zadremleju na časek

I natruha prešesni zazible čvrsto senji tkanje

Stiha zajafčeju ne znajuč za se neme čuvarice senjah

Na svojemi postelami

Od slame

Betežne od svojega poslanstva

Nemo telom – kak jafče koreje gda počne se gibati v zemli

Nemo – k ak cviliju trave gda senjaju koscof korake

VAPELNICA LUBAVNICA

Gda se ogen z ognom

Gasi

Pepela je na lopate

Mudra na sreču

Na oca pokojnoga

Bila je

Čitati je znake znala

Z travami vračiti

Coprnice se igrati

Pepel + trave + mesečina + tiči + ogen:

Sopun kuhala vu nemu se

Vmivala

Ne sam sebe – nek i svet

Lunu belu – kak obloke pred Vuzem

Novinami glancala

Čak i rosu vmivala je

Čak i dežđe vmivala je

Prala ceste reke snege

Ribala je zo sopunom

Netečne lude grde senje

Boleščine

Najbolše kre vode

Prali smo se

Znutra

Tam su reči

Preobračale se vu kameje

Je šeptalo: ne gazi me

Preveč steklo

Golo ti se vtisnem v kožu

Ne boleče

Tvoj glatkomrzli tatoo

Sestra kače

Ti buš vezda

Neje farsa neje drama sam još jeno protuletje

Den je žvakal mokro listje

Sneg je v časku

Žvale dobil:

Duha lopuha i koprive

Zmišlavane na buduča

Svadili se čist bez žara: ali labod leti il hojdi

Aterera

Kam ve smera

I kak mi sami pašemo

tomu semu

Naslikavali se z sake strane –

Na kipčecima ne nas bilo:

Mučkino smo pavučinaste meglice

Čapli pijani od jutra protuletnoga

na nebu

ukazane.